KAJADIAN 16
16
I Hagar ka' i Ismael
1I Sarai, bengkele' i Abram, ma'isa nohumpak anak. Panyo ia daagi' ko posaihon samian anu lengkat mae i Mesir, samian na langkoyang sanggonyo i Hagar. 2I Sarai notataemo hi Abram, “Tumpu madi' mompobee' aku da mohampeakon anak. Kalana aijo', sahanyo beleyum moduhusmo tiba posaihonku aijo. Ihe na monsumbu' ia mohampeakon anak bau anakku.” I Abram sinitujumo i i poitaon i Sarai. 3Sumo aijo' na i Sarai nombee' i Hagar hi Abram da opotimbali salaku ambahue'nyo. Tempo'nyo aitu i Abram sampulu'mo na taun kiijo' i Kana'an. 4I Abram noduhusmo tiba i Hagar, lantas boune aijo' pinoboamo. Panyo salatan sinumbu'mo i Hagar taalu' ia pinoboamo, ia kinobubuunmo ka' madi'mo nompajuli i Sarai.
5Lantas i Sarai notataemo hi Abram, “Aku nombee'mo posaihonku i Hagar hi beleyum, ka' salatan sinumbu'nyomo taalu' ia pinoboamo, ia madi'mo nompajuli mae aku. Atina' kasala'an nu beleyum. O amalakon da Tumpuje na momputusi palakala aiya hi beleyum ka' hi belengku.”
6Tinaaman i Abram, “Bakasmo, ia posaihon nu beleyum ka' beleyumo na mongkuasai ia; lewa'mo pokau na ia yayamo pongka'oho' nu beleyum.” Lantas saja'mo sinigohan i Sarai na mompokau i Hagar, sahingga ia nopalaimo.
7Malaekat nu Tumpu nonsingkabotimo i Hagar koko mata nu uee i tampat anu mateges, i jalan anu mokiijo' i tampat anu mateges Sur. 8Malaekat aijo' notatae, “Hagar, posaihon i Sarai, beleyum lengkat mae iya ka' kahanda'mo mamba moya?”
9Malaekat aijo' notatae, “Po'ule' pinsusule' hi ia ka' hongo-hongo na ia.” 10Lantas malaekat aijo' po'ule' mule' notatae, “Ku bee'ije na beleyum manjoo' hondo na makumpu, sahingga madi' ko samian pe'e na anu moko ala mombilang aha. 11Madi'mo daagi' pin beleyum mohampeakonmo samian na anak mo'ane; sanggohi na ia i Ismael, kalana beleyum i humang i hongomo nu Tumpu. 12Panyo anak nu beleyum atina' tumuu' sumo keledai ma'ela'; batu-batu mian nu ewa, ka' batu-batu mian mongewa ia. Ia tumuu' madi' mogalum tiba to utu-utusnyo.”
13I Hagar nompotutugakonmo i uno nu kinyonyoanyo, “Pa' totu'u na aku montoamo Tumpu Allah anu mompalahatikan mae kantumuu'anku?” Sahingga ia nonsanggomo Tumpu anu notataemo mae hi ia, “O Tumpu Allah anu Mompalahatikan mae Kantumuu'anku”. 14Mokonyo aijo' mian monsanggohi bubung anu i olot nu Kades ka' Bered aijo', “Bubung Nu Anu Tumuu' Anu Mompalahatikan mae Aku”.
15 #
Gal. 4:22
Lantas i Hagar nohampeakonmo anak mo'ane ka' tuumanyo i Abram nonsanggohi mo anak aijo' i Ismael. 16Tempo'nyo aitu umun i Abram uwalumpulu'mo anom na taun.
Currently Selected:
KAJADIAN 16: LAILOE
Highlight
Share
Copy
Want to have your highlights saved across all your devices? Sign up or sign in
