SISIKON NU TO RASUL-RASUL 4

I Petrus ka' i Yohanes i ahop hi Mian Kopian nu Agama

1Hau-haunyo i Petrus ka' i Yohanes daagi' motatae tiba to mia-mian aijo', to kapa-kapala nu imam ka' kamundan anu monjagai Laigan nu Tumpu tiba to mia-mian nu Saduki tinokamo hi Petrus ka' hi Yohanes. 2Aha notambuha' sabab i Petrus ka' i Yohanes nontaloakon hi to mia-mian tukoonyo i Yesus po'ule'mo tinumuu' lengkat i kapatean-Nyo. Ka' aijo' momponyata' saba' mian mate po'ule' tumuu'. 3Sahingga aha nohakop ua-ua'aha na rasul aijo' ka' pinosoopnyo i uno nu talungku'. Ka' kalana pinihimo i Petrus ka' i Yohanes tinahanmo i kiijo' tinoka dodododopnyo. 4Panyo to mia-mian anu nohongomo ajalan nu to rasul-rasul aijo', manjoo'mo na anu pinalesaya. Sahingga konjoo' nu aha nintuangmo sampe tinimbalimo kila-kila olima' na madala na mian.

5Dodododopnyo to tu'a-tu'anyo nu Mian Kopian nu Agama, to pola-polaya' nu Yahudi ka' to gulu-gulu' agama binala gombumo i Yerusalem. 6Aha nompahakabotmo tiba Imam Daka' i Hanas, ka' i Kayafas, i Yohanes, i Aleksander, ka' iwi-iwi' na mian anu minsoop sampoto utusan nu imam daka' aijo'. 7I Petrus ka' i Yohanes binoa mangadap hi aha lantas aha nompokilawamo, “Mosia na bau-baunyo komiu nompa'alin mian kapi' aijo'? Kahosonan nu apaa kabai kakuasa'an lengkat mae hi he na komiu nombau aijo'?”

8I Petrus anu kinuasanmo nu Roh nu Tumpu, nontaami, “To Tutuuma polaya' bansa ka' to Tutuuma mian kopian! 9Kami opalesa sinaa uuka, kalana nombau anu ma'ima' nontulungi samian anu kapi' ka' kalana to Tutuuma mongka'oho' monsumbu' mosia na mian aijo' pina'alin. 10Jadi, to Tutuuma iwi-iwi' tionyo monsumbu' ka' iwi-iwi' bansa Israel tionyo monsumbu' saba' mian aiya tuminjo uuka aiya tiba butong anu sehat i ahop nu to Tutuuma, kalana kahosonan ka' kakuasa'an lengkat mae hi Yesus Kristus mian nu Nazaret aijo'. To Tutuuma nonsalibmo i Yesus aijo', panyo Tumpu po'ule' nompotumuu' Ia. 11#Mzm. 118:22 I Yesus aiyamo na anu nupatujui nu ayat aiya i uno nu Kitab nu Tumpu,

‘Batu anu madi' opake nu komiu to tuka-tukang anu topo bau laigan,

padahan tinimbalimo batu anu penting.’

12Ola ahi' kalana i Yesus mian oposalamat. Kalana i songko-songko nu dunia i totonga' nu mian madi' ko samian pe'e na anu nohumpakmo kakuasa'an lengkat mae hi Tumpu da momposalamat kita.”

13To mia-mian anu Mongulus Palakala aijo' binangang na montoa kabaanian i Petrus ka' i Yohanes, apaa mule' nusumbu' nu aha saba' ua'aha na rasul aijo' to mia-mian biasa anu madi' ko sikolahnyo. Lantas aha sininsumbu' saba' ua'aha na rasul aijo' to mia-mian anu nombatuki Yesus. 14Panyo aha madi' noko potatae apa-apaa, kalana mian anu pina'alinmo daagi' kiijo' tinjo-tinjo i ahop nu aha hingga-hinggat tiba i Petrus ka' i Yohanes. 15Sahingga aha nonsai ua-ua'aha na rasul aijo' mosabat lengkat i uno nu Pongulusan Palakala, lapas aijo' aha nombisalakonmo. 16Aha notatae, “Apaa na anu tionyo obaunto hi to mia-mian aiya? Iwi-iwi' anu jojoong i Yerusalem nonsumbu'mo, saba' anu talalo hondo okabangangi aijo', binau nu aha ohua'. Kita madi' moko ala mombahakon aijo'. 17Panyo da han aiya boli talalo togilele ka' lebe motala mule' i totonga' nu to mia-mian, imbo' da opopobuhukto na ua-ua'aha, da aha madi'mo timbali motatae hi samian pe'e mompake sanggo i Yesus.”

18Sahingga i laga nu aha na ua-ua'aha na rasul aijo' po'ule' ninsoop, ka' nompoto'i tukoonyo nu aha madi'mo timbali monsanggo kabai mongajan tiba sanggo i Yesus.

19Panyo i Petrus ka' i Yohanes nontaami, “Posi tutugimo apaa na anu totu'u i ahop nu Tumpu: mombatuki palentah nu to Tutuuma kabai mombatuki palentah nu Tumpu. 20Kalana kami madi' timbali belenti na motatae mongkona apaa na anu tinoamo mami ka' pinosi hongo.” 21To mia-mian anu Mongulus Palakala aijo' madi' noko humpak sa'angu' pe'e na alasan da mohukum i Petrus ka' i Yohanes. Jadi aha nompopobuhukmo ua-ua'aha na rasul aijo', lantas pinolapasmo ua-ua'aha kalana iwi-iwi' na mian mompuji-puji' Tumpu kalana apaa na anu tinimbalimo aijo'. 22Mian anu nongoa'i na'alinmo, anu okabangangi aijo', umunnyo labimo patom pulu' na taun.

To mia-mian palesaya nompoita kabaanian anu lengkat mae hi Tumpu

23Salatan i Petrus ka' i Yohanes pinobebasmo, aha ninsusule'mo hi to sanga-sangalu nu aha ka' nonsisik iwi-iwi' anu tinaloakonmo nu to kapa-kapala nu imam ka' to pola-polaya' nu Yahudi hi aha. 24#Kel. 20:11, Neh. 9:6, Mzm. 146:6 Salatan i hongo nu to sanga-sangalu nu aha aijo', aha hingga-hinggat nomposa'angu'mo kinyonyoa binalado'a hi Tumpu. Aha notatae, “Tumpu, Kitamo na nompotimbali langit ka' tano', ambai ka' iwi-iwi' na isinyo. 25#Mzm. 2:1-2 Tiba Roh nu Kita, toho'mo notatae hi mompolee' kami, i Daud, aijo'mo na Posaihon-To; Kita notatae,

‘Kadaka' to mia-mian anu madi' monsumbu' Tumpu, motambuha';

kadaka' to bansa-bansa mombaumo tanga' anu madi' ko gunanyo?

26To Tomu-tomundo nu dunia mosadiamo da mahampatemo,

ka' to pola-polaya' mosa'angu'mo mongewa Tumpu ka' Tomundo anu Momposalamat.’

27 # Mat. 27:1-2, Mrk. 15:1, Luk. 23:1, 7:11, Yoh. 18:28-29 Kalana memang i Herodes ka' i Pontius Pilatus nombaumo posa'angu'an nu tanga'an tiba to mia-mian anu madi' monsumbu' Tumpu ka' tiba to mia-mian nu Israel i kota aiya. Aha singkabot da mongewa i Yesus Posaihon-To anu Susi' aijo', anu i hangkatmo nu Kita timbali Tomundo anu Momposalamat. 28Aha nosa'angu' da mombau apa-apaa, anu tinantukanmo nu Kita momonanyo saba' aijo' tionyo timbali. Ka' Kita montantukanmo aijo' nu kakuasa'an ka' posi Pongka'oho'-To. 29Uuka aiya, Tumpu, toamo mosia na aha kahanda'mo monsilakai kami. Ka' poloasmo na kami, to posa-posaihon-To aiya, mompolele lele anu lengkat mae hi Kita ka' madi' mabuhuk. 30Otulungiakon-To mae da mian masakit opa'alin ka' anu okabangangi ka' hahan anu madi' toho' opia timbali kalana kakuasa'an ka' kahosonan anu nolengkat mae hi Yesus, Posaihon-To anu Susi' aijo'.”

31Ilapas na aha binalado'a, tampat sinihukan nu aha aijo' tinolohenggomo. Aha iwi-iwi' kinuasanmo nu Roh nu Tumpu ka' mulaimo binaani hondo na notatae mongkona lele lengkat mae hi Tumpu.

Iwi-iwi' nu pake nu aha sama-sama

32 # Kis. 2:44-45 Iwi-iwi' mian anu palesaya aijo', tumuu' sa'a-sa'angu' na kinyonyoa ka' sa'a-sa'angu' na pikilan. Madi' ko samian pe'e lengkat hi aha na montaloakon tukoonyo apa-apaa na anunyo atina' posi anunyomo. Iwi-iwi' na anu daagi' hi aha nu pake nu aha sama-sama. 33Tiba kuasa anu daka', to rasul-rasul aijo' mombee'i katalangan saba' i Yesus po'ule'mo tinumuu'. Sahingga Tumpu talalomo nombalakati aha. 34Ka' madi' ko samian pe'e aijo' hi aha na anu kamadi'an apa-apaa. Kalana aha anu ko tano' kabai laigan, nompobalukmo tano' kabai laigan nu aha aijo'; lantas doi oli nu anu pinobalukmo aijo' binoa nu aha, 35ka' binee' nu aha hi to rasul-rasul. Lapas aijo' doinyo obagi-bagiakonmo hi toto samian anu mompalalui.

36-37Sumo aitumo mule' na i Yusuf. Ia suele nompobaluk tano'nyo, lantas doi oli nu anu pinobaluknyo aijo' binoanyo ka' binee'nyo hi to rasul-rasul. I Yusuf aiya samian na lee' mae nu bansa Lewi lengkat mae i Siprus; to rasul-rasul suele monsanggohi ia i Barnabas (alati'nyo Pontundu).

Currently Selected:

SISIKON NU TO RASUL-RASUL 4: LAILOE

Highlight

Copy