SISIKON NU TO RASUL-RASUL 23

1I Paulus nontonto'i to pangka-pangkat nu Mian Kopian Daka' nu Agama aijo', lantas notatae, “To Utu-utusku! Toka sinaa aiya aku madi' mongoa'i ko sala'nyo hi Tumpu i uno nu kinyonyoangku mongkona kantumuu'anku.” 2Tempo'nyo i Paulus notatae sumo aijo', Imam Daka' i Ananias nompokaumo mian anu tinjo-tinjo i sasu hi Paulus nohapa' nganga' i Paulus. 3#Mat. 23:27-28 Sahingga i Paulus notatae hi Imam Daka' aijo', “Tumpu tantu mohapa'je beleyum; mian geguan anu mimpula-pula susi'! Beleyum sinumuhang i kiijo' momputusi aku susumo atulan i Musa, padahan posi beleyum nolanggaimo atulan aijo' kalana nompokaumo mian mohapa' aku!”

4To mia-mian anu i sasu hi Paulus notatae hi Paulus, “Beleyum mompopo'ise' Imam Daka' nu Tumpu!” 5#Kel. 22:28 Tinaaman i Paulus, “O, aku madi' monsumbu', to Utu-utus, taalu' ia Imam Daka'. Memang i uno nu Kitab nu Tumpu daagi' tinulis, ‘Boli beleyum mompopo'ise' polaya' nu bansaum.’ ”

6 # Kis. 26:5, Flp. 3:5 I Paulus nontoa saba' sambagian aijo' na to pangka-pangkat nu Mian Kopian Daka' nu Agama aijo', aitumo lengkat hi to mia-mian nu Saduki ka' sambagian mule' lengkat hi aha to mia-mian nu Farisi. Kalana aijo' ia notatae hi Mian Kopian Daka' nu Agama aijo', “To Utu-utus! Aku mian nu Farisi, lee' nu mian Farisi. Aku pinutusanmo i aiya kalana aku palesaya saba' to mia-mian mate po'ule' opotumuu'.” 7Salatan notatae sumo aijo', to mia-mian nu Farisi ka' to mia-mian nu Saduki aijo' nontampu'unimo pinainggaga, sahingga anu momputusi aijo' noobagimo tinimbalimo ohua' na gombuan. ( 8#Mat. 22:23, Mrk. 12:18, Luk. 20:27 Kalana to mia-mian nu Saduki ko pikilan, saba' mian mate madi'mo po'ule' tumuu', saba' madi' ko malaikat, ka' madi' suele ko to roh-roh, panyo mian nu Farisi anu palesaya iwi-iwi' aijo' daagi'.) 9Jadi talalomo hondo na pinainggaga. To pia-piangkuka na mian nu Farisi anu tinimbalimo gulu' agama tinuminjomo ka' nonggagakon totu-totu'u. Aha notatae, “De mongala i pongka'oho' mami, mian aiya sangkiding pe'e madi' ko sala'nyo! Ugaat totu'u daagi' ko roh kabai malaikat anu notatae hi ia!”

10Pinainggagaan aijo' tinimbalimo dinaka' hondo, sahingga kapala nu suludadu aijo' nabuhukmo boli-boli i Paulus nupateimo nu aha. Jadi ia nonsai pasukannyo namba nongala i Paulus i totonga' nu to mia-mian aijo' ka' nomboa ia nokiijo' i kajojoongan nu suludadu aijo'.

11Dodododopnyo malom-malom i Tumpu Yesus tinuminjo'mo i sohipi' hi Paulus ka' notatae, “Pohoson na kinyonyoaum! Beleyum nombee'imo katalangan mongkona Aku kiijo' i Yerusalem. Beleyum suele tionyo po'ule' mombee'i katalangan aijo' i Roma.”

Posa'angu'an kahanda' mompateimo i Paulus

12Subu-subu dodododopnyo, to mia-mian Yahudi nontampu'unimo nomposa'angu' tanga'an. Aha binasumpa'mo madi' mongkaan kabai monginum de aha ma'isa pe'e mompatei i Paulus. 13Molabi patompulu' na mian anu nomposa'angu'mo tanga'an aijo'. 14Aha namba hi kapala nu to imam-imam ka' to pola-polaya' nu Yahudi ka' notatae, “Kami binasumpa'mo hingga-hinggat, madi' mongkaan kabai monginum apa-apaa de kami ma'isa mompatei i Paulus. 15Jadi, uuka to Utu-utus tiba to pangka-pangkat Mian Kopian Daka' nu Agama tionyo mompakatu sulat hi kapala nu pasukan nu Roma aijo', mompoita ia da momboa i Paulus minsusule' mae mangadap hi komiu, au'aitu komiu mongka'oho'mo poule' mompalesa pe'e palakalanyo totu-totu'u. Ka' kami sinadiamo mompatei ia ma'isa pe'e toka mae aiya.”

16Panyo anak nu utus boune i Paulus nohongo sale' nu posa'angu'an tanga' aijo'. Sahingga ia namba nokiijo' i kajojoongan nu suludadu ka' nompoto'iakon han aijo' hi Paulus. 17Lantas i Paulus nolaga samian na suludadu ka' notatae hi ia, “Boa na olitau aiya hi kapala nu suludadu; ia mongka'oho' mompotoka apa-apaa hi ia.” 18Suludadu aijo' nomboa olitau aijo' hi kapala nu suludadu ka' notatae, “I Paulus, anu tinalungku' aijo' nolaga aku, ka' mompoita aku momboa olitau aiya hi Kita Tuuma; ia ka'oho' mompotoka apa-apaa.”

19Kapala nu suludadu aijo' nontoongi lima nu olitau aitu, lantas nomboa ola posi ia i sohipi' ka' nompokilawa, “Apaa na ka'oho' nupoto'i hi belengku?”

20Tinaaman nu olitau aijo, “To mia-mian nu Yahudi sinangaja'mo mompoita hi kita Tuan da nomboa i Paulus mangadap hi Mian Kopian Daka' nu Agama dodop, au'aitu aha poule' mompalesa pe'e palakalanyo totu-totu'u. 21Panyo boli kita Tuan montuluti poitaon nu aha aijo', kalana aha molabi patompulu' na mian anu hau-haunyo natisulukmo montumbuhi ia i jalan. Aha iwi-iwi' binasumpa'mo madi' mongkaan ka' monginum de ma'isa aha mompatei i Paulus. Uuka aha sinadiamo; me montanda'i pontaami nu kita Tuan.” 22Kapala nu suludadu aijo' notatae, “Boli opoto'i pa' hi he, na beleyum nompotokamo aiya hi belengku.” Lantas ia nonsai olitau aijo' da minsusule'mo.

I Paulus binoa hi Feliks

23Lapas aitu kapala nu suludadu nolagamo ua'aha na suludadu, lantas ia notatae hi aha, “Posadia ua'atu na suludadu tiba pitumpulu' na suludadu sumake' ajahan ka'ua'atu na suludadu mintoongon talombo' mamba jam osio' pihi aiya mokiijo' i Kaisarea. 24Posadiakon suele na ajahan da kasake'an i Paulus, ka' boamo na ia ma'ima-ima' toka hi Gubernur Feliks.” 25Lantas kapala nu suludadu aijo' nontulis sulat anu onyi'nyo sumo uuka,

26“Anu opopodaka' Gubernur Feliks. Salan do'a lengkat hi Klaudius Lisias! 27Mian aiya i hakopmo nu to mia-mian Yahudi, ka' me ise-ise' pinateanmo nu aha, de aku madi' tinoka tiba pasukanku ka' nomposalamat ia; kalana aku nohongo taalu' ia layat nu negara Roma. 28Kalana aku kahanda' monsumbu' apaa na sababnyo anu tinuukakon nu aha hi ia, sahingga aku nomboa ia hi Mian Kopian Daka' nu Agama nu aha. 29Padahan ia madi' nombau apa-apaa anu pantas o hukum nu hukuman mate kabai o talungku'. Pontuukan nu aha hi ia ola ahi' anu ko sangkutannyo tiba atulan-atulan i posi agama nu aha. 30Lapas aitu daagi' ko anu nompoto'i aha daagi' ko tanga'an anu ma'idek nu to mia-mian nu Yahudi kona hi ia. Jadi aku balo nomboa ia hi kita Tuan Gubernur. Ka' aku nompokaumo aha anu montutuk ia momboa palakala anu tinuukakonnyo toka hi kita Tuan.”

31Sahingga to sulu-suludadu haha aijo' nonjalanakonmo palentah nu aha. Aha nongala i Paulus lantas nomboa ia pihi-pihi aitu tinoka hi Antipatris. 32Dodododopnyo aha nompobee'mo pasukan anu sinumake' i ajahan molausakon lajang nu aha tiba i Paulus ka' aha mule' ninsusule'mo i kajojoongan nu suludadu. 33Salatan pasukan anu sinumake' i ajahan aijo' tinokamo i Kaisarea, aha nombee'mo sulat aijo' hi gubernur, lantas i Paulus binee'mo hi ia. 34Noko basa' na i gubernur sulat aijo' ia nompokilawamo hi Paulus, lengkat mae iya na pinolengkatanum. Salatan sinumbu'nyo taalu' i Paulus nolengkat mae i Kilikia, 35ia notatae, “Ma'ima'mo! Ku palesaje na palakalaum, de to mia-mian anu nongkalaak beleyum tokamo i aiya.” Lantas ia nompalentahkon da i Paulus opojoong i laigan daka' hi Herodes.

Currently Selected:

SISIKON NU TO RASUL-RASUL 23: LAILOE

Highlight

Copy