SISIKON NU TO RASUL-RASUL 14

I Ikonium

1I Paulus ka' i Barnabas nongoa'i mule' han anu pokakana i Ikonium. Aha namba mule' nokiijo' i laigan pogalejaan nu mian Yahudi ka' notatae i kiijo' na'ima' hondo sahingga da'isan na mian nu Yahudi ka' mian misa' Yahudi pinalesayamo hi Yesus. 2Panyo to mia-mian Yahudi anu madi' mongka'oho' palesaya, nonsale'imo to mia-mian misa' Yahudi, sahingga nonsabapimo aha mongka'ideki to mia-mian anu palesayamo hi Yesus. 3Kalana aijo' i Paulus ka' i Barnabas jinojoongmo pinin i kiijo'. Ka' binaanimo na aha notatae mongkona Tumpu. Sahingga Tumpu mule' nompotoamo bukuti', saba' lele anu pinotokamo nu aha mongkona liibos-Nyo aijo' memang totu'u; Ia nombee'i kuasa hi aha da mombau anu okabangangi ka' hahan anu ma'isa toho' tinimbali. 4Panyo to mia-mian anu jojoong i kota aijo' madi' pokakana na pikilan nu samian ka' sangga'at; daagi' ko anu mosambiha' hi to mia-mian Yahudi ka' daagi' ko anu mosambiha' hi to rasul-rasul aijo'.

5Lantas to mia-mian Yahudi tiba to pola-polaya'nyo no hingga-hinggat tiba mian anu misa' Yahudi nomposa'angu'mo tanga'an da monsakisa ka' mompahambunu'akonmo to rasul-rasul aijo' nu batu. 6Panyo to rasul-rasul aijo' nonsumbu'mo han aijo', lantas nalaimo nokiijo' i Listra ka' i Derbe, aijo'mo to kota-kota i Likaonia, ka' nokiijo'mo i da'erah anu mompaha ohani. 7I kiijo' mae aha nompolele mule' Lele Ma'ima' aijo'.

I Listra ka' i Derbe

8I Listra daagi' ko samian na mo'ane anu tengkenyo kapi' salatan pe'e i hampe, sahingga ia madi' toho' moko ala lumajang, sabab tengkenyo talalo lundeng. 9Mian aijo', sinumuhang aijo' mae mohongo i Paulus notatae. I Paulus nontoa, mian aijo' palesaya ka' kalana aijo' ia pina'alinakon. Sahingga i Paulus nontonto'imo ia, 10ka' i Paulus notatae daka-daka', “Tinjomo hodi-hodi!” Mian aijo' nalalumpat tinuminjo lantas i lumajang. 11Salatan mian da'isan nontoa apaa na anu binaumo i Paulus, aha noloboo' i uno nu basa' nu Likaonia, “To pilo-pilogot anu nintatau'mo mae i dunia ninsalungmo sumo mian.” 12Lantas i Barnabas sinanggohanmo nu aha i Zeus, ka' i Paulus sinanggohanmo nu aha i Hermes, sabab iamo na anu notatae. 13Imam nu pilogot nu Zeus anu laigan ponsombaan nu aha i ahop nu kota, tinoka nomboa mae to sapi-sapi' mo'anenyo ka' to bunga-bunga nokiijo' i sabatan daka' nu kota. Ia mongka'oho' mombatuki mian da'isan aijo' monsombahkon koloban hi to rasul-rasul aijo'.

14Salatan i Barnabas ka' i Paulus nohongomo apaa na anu ka' oho' obau nu to mia-mian aijo', aha nombea-beak baju' nu aha ka' nopadeka' nokiijo' i totonga' nu mian da'isan aijo', lantas noloboo', 15#Kel. 20:11, Mzm. 146:6 “Ee, kadaka' komiu mombau aiya? Kami aiya mule' mian sumo-sumomo kita Utus! Kami toka aiya da mompolele Lele Ma'ima' hi komiu, da komiu mompala'i hahan anu madi' ko gunanyo aiya ka' toka hi Tumpu anu tumuu', anu nompotimbalimo langit ka' tano' ka' ambai ka' iwi-iwi' anu daagi' i unonyo. 16Tempo'nyo naipuan mae Tumpu nompojohokmo to bansa-bansa tumuu' mombatuki posi pongka'oho' nu aha. 17Panyo Ia madi' kinolilimannyo na nombee'i to buku-bukuti' mongkona butong-Nyo, aijo'mo nombau anu ma'ima'. Ia nombee'i beleyum ujan lengkat i langit ka' hasin nu tano' toka i loonunyo. Ia mombee'i kaanon hi komiu ka' momposanang kinyonyoa miu.” 18Panyo tiba potatae aijo' daagi' susa' ahi' na to rasul-rasul aijo' montewa' to mia-mian aijo' monsombahkon koloban hi aha.

19To pia-piangkuka na mian nu Yahudi anu tinoka nokiijo' i Listra lengkat mae i Antiokhia i Pisidia ka' lengkat i Ikonium monsale'i mian da'isan aijo', sahingga mian da'isan aijo' nosambiha'mo hi aha. Aha nompahambunu'akon i Paulus nu batu, lapas aijo' i hela' nu aha na ia nosabat nokiijo' i sambiha' nu kota. Aha nonsangka ia i natemo, 20panyo salatan to mia-mian palesaya anu i kiijo' tinuminjo nontikubi ia, ia nobula ka' po'ule' ninsusule' nokiijo' i kota. Dodododopnyo ia nambamo nokiijo' i Derbe no hingga-hinggat tiba i Barnabas.

I Paulus ka' i Barnabas ninsusule'mo nokiijo' i Antiokhia

21Kiijo' i Derbe, i Paulus ka' i Barnabas nompolele Lele Ma'ima' aijo' ka' dina'isan na mian anu pinalesayamo hi Yesus. Lapas aijo' aha ninsusule'mo nokiijo' i Listra, lapas aitu nokiijo' i Ikonium, lantas nokiijo' i Antiokhia i da'erah Pisidia. 22I kota-kota aijo' aha nompaka pohoson kinyonyoa nu anu saja' mombatuki Yesus ka' nompokinde'i anu saja' mombatuki aijo' da tataap palesaya hi Yesus. “Kita tionyo manjoo' na mongoa'i sansala i moonanyo, atina'je ka' kita mongoa'i ka'ima'an nu Dunia Bu'ou nu Tumpu,” sumo aitumo na to rasul-rasul aijo' mongajanakon hi anu saja' mombatuki Yesus i to kota-kota haha aijo'. 23Ka' i toto sa'angu' na jama'at, i Paulus ka' i Barnabas nohangkatmo to pola-polaya' nu to jama-jama'at aijo'. Lantas binalado'a ka' binapuasa', aha nompotalima to pola-polaya' aijo' hi Tumpu anu nupalesaya nu aha aijo'.

24Lapas aijo' i Paulus ka' i Barnabas nolausakonmo lajangan nu aha montulu i da'erah Pisidia ka' tinoka i Pamfilia. 25Ka' noko polele na aha potatae nu Tumpu i Perga, aha nambamo nokiijo' i Atalia. 26Lengkat i kiijo' aha po'ule'mo tinalabut ninsusule' nokiijo' i Antiokhia. Aijo'mo na kota tampat nu aha u'utu mae pinotalima hi balakat nu Tumpu, da aha mongkalajakon pakalaja'an anu uuka aiya pinoko kalajamo nu aha.

27Salatan tinokamo i Antiokhia, aha momposihukmo to mia-mian lengkat i jama'at aijo', lantas nonsisikakonmo iwi-iwi' anu binaumo nu Tumpu anu pinotokakonmo nu aha. Aha suele nonsisikakonmo mosia na Tumpu nombaumo jalan da to mia-mian misa' Yahudi palesayamo hi Yesus. 28I kota aijo' i Paulus ka' i Barnabas jinojoongmo pinin tiba to mia-mian anu palesayamo.

Currently Selected:

SISIKON NU TO RASUL-RASUL 14: LAILOE

Highlight

Copy