SISIKON NU TO RASUL-RASUL 11

I Petrus nompoto'i kalajanyo i jama'at Yerusalem

1To Rasul-rasul ka' to mia-mian anu palesayamo i songko-songko na Yudea nohongomo saba' to mia-mian anu madi' bala agama Yahudi suele nontalimamo potatae nu Tumpu. 2Sinailapas aitu salatan i Petrus nambamo nokiijo' i Yerusalem, to mia-mian nu Yahudi anu pinalesayamo aijo', nongalumo i Petrus. 3Aha notatae, “Kadaka' beleyum mamba mokiijo' i laigan nu to mia-mian anu ma'isa sinunat? Ola mule' beleyum suele nongkaan hingga-hinggat tiba aha!” 4Mokonyo aijo' i Petrus nompotalang hi aha iwi-iwi' anu jinadimo, lengkat pe'e i momonanyo. I Petrus notatae,

5“Aku hau-haunyo balado'a i kota Yope, lantas aku nontoa sa'angu' na anu tinoa. Aku nontoa daagi' ko apa-apaa anu sumo hude sambotu' anu bolaa tinau'akon lengkat i langit, pino kalayo' i opat na pasu'nyo, lapas aijo' binelentimo i sohipi'ku. 6Tempo'nyo aku nompalahatikan i unonyo, aku nontoa to bina-binatang anu opat na tengkenyo, to bina-binatang ma'ela', to bina-binatang anu jumolo ka' to tomo-tomonsi' ma'ela'. 7Lantas aku nohongo sa'angu' na lewo' notatae hi belengku, ‘Donganmo pobula, Petrus! Kolotmo na aijo' ka' kaan!’ 8Panyo tinaamanku, ‘Madi', Tumpu! Ma'isa toho' aku nongkaan kaanon anu madi' toho' o kaan kabai anu pahengas.’ 9Panyo lewo' aijo' notatae mule' lengkat i langit, ‘Apaa na anu pinonyata'mo nu Tumpu timbali o kaan boli otaloakon madi' timbali o kaan.’ 10Aku nontoa han aijo' sampe pinintolun ka' kahimpusannyo iwi-iwi' po'ule'mo tinolo hangkat ninsusule' nokiita' i suluga'. 11Tempo'nyo aitu mule' aha totolu' na mian lengkat i Kaisarea, anu sinai mae hi belengku tinoka i laigan i tampat kinasonsoo'anku. 12Lantas Roh nu Tumpu nonsai aku mamba mohingga-hinggat tiba aha ka' madi' bata-bata. Aha anom na mian moto utus aiya suele nombatukimo aku nokiijo' i Kaisarea, ka' kami iwi-iwi' ninsoop i uno nu laigan hi Kornelius. 13Lapas aitu i Kornelius nonsisikakonmo hi kami, mosia na ia nontoa samian na malaikat tinuminjo i laigannyo ka' notatae, ‘Sai na mian mokiijo' i Yope molaga samian na mo'ane anu sanggonyo i Simon Petrus. 14Ia nompotokamo hi komiu lele anu momposalamat beleyum ka' to utu-utusum.’ 15Ka' tempo'nyo aku nontampu'unimo motatae sumo aitu,” sumo aijo' na i Petrus nolausakon mule' potataenyo, “Roh nu Tumpu Allah tinoka hi aha, pokakana sumo anu jinadimo hi kita u'utu pe'e mae daagi' momonanyo. 16#Kis. 1:5 Lantas aku tinolo inau', Tumpu toho' notatae, ‘Yohanes nompalamandikan nu uee, panyo komiu o palamandikanje nu Roh nu Tumpu.’ 17Jadi hondo-hondomo Tumpu mombee'i suele hi to mia-mian anu madi' bala agama Yahudi aijo', anu o bee' pokakana tiba anu binee'-Nyo hi kita tempo'nyo kita pinalesayamo hi Tumpu Yesus Kristus. Kalana aijo', te toho' mule' aku montewa' Tumpu!”

18Lapas nohongo aijo', aha madi'mo daagi' nonggagakon. Lantas aha nompuji'mo Tumpu. Aha notatae, “Desumo atina', to mia-mian misa' Yahudi suele obee'i tempo' nu Tumpu da balatobat bolimo mombau to dosa-dosa'nyo ka' mongoa'i kantumuu'an ma'ima'!”

Jama'at kiijo' i Antiokhia

19 # Kis. 8:1-4 Lapas i Stefanus pinatean, to mia-mian anu palesayamo hi Yesus mulaimo saja' iloloi', sahingga aha noga'a-ga'atmo iyayamae. Daagi' ko anu nalai sampe tinoka i Fenisia, ka' daagi' mule' ko anu tinoka kiijo' mae i Siprus ka' i Antiokhia. Aha nompolele lele anu lengkat hi Tumpu ola hi to mia-mian nu Yahudi. 20Panyo daagi' ko anu hi aha to mia-mian anu palesayamo aijo', anu nolengkat mae i Siprus ka' i Kirene, daagi' mule' ko to mia-mian anu namba nokiijo' i Antiokhia ka' nompolele Lele Ma'ima' mongkona i Yesus aijo' hi to mia-mian anu madi' bala agama Yahudi. 21Kuasa nu Tumpu, daagi' aitu hi aha, sahingga da'isan na mian timbali pinalesaya ka' mombee' butongnyo hi Tumpu.

22To sisi-sisik mongkona kajadian-kajadian aiya tinoka tokamo suele hi jama'at i Yerusalem. Sahingga aha nonsaimo i Barnabas mokiijo' i Antiokhia. 23Ka' salatan i Barnabas tinokamo kiijo' mae, ka' nontoa mosia na Tumpu nombalakatimo to mia-mian aijo', ia ilame' hondo. Lantas ia nompoita da aha totu-totu'u mohongo-hongo Tumpu nu iwi-iwi' na kinyonyoa. 24I Barnabas aiya mian anu ma'ima' na kinyonyoanyo ka' nukuasai nu Roh nu Tumpu tiba talalo palesaya hi Tumpu sahingga da'isan na mian nontulutimo Tumpu.

25Lapas aijo' i Barnabas namba nokiijo' i Tarsus molio i Saulus. 26Salatan siningkabotmo i Saulus, ia nomboamo i Saulus nokiijo' i Antiokhia ka' sinataun ahi' na aha nosa'angu' tiba jama'at kiijo' mae ka' nongajan da'isan na mian. Kiijo'mo i Antiokhia na to mia-mian anu palesayamo hi Yesus momonaje hondo sinanggohan to mia-mian Kristen.

27Tempo'nyo aitu daagi' ko to pia-piangkuka na nabi lengkat mae i Yerusalem nokiijo' i Antiokhia. 28#Kis. 21:10 Aijo' hi aha daagi' ko samian sanggonyo i Agabus. Roh nu Tumpu na nongkakeha ia sahingga nompoto'i apaa na anu jadi aiya mae i ahop, koonyo songko-songko na dunia tionyo toka na tempo' nu kapo'ohopan anu daka'. (Ka' han aijo' jinadimo suele tempo'nyo pamalentahan i Tomundo Klaudius.) 29Sahingga iwi-iwi' anu saja' mombatuki Yesus nomposa'angu'mo tanga'an da mompakatu pontulungi hi to utu-utus anu jojoong i Yudea; toto samian mompakatu yayamo anu nu poko ala. 30Posa'angu'an nu tanga'an aijo' binaumo, lantas i Barnabas ka' i Saulus sinai da momboa pontulungi aijo' hi to pola-polaya' nu jama'at.

Currently Selected:

SISIKON NU TO RASUL-RASUL 11: LAILOE

Highlight

Copy