Lukas 9
9
Hi Yesu morumbaꞌ topeguruNa mampowute Kareba Moromiꞌ
(Mat. 10:5-15; Mrk. 6:7-13)
1Hi Yesu mowowoihi topeguruNa to hampuluꞌ meroduo, honiꞌhi Nopaꞌani kuasaꞌ hei roho mampopolai tokodake hante mampokoꞌoriꞌ toaꞌ to mohakiꞌ. 2Norumbaꞌhi nolou mampowute kareba noniuꞌ i poparentana Pueꞌ Ala hei mampokoꞌoriꞌhi toaꞌ to mohakiꞌ. 3Notiꞌikihi hi Yesu, “Inioꞌkei mangkomi ba hapo-hapolu i patengkaꞌmi. Hampoliꞌmokei mangkomi laiꞌ, kopongkona ba doiꞌ. Hei baduꞌmi ganaꞌlu to ipakeꞌkei i wotami. 4Ane uwaꞌ toaꞌ to mantorimokei i tambina, meꞌohaꞌmokei itoꞌo wutekei mampololiu patengkaꞌami nolou pe bolaꞌ ntaniꞌna. 5Ane wutekei i bolaꞌ hei ane hawaꞌkei rotorimo tumpu bolaꞌ, ipolihikei bolaꞌ tiꞌo, hei ikuntakei awu to medokiꞌ i palaꞌna kapuꞌmi, tiꞌo tandaꞌna iohi to hingkiꞌ mantorimo pehukuna Pueꞌ Ala.”
6Koꞌukora nopoturuꞌ hi Yesu, noloumohi pe bolaꞌ-bolaꞌ mampowute Kareba Moromiꞌ hei mampokoꞌoriꞌhi toaꞌ to mohakiꞌ imbo-imbolu.
Datu Herode wewoꞌ noniuꞌ hi Yesu
(Mat. 14:1-12; Mrk. 6:14-29)
7I tempo tiꞌo, Herode Antipa to moparenta i Galilea, pahori lekiꞌ-lekiꞌna kareba tandaꞌ to mepohele to nowali hi Yesu, hei io mewali wewoꞌ, alaꞌ uwaꞌ to mantiꞌi, “Hi Yesu iomo hi Yohanes Toperiu to tuwuꞌ huliꞌ.” 8Uwaꞌ woꞌo to mantiꞌi, “Hi Yesu iomo nabi Elia to hupaꞌ womo.” Hei uwaꞌ woꞌo to mantiꞌi, “Hi Yesu iomo haduo nabi hampiha to tuwuꞌ huliꞌ.” 9Notiꞌi Herode, “Hampiha kurumbaꞌmo toaꞌ mamporomokuꞌ dokoꞌna hi Yohanes. Hihimoreꞌi hi Yesu hieꞌe? Woriꞌmo to kuhori noniuꞌ i Io.” Horiana Herode mampaliꞌ lala mampohidupaꞌki hi Yesu.
Hi Yesu mampopopangka limo sabu toaꞌ
(Mat. 14:13-21; Mrk. 6:30-44; Yoh. 6:1-14)
10Ikopahuliꞌra topeguruna hi Yesu, ropololitamo pe hi Yesu lekiꞌ-lekiꞌne to rowalimo. Uko tiꞌo, hi Yesu mowona topeguruNa nolou pe bolaꞌ Besaida. Tungkaihana hi Yesu hingkeꞌna mampononiihi toaꞌ to woriꞌ. 11Angkana toaꞌ to woriꞌ robahaꞌ koꞌakoare, iomo hinaꞌ metuntuhi. Kohupaꞌralu notorimomohi hi Yesu, honiꞌi nopoturuꞌhi noniuꞌ i poparentana Pueꞌ Ala, hei hihimo to mohakiꞌ Nopokoꞌoriꞌ.
12Hingkiꞌ mentoriꞌmo ando, rotiꞌi topegurune hi Yesu, “Guru, peꞌohaꞌa hieꞌe moꞌela ka kota. Agina irumbaꞌmohi toaꞌ to woriꞌ nolou pe bolaꞌ to dodungku, hingkeꞌna mampaliꞌhi pangkara hante koturuara.”
13Angkana mehoniꞌ hi Yesu, “Ingkeimola to hangangaa mampaꞌanihi mangka.”
Mehoniꞌhi topegurune, “Guru, woriꞌhirahi, alaꞌ depa to uwaꞌ i ingka, limo onulu hante rombaꞌa bouꞌ. Hawaꞌi ganaꞌ ane hawaꞌka nolou duluna mehili pangka.” 14Koworiꞌra kira-kira tomaꞌani limo sabu, hawaꞌhi teꞌihaꞌ towoweꞌe hante oꞌanaꞌ.
Notiꞌi hi Yesu pe topeguruNa, “Irumbaꞌhi toaꞌ to woriꞌ tiꞌo mahura motibura-tibura, limo mpuluꞌ duo hantibura.” 15Hapo to notiꞌikihi hi Yesu, ropetuntuimo mpuꞌu topeguruNa.
16Mahuramohi lekiꞌ-lekiꞌra, hi Yesu moroa depa to limo onu hante bouꞌ to rombaꞌa, menoaꞌ pe laniꞌ hei mekokae pe Pueꞌ Ala. Uko tiꞌo, nowenuꞌ-wenuꞌmo depa hante bouꞌ tiꞌo, honiꞌi nopaꞌanikihi topeguruNa hingkeꞌna rodolaꞌ-dolaꞌkihi toaꞌ to woriꞌ. 17Katoꞌo mangkamohi lekiꞌ-lekiꞌra wute wohu. Koꞌukora mangka, topeguruNa morampuhi pelobiana, hampuluꞌ robakuꞌ tene.
Hi Peturuꞌ mopangakuꞌ kohiYesuna Datu Topohompoꞌ
(Mat. 16:13-20; Mrk. 8:27-30)
18Hampiha tempo, hi Yesu mekokae hadoduona, hei topeguruNa hupaꞌhi woꞌo itoꞌo. Meꞌitanomo hi Yesu pe topeguruNa, “Motuntuni pahuara toaꞌ to woriꞌ, Aku hieꞌe hihimoꞌA?”
19Mehoniꞌhi, “Uwaꞌhi to mantiꞌi hi Yohanes Toperiu to tuwuꞌ huliꞌ. Uwaꞌhi woꞌo to mantiꞌi nabi Elia. Uwaꞌhi woꞌo to mantiꞌi Ingko haduo nabi hampiha to tuwuꞌ huliꞌ.”
20Io meꞌitano womo notiꞌi, “Ane motuntuni pahuami, Aku hieꞌe hihimoꞌA?”
Mehoniꞌ hi Peturuꞌ, “Ingko Datu Topohompoꞌ to Nodandi Pueꞌ Ala!”
21Angkana noꞌopihi mpololeke hi Yesu hingkeꞌna anioꞌ dulu rotiꞌi-tiꞌi pe hihimo.
Hi Yesu mampololita noniuꞌ ikomahina
(Mat. 16:21-28; Mrk. 8:31–9:1)
22Notiꞌi womo hi Yesu, “Anaꞌ Manusiaꞌ hangangaa nolou pe Yerusale hei mampolala woriꞌ komaporiꞌ. Itoꞌo, tomotodi-tomotodi, tutuꞌ-tutuꞌ tadulako mpenomba hante guru-guru agama hingkiꞌ mampoperima-rimaꞌA. Hingkiꞌ rorokoꞌA, angkana ikotolu andona, hingkiꞌ tuwuꞌA huliꞌ.”
23Katoꞌo hi Yesu mampatiꞌikihi lekiꞌ-lekiꞌna toaꞌ, “Himo to dokoꞌ metuntu pe Aku, hangangaa mampohinte peleihana hadoduona, timomo woꞌo mampolala komaporiꞌ hei metuntu nturusi i Aku. 24Himo to motuntuni peleihana duniaꞌ, hawaꞌi pahua kotuwuꞌ to wolaꞌ. Angkana hihimo to mampohinte peleihana duniaꞌ hei metuntu pe Aku kehapoꞌi nirokoꞌ, iomo to pahua kotuwuꞌ to wolaꞌ. 25Hawaꞌi uwaꞌ dumbuꞌne morampuki lekiꞌ-lekiꞌna luma i duniaꞌ hieꞌe, ane hawaꞌki pahua kotuwuꞌ to wolaꞌ tota uwaꞌ koꞌukoana i ando pebutusi. 26Himo to mohili mopangakuꞌ petuntuna i Aku hante mampohili woꞌo poturuꞌKu, Aku woꞌo hingkiꞌ mohiliꞌA mopangakuꞌ koꞌiona topetuntuKa, i tempo pahuliꞌangKu intu ka suruga hante buhaꞌ kuasaꞌ, iomo kuasaꞌ to noweikiꞌA umoꞌKu Pueꞌ Ala hante malaꞌeka-malaꞌekaNa. 27Ipehoromuakei moromiꞌ hapo to Kutiꞌikikei hieꞌe, uwaꞌhi ka lumbumi to hingkiꞌ pangkiꞌ kodatuana Pueꞌ Ala ikohandoaꞌra tene mahi.”
WotaNa hi Yesu mewanta
(Mat. 17:14-18; Mrk. 9:14-27)
28Walu ando uko mepaguru, hi Yesu mowona hi Peturuꞌ, hi Yohanes hante hi Yakobus moneꞌ nolou pe womboꞌ biri hingkeꞌna Io mekokae inoꞌo. 29Kolentuꞌana hi Yesu mekokae, tewolihimo lione, hei baduꞌna mewanta. 30Hampale uwaꞌ roduo nabi to mololita pe hi Yesu, iomo hi Musa hante hi Elia. 31Mewanta hei manobaꞌ mpololeke to roduo tiꞌo. Mampololitakihi noniuꞌ komahina hi Yesu to hingkiꞌ Nopobuhoꞌi Pueꞌ Ala i Yerusale.
32I tempo tiꞌo hi Peturuꞌ hante awana leꞌohi. Ikopeꞌarora liu roꞌokiꞌ hi Yesu, manobaꞌ mpololeke wotaNe, hei roduo toaꞌ metotiꞌihi i hiriNa. 33Ikohandoaꞌara tene molai toaꞌ to roduo tiꞌo mampolihi hi Yesu, mololitamo hi Peturuꞌ notiꞌi “Guru, agina meꞌohamoki iseꞌe! Kiwali romoꞌi tolu onuna bambaruꞌ, haꞌanu Ingko Pueꞌ, haꞌanu hi Musa, hei haꞌanu woꞌo hi Elia.” Angkana hawaꞌi nobahaꞌ hi Peturuꞌ hapo to notiꞌi.
34Kolentuꞌana tene hi Peturuꞌ mololita, hampale noputuꞌromohi kini, hei motehuꞌhi. 35Katoꞌo rohori loaꞌ ka lali kini to mantiꞌi, “Hieꞌemo AnaꞌKa to Kuꞌuwiꞌ. Ipehoromuakei lolitaNe!”
36Koꞌukora pahori lolita tiꞌo, roꞌeleiae hi Yesu hadoduona romo. Hapo to roꞌokiꞌ topeguruNa i tempo tiꞌo, hawaꞌi ropetiꞌi-tiꞌiki ba pe hihimolu.
Hi Yesu mampokoꞌoriꞌ oꞌanaꞌ to nopekahii tokodake
(Mat. 17:14-18; Mrk. 9:14-27)
37Poꞌonina, munaꞌumohi ka birina, hei woriꞌhi toaꞌ ako mampohidupaꞌki hi Yesu. 38Uwaꞌ haduo tomaꞌani i lumbuna toaꞌ to woriꞌ mekoꞌalo notiꞌi, “Guru! Kuperapiꞌ sulungi hingkeꞌna iꞌeleꞌi wokaiaꞌ anaꞌka. Io anaꞌku to hadoduona. 39Ane nopekahii tokodake, moloaꞌ-loaꞌ hante moridiꞌ-ridiꞌ wotane, wute mewowiriꞌ omeꞌne. Tokodake tiꞌo mampopoꞌioꞌioꞌi hei hawaꞌi hiniꞌ mampolihiꞌi. 40Ka kutiꞌikimo topeguruMu hingkeꞌna tokodake tiꞌo ropopolai, angkana hawaꞌi robiaꞌ.”
41Notiꞌi hi Yesu pe toaꞌ to woriꞌ, “Ingkei tuꞌu-tuꞌu toaꞌ to hawaꞌi mepoꞌohi. Haꞌumbo tene komoruene hingkiꞌ moꞌawa-awaꞌA hante ingkei hei sabaraꞌA pe ingkei? Komiꞌi anaꞌ tiꞌo humei!”
42Kolentuꞌana tene anaꞌ tiꞌo matengkaꞌ nolou pe hi Yesu, modungka womo hei mengkakohi moridiꞌ-ridiꞌ. Hi Yesu mokamoroki lomoa tiꞌo, koꞌukoana anaꞌ tiꞌo moꞌoriꞌ. Katoꞌo hi Yesu mampopahuliꞌi pe umoꞌna. 43Lemeniahi lekiꞌ-lekiꞌra toaꞌ to pangkiꞌ komakuasaꞌna Pueꞌ Ala.
Korompihana hi Yesu mampololita womo noniuꞌ ikomahina
(Mat. 17:22-23; Mrk. 9:30-32)
Kolentuꞌara tene toaꞌ to woriꞌ mampolomenea lekiꞌ-lekiꞌna tandaꞌ kuasaꞌ tiꞌo, notiꞌi hi Yesu pe topeguruNa, 44“Ipehoromuakei moromiꞌ-romiꞌ lolitangKa hieꞌe, Anaꞌ Manusiaꞌ hingkiꞌ nipewei pe kuasaꞌna manusiaꞌ.” 45Angkana topeguruNa hawaꞌi robahaꞌ tungkaihane lolitana hi Yesu, alaꞌ tewuni tene palaihane pe iohi. Hawaꞌhi woꞌo podehoꞌ meꞌitano pe Io hapo palaihane lolitaNa.
Himo to kodeꞌ tuwuꞌne?
(Mat. 18:1-5; Mrk. 9:33-37)
46I hampiha tempo, topegurune hi Yesu, mampoheꞌeroi noniuꞌ hihimo ka iohi to meliu kokodeꞌne tuwuꞌna. 47Nobahaꞌ hi Yesu hapo to uwaꞌ i lalira, iomo hinaꞌ noroamo haduo oꞌanaꞌ, Nopopetotiꞌi i hiriNa, 48Honiꞌi Notiꞌikihi, “Himo to mantorimo oꞌanaꞌ hieꞌe alaꞌ Aku, hibalimo woꞌo Aku to notorimo. Hei hihimo to mantorimoꞌA, hibalimo woꞌo mantorimo Pueꞌ Ala to morumbaꞌA humei. Himo to mengkaꞌiwowoiꞌ i lali kotuwuꞌna, iomo to kodeꞌ tuwuꞌna.”
Hihimo to hawaꞌi moꞌewakei, iomo awamio
(Mrk. 9:38-40)
49Notiꞌi hi Yohanes, “Guru, uwaꞌ kiꞌokiꞌ haduo toaꞌ to mampopolai tokodake i lali konaꞌMu, angkana kiꞌopi alaꞌ io handoꞌio tinaꞌ ka ingkiꞌ.”
50Notiꞌi hi Yesu pe hi Yohanes, “Inioꞌ niꞌopiꞌi, alaꞌ hihimo to hawaꞌi moꞌewakei tontonalu io awami.”
ToSamaria hawaꞌhi hiniꞌ mantorimo hi Yesu
51Dodungkumo tempona hi Yesu hingkiꞌ mengkaꞌoreꞌ nolou pe suruga, Io nolou pe Yerusale. 52Norumbaꞌmo haꞌumbora suroNe medulu. Suro-suroNa tiꞌo holampihi i haꞌanu bolaꞌ, bolaꞌna toSamaria, hingkeꞌna mampotimomohi lekiꞌ-lekiꞌna pe hi Yesu. 53Angkana tumpu bolaꞌ tiꞌo hawaꞌhi hiniꞌ mantorimo hi Yesu, alaꞌ robahaꞌ tungkaihane hingkiꞌ nolou pe Yerusale. 54Korobahaꞌnalu hi Yakobus hante hi Yohanes toSamaria hawaꞌhi hiniꞌ mantorimo hi Yesu, iomo hinaꞌ rotiꞌi pe hi Yesu, “Pueꞌ, ane Ileiꞌi, kiperapiꞌ api ka laniꞌ hingkeꞌna molobuꞌihi tumpu bolaꞌ hieꞌe!” 55Angkana hi Yesu mohohiliꞌhi honiꞌi Nokamorokihi. 56Uko tiꞌo noloumohi pe bolaꞌ ntaniꞌna.
Toaꞌ to mangkodokoꞌi mewali topetuntuna hi Yesu
(Mat. 8:19-22)
57Kolentuꞌara matengkaꞌ, uwaꞌ haduo toaꞌ to mampololitaki hi Yesu notiꞌi, “Hingkiꞌ metuntuꞌa pe imbolu koꞌakoaMu!”
58Mehoniꞌ hi Yesu, “Holakuꞌ uwaꞌ pebolaꞌane hei tinti uwaꞌ horana, angkana Anaꞌ Manusiaꞌ hawaꞌi uwaꞌ tambi peꞌohaꞌaNe.” 59Uko tiꞌo notiꞌi hi Yesu pe to haduona, “Metuntuko pe Aku.”
Angkana mehoniꞌ toaꞌ tiꞌo, “Pueꞌ, ane hohumboꞌi nolouꞌa dulu motawu umoꞌku.”
60Notiꞌi hi Yesu, “Potedehimohi to mahi motawu hangko tomahira. Angkana ingko, nolouko mampowute kareba noniuꞌ poparentana Pueꞌ Ala!”
61Uwaꞌ woꞌo haduo to mantiꞌi pe hi Yesu, “Pueꞌ, kulei mpuꞌu metuntu pe Ingko. Ane hohumboꞌi nolouꞌa dulu mesabiꞌ pe halalingku.”
62Notiꞌi hi Yesu, “Toaꞌ to mepongka mopajekoꞌ, hawaꞌi mewali jamane ane mehahiliꞌluꞌi pe tunduna. Hibali woꞌo toaꞌ to mangkodokoꞌi metuntu pe Aku, ane mamponindiluꞌi hapo to nopolihi, hawaꞌi masipatoꞌ mewali topajama i lali poparentana Pueꞌ Ala.”
Currently Selected:
Lukas 9: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
