Yohanes 21
21
Hi Yesu mampopemombaha wotaNa pe topeguruNa to pitu duo
1Uko tiꞌo, hampiha tene hi Yesu mampemombaha wotaNa. Tiꞌo mewali i bota rano Galilea.#21:1 rano Galilea rotiꞌi woꞌo rano Tiberia. Waheꞌe lolitonane: 2Haꞌumbora duohi topeguruNe hirampu itoꞌo, iomo: hi Simo Peturuꞌ, hi Toma to rotiꞌi woꞌo Didimu (Palaihana: Tomororopaꞌ), hi Natanael to ka bolaꞌ Kana i woiꞌ Galilea, anaꞌna hi Sebedeu to roduo hei roduo topeguruNa to ntaniꞌna. 3Notiꞌi hi Simo Peturuꞌ pe iohi, “Hingkiꞌ nolouꞌa mojalaꞌ.”
Rotiꞌi, “Nolouka woꞌo metuntu.” Noloumohi mpuꞌu mehendeꞌhi duanga hei mojalaꞌ i rano. Angkana i lali hamini tiꞌo, hawaꞌhi morasiꞌ howeꞌ hambaꞌa to noroa jalaꞌra.
4Dungku ando, hi Yesu metotiꞌi i bota rano, angkana hawaꞌi robahaꞌ kohiYesuna. 5Nopantiꞌikihi, “Bee, uwaꞌlu bouꞌmio?”
Katoꞌo mehoniꞌhi, “Hawaꞌi uwaꞌ howeꞌ hambaꞌa.”
6Notiꞌi hi Yesu, “Ipelubaꞌkei jalaꞌmi tinaꞌ pe koanana duangami, hingkeꞌna morasiꞌkei.” Katoꞌo ropelubaꞌmo mpuꞌu jalaꞌre, horiana hamboaꞌmo robiaꞌ mohini pe lali duanga, alaꞌ woriꞌ mpololeke bouꞌ to noroa jalaꞌre.
7Notiꞌi topegurune to nopokarima hi Yesu pe hi Peturuꞌ, “Tiꞌo Pueꞌ!” Konohorina hi Peturuꞌ lolitane, mebaduꞌmo#21:7 nopekahikimo baduꞌne (alaꞌ io hawaꞌi mebaduꞌ): I lali adaꞌra toYahudi, hawaꞌhi wadi mometabeꞌ ane hawaꞌhi mebaduꞌ. honiꞌi melihaꞌ pe uwai meloluꞌu nolou pe lorina. 8TopeguruNahi to ntaniꞌna mobohemohi duangara, moruiꞌ jalaꞌ to buhaꞌ bouꞌ nolou pe bota rano. Hawaꞌi moꞌela ka lorina, kira-kira hanatu meteꞌlu. 9Kopehoriralu pe lorina, pangkiꞌhi api to tuwuꞌ itoꞌo, hei i womboꞌ api uwaꞌ bouꞌ hante uwaꞌ woꞌo depa.
10Notiꞌikihi hi Yesu, “Komikei humei ba hamombaꞌa bouꞌ to hongkoꞌ ijalaꞌkei.” 11Hi Simo Peturuꞌ mehendeꞌ pe duanga hei moruiꞌ jalaꞌna pe lorina. Jalaꞌ tiꞌo buhaꞌ hante bouꞌ to kodeꞌ: hanatu limo mpuluꞌ tolu mbaꞌa koworiꞌne. Angkana kehapoꞌi hatoꞌo koworiꞌne, hawaꞌi moheuꞌ jalaꞌ tiꞌo.
12Notiꞌi hi Yesu, “Humeimokei molabiꞌ.” Hawaꞌi uwaꞌ howeꞌ haduo i lumbura topeguruNa to podehoꞌ meꞌitano pe Io, “HihimoKo?” Alaꞌ monontomo i lalira koPueꞌ Yesunamo. 13Noroamo hi Yesu depa hante bouꞌ Nopaꞌnikihi. 14Iomola kotolumpihane Pueꞌ Yesu mampopemombaha wotaNa pe topeguruNahi mepongka ka kotuwuꞌNa huliꞌ.
Hi Yesu mololita hante hi Peturuꞌ
15Koꞌukoralu molabiꞌ, hi Yesu mampololitaki hi Simo Peturuꞌ, “Simo anaꞌna hi Yohanes, ba ipokarimaꞌA meliu ka pepokarimara awamu hieꞌe pe Aku?”
Notiꞌi hi Peturuꞌ, “Tuꞌu, Pueꞌ. Ibahaꞌlu kokupokarimaMa.”
Notiꞌi hi Yesu, “Ane hatoꞌoꞌi, irewahihi anaꞌ gimbangKa.”
16Uko tiꞌo, meꞌitano womo hi Yesu pe hi Peturuꞌ korompihana, “Simo, anaꞌna hi Yohanes, IpokarimaꞌA mpuꞌu?”
Notiꞌi hi Peturuꞌ, “Tuꞌu, Pueꞌ. Ibahaꞌlu kokupokarimaMa.”
Notiꞌi hi Yesu, “Ane hatoꞌoꞌi, ilambaꞌhi gimbangKa.”
17Uko tiꞌo, meꞌitano womo hi Yesu ikotolu mpihana, “Simo, anaꞌna hi Yohanes, tuꞌu ipokarimaꞌA?”
Masusamo laline hi Peturuꞌ, alaꞌ hi Yesu meꞌitano ikotolu mpihana ba nopokarimaꞌi mpuꞌu. Katoꞌo, notiꞌi hi Peturuꞌ, “Pueꞌ, ingkolu topobahaꞌ lekiꞌ-lekiꞌna. Ibahaꞌ kokupokarimaMa.”
Notiꞌi hi Yesu, “Ane hatoꞌoꞌi, irewahihi gimbangKa. 18Tuꞌu mpololeke lolitangKa hieꞌe: i tempomu tene moleaꞌ, pobiaꞌko tene moparewai wotamu hadoduomu, hei matengkaꞌko pe imbolu peleihamu. Angkana ane motodimoko, hingkiꞌ mampeweiko korawemu pe toaꞌ, hingkeꞌna nihiluꞌko hei rokomiko nolou pe peꞌohaꞌa to hawaꞌi ilei.” 19Moliu lolitaNa tiꞌo, hi Yesu mampokononto hohumbo kohingkiꞌ rorokoꞌne hi Peturuꞌ hingkeꞌna konaꞌna Pueꞌ Ala nipokodeꞌ#21:19 Tempona hi Yohanes moꞌukiꞌ suraꞌ hieꞌe, hi Peturuꞌ mahimo nipaku i loti momehulepe. 1 Peturuꞌ 4:14-16. Uko tiꞌo, notiꞌi womo hi Yesu pe hi Peturuꞌ, “Metuntumoko Aku!”
Hi Yesu hante topeguruNa to Nopokarima
20Tempona hi Peturuꞌ mehahiliꞌ pe tunduna, io pangkiꞌ topeguruNa to nopokarima hi Yesu metuntu woꞌo pe iohi. Hampiha, ikohandoaꞌana hi Yesu nihokiꞌ, iomo to mahura i hirina hi Yesu kolentuꞌara mangka i winina hei meꞌitano pe Io, “Pueꞌ, himoreꞌi to hingkiꞌ mampobaluꞌKo?” 21Konoꞌokiꞌna hi Peturuꞌ, nopeꞌitanokimo pe hi Yesu, “Pueꞌ, hapo to hingkiꞌ mewali i awangku hieꞌe?”
22Mehoniꞌ hi Yesu, “Ane Kuleiꞌi hingkeꞌna io tuwuꞌ nturusi wuteꞌA mehupaꞌ i korompihana, hawaꞌi paralu ibahaꞌ! To ibahaꞌ metuntuko i Aku.”
23Mepongka katoꞌo, tekarebamo pe topetuntuna hi Yesu to ntaniꞌna, kohawaꞌne hingkiꞌ mahi topegurune tiꞌo. Hantaro tungkaihane hi Yesu hawaꞌi hatoꞌo, angkana waheꞌe, “Ane Kuleiꞌi hingkeꞌna io tuwuꞌ nturusi wuteꞌA mehupaꞌ i korompihana, hawaꞌi paralu ibahaꞌ!”
24Topeguruna to Nopokarima noꞌokiꞌ mata lekiꞌ-lekiꞌne to mewali hei to mewali sabiꞌNa, Iomo to moꞌukiꞌ suraꞌ hieꞌe. Hei tobahaꞌ kotuꞌune lolita hieꞌe.
Koꞌukoana lolita
25Woriꞌ tene to nowali hi Yesu, angkana ane lekiꞌ-lekiꞌna to Nowali tiꞌo niꞌukiꞌ i lali suraꞌ, kira-kira humanele duniaꞌ hieꞌe hawaꞌi ganaꞌ nipamporiahi suraꞌ tiꞌo.
Currently Selected:
Yohanes 21: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
