Yohanes 19
19
1Uko tiꞌo, Pilatu morumbaꞌmohi surodaduna hingkeꞌna hi Yesu rokomi hei rokohiaꞌ. 2Surodadu-surodadu, mowalimohi haꞌanu totali ka rui, hei ropototalikiꞌi hi Yesu. Uko tiꞌo, Io nibaduꞌi hante juba to mangkoꞌonondowa to hibali jubana datu.#19:2 Lolaꞌ to mangkoꞌonondowa biasa nopakeꞌ datu-datu hante toaꞌ tosugiꞌ 3Momehawa-hawahi metoungkaꞌ i hinaroNa, hei rotiꞌi, “KiꞌadaꞌiKo, datura toYahudi!” Uko tiꞌo, rosampele lioNe.
4Uko tiꞌo, mesuwu womo Pilatu nolou pe howali, Notiꞌikihi toYahudi, “Hingkiꞌ kukomimo humei pe ingkei, hingkeꞌna ibahaꞌkei hawaꞌi uwaꞌ kuhua salaꞌne howeꞌ halangkaꞌ.” 5Uko katoꞌo, rokomimo hi Yesu nolou pe howali, hante metotali rui hei mebaduꞌ juba to mangkoꞌonondowa. Notiꞌi Pilatu, “Elekei toaꞌ hieꞌe!”
6I tempora tutuꞌ-tutuꞌ tadulako mpenomba hei to mampoꞌodaꞌ tambina Pueꞌ Ala pangkiꞌ hi Yesu, moloaꞌ-loaꞌmohi, rotiꞌi, “Nipakumolu i loti momehulepe! Nipakumolu i loti momehulepe!”
Notiꞌi Pilatu, “Ane ikodokoꞌikei mopakuꞌI i loti momehulepe, ikomimokei. Ingkeimolu to hangangaa mopakuꞌI i loti momehulepe, alaꞌ hawaꞌi uwaꞌ kuhua howeꞌ halangkaꞌ salaꞌNe.”
7Rotiꞌi toYahudi, “Ane motuntunika aturana agamangki, hangangaa nihuku mahi, alaꞌ Notiꞌi Io Anaꞌne Pueꞌ Ala.”
8Konohorinalu hi Pilatu, tetambaimo komorokaꞌne. 9Hi Pilatu mekahi womo huliꞌ pe lali, hei noperumbaꞌki hi Yesu nikomi mekahi, honiꞌi meꞌitano womo pe hi Yesu, “Kotuꞌuana, to ka imboKo?” Angkana hi Yesu hawaꞌi mehoniꞌ. 10Notiꞌi womo Pilatu, “HawaꞌKoreꞌi hiniꞌ mohoniꞌa? Hingkeꞌ Ibahaꞌi, aku hieꞌe, uwaꞌ kuasaꞌka mampohenteKo ba mopakuKo i loti momehulepe!”
11Notiꞌi hi Yesu, “Ane hawaꞌko nopaꞌani Pueꞌ Ala kuasaꞌ tiꞌo, hawaꞌko makuasaꞌ i Aku. Iomo horiana, toaꞌ to mampeweiꞌA pe ingko, meliu komadosane ka ingko.”
12Pilatu mampaliꞌ tene lala hingkeꞌna mampohenteꞌi hi Yesu. Angkana mololita womohi toYahudi ropokobue, rotiꞌi, “Ane ipolohoꞌi toaꞌ tiꞌo, hingkiꞌ kirapoꞌko pe Datu ngkodeꞌ!#19:12 Datu ngkodeꞌ iomo Kaisar i kota Roma. I tempo tiꞌo, datu i Roma motiko woiꞌna toYahudi hei woriꞌ woꞌo woiꞌ ntaniꞌna. Hi Yesu tiꞌo mantiꞌi koꞌIona datu, mopalaiha Io moꞌewa Datu ngkodeꞌ!”
13Konohorinalu Pilatu lolitare, io mangkomi hi Yesu nolou pe howali. Uko tiꞌo, mahuramo i pahura pobutusia i peꞌohaꞌa to nikokeneꞌi lobo Watu. I wiharora toYahudi konaꞌna Gabata. 14I tempo tiꞌo, hingkiꞌ pohoꞌandomo, poꞌonina ando Posusaꞌ Pokalintora toYahudi. Pilatu mampatiꞌikihi toYahudi, “Hieꞌemo datumi!”
15Moloaꞌ-loaꞌmohi, rotiꞌi, “Nirokoꞌmo! Nirokoꞌmo! Nipakumo i loti momehulepe!”
Notiꞌi Pilatu, “Ba ileikei mpuꞌu kupopepaku Datumio?”
Rohoniꞌ tutuꞌ-tutuꞌ tadulako mpenomba, “Datu ngkodeꞌlu datungki.” 16Koꞌukoana Pilatu mampeweimo hi Yesu pe iohi hingkeꞌna ropakuꞌI i loti momehulepe. Katoꞌo surodaduna toRoma mangkomimo hi Yesu.
Hi Yesu nipaku i loti momehulepe
(Mat. 27:32-38; Mrk. 15:21-27; Luk. 23:26, 33-43)
17Hi Yesu hadoduoNa mangkowaꞌ loti momehulepe nolou pe howali kota wute i Biri Bangaꞌ Rouꞌ. I wiharo Yahudi, konaꞌna Golgota. 18#Mat. 27:38; Mrk. 15:27Itoꞌo, mopakumohi hi Yesu i loti momehulepe. Uwaꞌ woꞌo roduo toaꞌ ntaniꞌna to nipaku i loti momehulepe moꞌawa hante Io, haduo tinaꞌ i koiriNa, haduo tinaꞌ i kuanaNa.
19Pilatu morumbaꞌ surodaduna mampodokiꞌ hamokuꞌ lobo i loti popakuana hi Yesu. I lobo tiꞌo teꞌukiꞌ: Hi Yesu TONASAREꞌ, DATURA TOYAHUDI. 20Ukiꞌna tiꞌo niꞌukiꞌ i lali tolu langkaꞌ wiharo: wiharo Yahudi, wiharo Roma, hei wiharo Yunani. Woriꞌ toYahudi to mobasa ukiꞌ to uwaꞌ i lobo tiꞌo, alaꞌ popakuana hi Yesu dodungku i kota. 21Katoꞌo, tutuꞌ-tutuꞌ tadulako mpenomba mampatiꞌiki Pilatu, “Inioꞌ niꞌukiꞌ: Datura toYahudi! Aginamo niꞌukiꞌ: ‘Toaꞌ hieꞌe mantiꞌi koꞌIona dature toYahudi.’”
22Notiꞌi Pilatu, “Hapo to kuꞌukiꞌmo, hawaꞌi hingkiꞌ kuwolihi!”
23Koꞌukora surodadu mopaku hi Yesu, baduꞌNa roroamo honiꞌi rodolaꞌ iba, haduo-haduo hampepaꞌ hante jubaNa woꞌo. JubaNa tiꞌo hawaꞌi uwaꞌ rauhane, alaꞌ to nihahaꞌi hingkeꞌna mewaliꞌi hampepaꞌ wida. 24Iomo horiana rotiꞌi surodadu, “Inioꞌ nihepaꞌ-hepaꞌi juba hieꞌe. Aginamo mowaliki pantidoꞌ hingkeꞌna mampokononto himo to moꞌompui.” Tiꞌo mewali hingkeꞌna tebuhoꞌimo hapo to teꞌukiꞌ hampiha i lali Suraꞌ Mangkolehi, to mantiꞌi:
“BaduꞌKu roroa hei rodolaꞌ-dolaꞌ.
To pahua jubangKu ropokononto hante pantidoꞌ.” (Mas. 22:19)
Io horiana, hapo to rowali surodadu tiꞌo, bateꞌna mewali hibali to teꞌukiꞌ hampiha.
Hi Yesu merapiꞌ hingkeꞌna haduo topeguruNa morewahi inoꞌNa
25Dodungku ikonipakuana hi Yesu, metotiꞌimo inoꞌNe hante hineeꞌna inoꞌna hi Yesu towoweꞌe. Uwaꞌ woꞌo hi Maria hantambina hi Kleopas, hei hi Maria toMadalena.#19:25 Hi Maria Magdalena: hi Maria tiꞌo ka bolaꞌ Magdala, iomo horiana rotiꞌi “Hi Maria toMadalena”. 26Konoꞌokiꞌna hi Yesu inoꞌNe metotiꞌi i hirina topeguruNa to Nopokarima, hi Yesu mampatiꞌikiꞌi inoꞌNa, Notiꞌi, “Inoꞌ, tiꞌomo anaꞌma hinewowoꞌena.” 27Hei Notiꞌi womo pe topeguruNa tiꞌo, “Tiꞌomo inoꞌma hinewowoꞌena.” Mepongka katoꞌo, norewahi inoꞌne hi Yesu i tambina.
Komahina hi Yesu
(Mat. 27:45-50; Mrk. 15:33-37; Luk. 23:44-46)
28Nobahaꞌmo hi Yesu koꞌukonemo lekiꞌ-lekiꞌna jamaNa. Katoꞌo Io mantiꞌi, “MangkumaroꞌA,” hingkeꞌna tebuhoꞌi hapo to teꞌukiꞌ i lali Suraꞌ Mangkolehi. 29#Mas. 69:22Itoꞌo, uwaꞌ hasangkiriꞌ anggoroꞌ to moꞌinsu. Uwaꞌhi toaꞌ to nolou moroa hangkoruwua bunga kara, rolomiꞌ i anggoroꞌ tiꞌo honiꞌi ropehopiꞌki i doena daꞌa loti hisop, hei niponodumeki pe omeꞌna hi Yesu. 30#Yoh. 4:34; 17:4Koꞌukona hi Yesu moliomi anggoroꞌ tiꞌo, mololitamo, “Ukomo jamangKa!” Uko tiꞌo, hipotoꞌundumo, hei pudiꞌmo inohaꞌNe.
Surodadu motohu uhuꞌna hi Yesu
31Ando konipakuana hi Yesu i loti tiꞌo mewali i ando popatimomo, poꞌonina ando penombahara toYahudi, hei motuntuni adaꞌra nipalia ane uwaꞌi to mahi to mengkalihohoi i loti momehulepe i ando penombara, hapo tene alaꞌ hingkiꞌ ando Posusaꞌa Pokalintora. Iomo horiana tadulakora toYahudi merapiꞌ pe Pilatu hingkeꞌna to nipakuhi tiꞌo nilehoꞌ kapuꞌre hingkeꞌna hantouꞌhi mahi hei merapiꞌhi woꞌo hingkeꞌna wotalokaꞌra to nipaku nipopengkohou. 32Katoꞌo, noloumohi mpuꞌu surodadu molehoꞌ kapuꞌra to roduo to nipaku i loti moꞌawa hante hi Yesu. 33#Mas. 22:18Angkana Ikohupaꞌralu tiꞌo, roꞌokiꞌ hi Yesu mahimo, iomo horiana hawaꞌi mewali nilehoꞌ kapuꞌNe. 34Angkana haduo surodadu moroa laiꞌ motohu uhuꞌna hi Yesu. Korotohuna tiꞌo, mesuwu raꞌa hante uwai.#19:34 Tandaꞌ komahinamo mpuꞌu hi Yesu.
35Toaꞌ to pangkiꞌ hapo to mewali tiꞌo, io to mewali sabiꞌ, hei nopowutekikei hapo to noꞌokiꞌ, hingkeꞌna mepoꞌohikei woꞌo. Posobiꞌina hieꞌe tuꞌu, hei nobahaꞌ kototuꞌune. 36#Kel. 12:46; Mas. 34:21Tiꞌo mewali hingkeꞌna tebuhoꞌi hapo to teꞌukiꞌ hampiha i lali Suraꞌ Mangkolehi to mantiꞌi, “Hawaꞌi mpuꞌu uwaꞌ howeꞌ hangkaru wukuNe to hingkiꞌ nilehoꞌ” 37#Sak. 12:10–13:9Uwaꞌ woꞌo to teꞌukiꞌ i lali Suraꞌ Mangkolehi to mantiꞌi, “Io to rotohumo hingkiꞌ ronoaꞌ.”
Hi Yesu nitawu
38Tempo tiꞌo, uwaꞌ haduo toaꞌ to nikokeneꞌi hi Yusuf ka bolaꞌ Arimatea. Io mepoꞌohi ngkawowuni pe hi Yesu, alaꞌ motehuꞌi ka tadulakona toYahudi. Ikomahina hi Yesu, hi Yusuf noloumo pe Pilatu mamperapiꞌ wotalokaꞌna hi Yesu hingkeꞌna notawuꞌi. Nopoꞌioꞌmo Pilatu, katoꞌo noloumo hi Yusuf mampopengkohou wotalokaꞌna hi Yesu ka loti momehulepe. 39Uwaꞌ woꞌo haduo toaꞌ to nolou moꞌawa hante hi Yusuf, konaꞌna hi Nikodemu. Hampiha hi Nikodemu tiꞌo to nolou mampohidupaꞌki hi Yesu i halumbu wini. Noloumohi roduo toaꞌ tiꞌo morewahi wotalokaꞌna hi Yesu. I konoloura, hi Nikodemu mangkomi minyaꞌ-minyaꞌ to mewowau to nikokeneꞌi mire hei rampa-rampa gaharu, kira-kira tolu mpuluꞌ kilo komadorine. 40Toaꞌ to roduo tiꞌo moroamohi wotalokaꞌna hi Yesu, roluluni hante wida to popuhiꞌ mpololeke hei malolunu to ukomo rowewui minyaꞌ-minyaꞌ to mewowau hei rampa-rampa motuntuni adaꞌ petawu toYahudi.
41Dodungku ikonipakuaNa hi Yesu, uwaꞌ kineteꞌ loti, hei i lali kineteꞌ tiꞌo uwaꞌ woloꞌ to wolaꞌ tene, handoaꞌi uwaꞌ to nitawu itoꞌo. 42Petowua tiꞌo hawaꞌi moꞌela, hei ando penombaha hingkiꞌ mepongkamo, iomo horiana wotalokaꞌna hi Yesu hangangaa nitawu. Katoꞌo nolouhi moꞌuliꞌ wotalokaꞌna hi Yesu i lali woloꞌ tiꞌo honiꞌi rotutuꞌi hante haꞌanu watu to kodeꞌ.
Currently Selected:
Yohanes 19: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
