Yohanes 17
17
Hi Yesu mampekokaeki topeguruNa
1Koꞌukona hi Yesu mampowute lekiꞌ-lekiꞌna tiꞌo, menoaꞌmo pe laniꞌ hei mekokae, Notiꞌi, “UmoꞌKu, hupaꞌmo tempone nipokodeꞌA. Aku AnaꞌMu ipokodeꞌmoꞌA, hingkeꞌna Aku woꞌo mampokodeꞌKo Umoꞌ. 2IpaꞌanimoꞌA kuasaꞌ motadulakoi lekiꞌ-lekiꞌna toaꞌ, hingkeꞌna toaꞌ to IpaꞌanikiꞌA, hingkiꞌ Kupaꞌanihi woꞌo kotuwuꞌ to wolaꞌ to hawaꞌi mokoꞌukoa. 3To Kutungkai hante lolita ‘Kotuwuꞌ to wolaꞌ to hawaꞌi mokoꞌukoa’ iomo: robahaꞌ koꞌIngkonalu Pueꞌ Ala to tuꞌu, hei robahaꞌ woꞌo koꞌAkuna Yesu Kerisitu to Irumbaꞌ humei. 4Umoꞌ, i lali duniaꞌ hieꞌe Kupomombahamo komanobaꞌMa moliu koKupoꞌukonamo jama to IpaꞌanikiꞌA. 5Umoꞌ, IpomanobaꞌA mahuliꞌ, hibali komanobaꞌKu tempoKu moꞌawa hante Ingko ikohandoaꞌna tene nipopewali duniaꞌ hieꞌe.
6Kuponobahaꞌimohi kohihimoMu, pe toaꞌ to IpaꞌanikiꞌA ka lumbura toaꞌ to hawaꞌi mepoꞌohi pe Ingko. Iohi tiꞌo toaꞌMumohi to IpaꞌanikiꞌA hingkeꞌna Kurewahimohi, hei mampetuntuimohi PohawaꞌMu. 7Hinewowoꞌena robahaꞌmo lekiꞌ-lekiꞌna to IpaꞌanikiꞌA pongkana ka Ingko. 8Kupowutekimohi lekiꞌ-lekiꞌne lolita to IpaꞌanikiꞌA. Lolita tiꞌo rotorimomo, hei hinewowoꞌena robahaꞌmo, koꞌAkuna to ka Ingko Umoꞌ. Ropoꞌohimo koꞌIngkona to morumbaꞌA.
9Kupekokaekihi topetuntuKa tiꞌo. Hawaꞌhi Kupekokaeki lekiꞌ-lekiꞌra toaꞌ i duniaꞌ, bateꞌnalu toaꞌ to IpaꞌanikimoꞌA, alaꞌ iomohi toaꞌMa. 10Lekiꞌ-lekiꞌna toaꞌ to mewali toaꞌKu, toaꞌMumohi woꞌo. Hei lekiꞌ-lekiꞌna toaꞌ to mewali toaꞌMu, toaꞌKumohi woꞌo. Hei komanobaꞌKu mombaha moliu toaꞌKu hieꞌe.
11HumeiꞌA pe Ingko Umoꞌ, hamboaꞌmoꞌA morue i duniaꞌ hieꞌe. Angkana topetuntuKuhi hieꞌe uwaꞌhi tene nturusi i duniaꞌ. O UmoꞌKu to mangkolehi, Ipodaꞌmohi hante kuasaꞌMu to IpaꞌanikiꞌA. Irewahihi hingkeꞌna hampekokirihi nturusi, hibali Ingko hante Aku hampekokiriKi. 12#Mas. 55:13-16; 109:4, 5TempoKu moꞌawa hante iohi, Akumo to mampodaꞌhi hante kuasaꞌMu to IpaꞌanikiꞌA. Kupodaꞌmohi hingkeꞌna hawaꞌhi uwaꞌ to moholi. Angkana uwaꞌ haduo to moholi, to nipokonontomo pahua pehuku, hingkeꞌna tebuhoꞌi hapo to teꞌukiꞌ i lali Suraꞌ Mangkolehi.
13Hinewowoꞌena, hingkiꞌ nolouꞌA pe Ingko. Lekiꞌ-lekiꞌna hieꞌe Kutiꞌikimohi i tempoKu tene moꞌawa-awa hante iohi i duniaꞌ hieꞌe, hingkeꞌna hingkiꞌ buhaꞌ komotanaꞌre to rohua ka Aku. 14Kupowutekimohi lolitaMa, koꞌukoana toaꞌ to hawaꞌi mepoꞌohi mampokoiꞌhi, alaꞌ pekirira topegurungKu hieꞌe hamboaꞌmo hibali hante pekirira. Hibalihi woꞌo Aku, hawaꞌA motuntuni pekirira toaꞌ to i duniaꞌ hieꞌe to hawaꞌi mepoꞌohi. 15Hawaꞌi Kuperapiꞌ hingkeꞌna Iroahi topetuntuKa ka duniaꞌ hieꞌe. PerapiꞌKu hingkeꞌna Ipodaꞌhi ka Belisiꞌ. 16Aku hawaꞌA motuntuni pekirira toaꞌ to hawaꞌi mepoꞌohi, hatoꞌo woꞌo topegurungKa hawaꞌhi motuntuni pekirira. 17Kuperapiꞌ hingkeꞌna Ipohohidamohi mewali toaꞌMu, Ipomangkolehihi moliu i komaniuꞌaMu. Komaniuꞌa tiꞌo iomo BooMu. 18Umoꞌ, IrumbaꞌA humei pe duniaꞌ. Hatoꞌo woꞌo Aku morumbaꞌhi nolou pe toaꞌ ntaniꞌna i duniaꞌ hieꞌe. 19Umoꞌ, Kupeweimo kotuwuꞌKa pe Ingko alaꞌ iohi. Hingkeꞌna iohi woꞌo mampeweihi kotuwuꞌra mewali hawiꞌMu.#17:19 mopalaiha: hingkeꞌna iohi woꞌo mewalihi toaꞌMu i pampetuntuira poturuꞌ to tuꞌu.
20Handoꞌiolu topeguruKu hieꞌe to Kupekokaeki. Kupekokaekihi woꞌo toaꞌ to hingkiꞌ mepoꞌohi pe Aku alaꞌ pampowutera PohawaꞌMu. 21PerapiꞌKu hingkeꞌna iohi lekiꞌ-lekiꞌra mohaꞌanu, hibali Ingko hante Aku mohaꞌanuluKi. Kuperapiꞌ hingkeꞌna iohi woꞌo mohaꞌanu hante Ingkiꞌ horiana lekiꞌ-lekiꞌna toaꞌ i duniaꞌ hingkiꞌ mampoꞌohi koꞌIngkona to morumbaꞌA.
22Kupaꞌanimohi komanobaꞌ to IpaꞌanikiꞌA, hingkeꞌna hingkiꞌ pobahaꞌhi hampekokiri, hibali woꞌo Ingkiꞌ hampekokiriKi, 23Aku mohaꞌanu hante iohi, hei Ingko woꞌo mohaꞌanu hante Aku. Hingkeꞌna iohi hingkiꞌ mewalihi mpuꞌu hampekokiri. Horiana duniaꞌ hingkiꞌ pobahaꞌ koꞌIngkona to morumbaꞌA hei to mampokarimahi hibali Ingko mampokarimaꞌA.
24PeleihangKu hingkeꞌna iohi to IpaꞌanikiꞌA hingkiꞌ meꞌohaꞌ moꞌawa-awa hante Aku i peꞌohaꞌangKu, hingkeꞌna pangkiꞌhi komanobaꞌKu. KomanobaꞌKu tiꞌo IpaꞌanikimoꞌA ikohandoaꞌna tene duniaꞌ hieꞌe nipopewali, alaꞌ IpokarimaꞌA. 25O UmoꞌKu, Ingkomo to mononto. Toaꞌ i duniaꞌ hieꞌe to hawaꞌhi mepoꞌohi pe Ingko, hawaꞌhi pobahaꞌ kohihimoMu. Angkana Aku, KubahaꞌKo. Hei lekiꞌ-lekiꞌna topeguruKu hieꞌe to mepoꞌohi pe Aku pobahaꞌ koꞌIngkona to morumbaꞌA. 26Kuponobahaꞌimohi kohihimoMu, hei bateꞌna hingkiꞌ Kupowutekihi nturusi kohihimoMu, hingkeꞌna iohi mampokarimahi hangko awara hibali hante koꞌIpokarimangKu, hei hingkeꞌna Aku hingkiꞌ uwaꞌA nturusi moꞌawa-awa hante iohi.”
Currently Selected:
Yohanes 17: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
