Pewaliana 33

Hi Akoꞌ modamemohi mahuliꞌ hante hi Esau

1Kopeꞌelenalu hi Akoꞌ pe moꞌela noꞌokiꞌmo hi Esau humei hante toaꞌna iba natu duo. Iomo hinaꞌ anaꞌna nopepaꞌaniki pe hori-hori inoꞌra iomo hi Lea hante hi Raheli hei hawiꞌra roduo. 2Nopopeduluhi hawiꞌne to roduo hiꞌoꞌalu hante anaꞌra honiꞌi mehuntu hi Lea hante anaꞌna hei hi Raheli hante hi Yusuf nopokamurihi. 3Medulumo hi Akoꞌ, kolentuꞌana mokododungkui kokaꞌna, io melingkotuꞌ pitu mpiha. 4Angkana hi Esau mesilai mampedongkoꞌi hi Akoꞌ, nokopui hante noꞌumaꞌ, hei momepeꞌolonimohi. 5Konoꞌokiꞌnalu hi Esau towoweꞌe hante anaꞌ tiꞌo, nopeꞌitanoki, “Himoto to ihirima hieꞌe?” Mehoniꞌ hi Akoꞌno, “Hieꞌemola anaꞌku to noweikiꞌa Pueꞌ Ala nokomi kokodeꞌna rimaNa pe Aku.” 6Uko tiꞌo, noloumohi hawiꞌne towoweꞌe hante anaꞌ-anaꞌnahi ako melingkotuꞌ i hinarona hi Esau. 7Katoꞌo tolou woꞌo hi Lea hante anaꞌra melingkotuꞌ pe io. Hei koꞌukoana hi Yusuf hante hi Raheli. 8Nopeꞌitanoki hi Esau, “Hapo tungkaihama mampokatu harombonga pinatuwuꞌ to kupohidupaꞌki hingkonia?” Mehoniꞌ hi Akoꞌno, “Kokaꞌku to kuꞌadaꞌi, lekiꞌna pinatuwuꞌ tiꞌo, ingkomo tumpune hante kuperapiꞌ hingkeꞌna itorimoꞌa.” 9Angkana notiꞌi hi Esauno, “Woriꞌlu parewangka, hampoliꞌmoꞌa ipaꞌani hapo-hapo.” 10Notiꞌi hi Akoꞌno, “Hako hatoꞌo, alaꞌ ane marimako i aku, iroamo hapo to kupakatu pe ingko, alaꞌ motanaꞌa mpololeke mampohidupaꞌkiko. Ikokuꞌokiꞌna lioma hingkonia, hibaliꞌa pangkiꞌ liona Pueꞌ Ala, alaꞌ itorimomoꞌa moromiꞌ. 11Kuperapiꞌ hingkeꞌna itorimomoꞌi hapo to kupaꞌanikiko, alaꞌ pekarimana Pueꞌ Ala i aku hinaꞌ nopaꞌaniꞌa langkaꞌ-langkaꞌna to kuparaluꞌi i kotuwuꞌku.” Hi Akoꞌ mampenonohoꞌi hi Esau hingkeꞌna notorimomoꞌi hapo to nopaꞌaniki tiꞌo, wute notorimo. 12Uko tiꞌo, notiꞌi hi Esauno, “Mantimomokei hingkiꞌ noloumoki. Aku to hingkiꞌ mampoꞌowonikei.” 13Mehoniꞌ hi Akoꞌno, “Ibahaꞌlu komaꞌeleꞌki alaꞌ mangkomika oꞌanaꞌ to handoaꞌi pobiaꞌ matengkaꞌ, hante uwaꞌ woꞌo pinatuwuꞌ to hongkoꞌ moꞌanaꞌ. Ane kipasimukuꞌi matengkaꞌ mahihi intu. 14Agina medulumoko, metuntu romoka kamuri motuntuni patengkaꞌna pinatuwuꞌ hante anaꞌkihi. Hidupaꞌluki intu i woiꞌ Sei.” 15Notiꞌi hi Esauno, “Ane hatoꞌoꞌi, kupaꞌanikei bahaꞌumbo duo hawiꞌku mampoꞌowonikei matengkaꞌ.” Angkana hi Akoꞌ mantiꞌi, “Hampoliꞌmo alaꞌ ipokarimamoꞌa.” 16Katoꞌo uko tiꞌo, molaimo hi Esau mahuliꞌ pe woiꞌ Sei iomo Edom. 17Angkana hi Akoꞌ noloumo pe bolaꞌ Suko, itoꞌo moꞌaro tambi hante bambaruꞌ pekoluloana pinatuwuꞌ. Io horiana bolaꞌ tiꞌo nikokeneꞌi, “Suko”. 18Katoꞌo hi Akoꞌ mewotumo ka Pada-Aram pe kota Sike woiꞌ Kanaꞌa. Katoꞌo mobambaruꞌhi i tinaꞌ motoꞌando kota tiꞌo. 19Popada to nopebolaꞌi tiꞌo nohili ka anaꞌ-anaꞌna hi Hemor, umoꞌna hi Sike, hilina hanatu doiꞌ peraꞌ. 20Itoꞌo hi Akoꞌ moꞌaro haꞌanu bambaruꞌ potutua popenomba, honiꞌi nokokeneꞌi, “Pueꞌ Ala, Pueꞌra toSaraeli.”

Currently Selected:

Pewaliana 33: LAILJE

Highlight

Copy