Pewaliana 23
23
Hi Burahima mehili woiꞌ nopetawui hi Sara
1Ganaꞌmo tinuwuꞌne hi Sara 127 ntoꞌa, 2honiꞌi mahi i bolaꞌ Kiriat-Arba to nitiꞌi woꞌo Hebron i woiꞌ Kanaꞌa. Handondoiha laline hi Burahima mampeꞌoloni komahina hantambina. 3Uko tiꞌo nopolihi hangkaꞌ hantambine to kolentuꞌana nipowata, nolou pe toHet tumpu woiꞌ tiꞌo, 4notiꞌi, “Aku hieꞌe topehupaꞌluꞌa meꞌohaꞌ i lumbu-lumbumi. Ane hohumboꞌi kuperapiꞌ hingkeꞌna ipaꞌaniꞌakei mehili halimboꞌ woiꞌ kupotawui hantambingku.” 5Mehoniꞌhi rotiꞌi, 6“Uweꞌ, kiꞌadaꞌiko alaꞌ ingkolu haduo tadulako to maroho i iliꞌki, mewaliꞌ, motanaꞌ lalingki ane moꞌuwiꞌko halimboꞌ to moromiꞌ i woiꞌki to ipetawui hantambimu. Ingka motanaꞌka mampatimomo petowuana hantambimu.” 7Uko tiꞌo melingkotuꞌ hi Burahima i hinarora toHet, tumpu woiꞌ honiꞌi notiꞌi, 8“Ane ipoꞌioꞌlukei perapiꞌka, hantambingku hingkiꞌ kutawu iseꞌe. Kuperapiꞌ sulungi iperapiꞌkiꞌa pe hi Epron, anaꞌna hi Sohar. 9Hingkeꞌna nopaꞌanikiꞌa kuhili haꞌanu woloꞌ watu i Mapela to uwaꞌ i bota kineteꞌna. Hilina woiꞌ tiꞌo hingkiꞌ kubaiari hampihalao i hinaromi hingkeꞌna mewali woiꞌku to kipotawui.” 10Tempo tiꞌo, hi Epron to kolentuꞌana mahura moꞌawa hante toHet dodungku i wambaꞌ bente kota, mohoniꞌ hi Burahima i hinarora notiꞌi, 11“Uweꞌ hampoliꞌmo ihili woiꞌ tiꞌo alaꞌ kineteꞌku hei woloꞌ watu to uwaꞌ itoꞌo kupepaꞌaniki pe ingko hingkeꞌna ipotawuiꞌi hantambimu. Tinongku iseꞌe to mewali sabiꞌ” 12Katoꞌo hi Burahima melingkotuꞌ i hinarona toHethi, 13honiꞌi notiꞌi pe hi Epron, “Kuperapiꞌ hingkeꞌna ipehoromuakei lolitangka hieꞌe. Hingkiꞌ kubaiari hiline kineteꞌmu, kuperapiꞌ hangangaa itorimo hiline, hingkeꞌna hantambingku kutawu itoꞌo.” 14Mehoniꞌ hi Epron, 15“Uweꞌ, halimboꞌ woiꞌ tiꞌo iba natulu doiꞌ peraꞌ hiline. Hapo dumbuꞌne doiꞌ tiꞌo i ingkiꞌ roduo? Itawumo itoꞌo hantambima.” 16Hi Burahima mampoꞌioꞌ hilina, noꞌihaꞌmo koworiꞌne doiꞌna hintotoꞌ hante pantiꞌina hi Epron, iomo iba natu doiꞌ peraꞌ, doiꞌ tiꞌo niꞌihaꞌ i timbanga to nopakeꞌ topobaluꞌ-baluꞌ, honiꞌi nobaiarimo pe hi Epron i hinarona lekiꞌ-lekiꞌna toHet to uwaꞌ itoꞌo. 17Watoꞌomola woiꞌne hi Epron i Mapela to tinaꞌ i motoꞌando i Mambre mewalimo dolaꞌna hi Burahima woiꞌ tiꞌo tekahi kineteꞌ, woloꞌ watu hante lekiꞌ-lekiꞌna loti to uwaꞌ itoꞌo, nipaꞌaniki hi Burahima. 18Lekiꞌ-lekiꞌna toHet to dodungku i wambaꞌ bente kota, mosobiꞌi konohilinamo hi Burahima woiꞌ tiꞌo. 19Katoꞌo notawumo hi Burahima hi Sara hantambine i lali woloꞌ watu Mapela i woiꞌ Kanaꞌa. 20Hatoꞌo lolitonane kineteꞌ hei woloꞌ watu Mapela. Uluꞌna woiꞌ tiꞌo, woiꞌna toHethi, angkana mewalimo dolaꞌna hi Burahima, mewali woiꞌ petowuara.
Currently Selected:
Pewaliana 23: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
