Pewaliana 20

Hi Burahima hante hi Abimeleꞌ

1Katoꞌo hi Burahima molai ka woiꞌ Mamre pe woiꞌ Negeꞌ hei io lebaꞌ i lumbuna woiꞌ Kadesi hante Sur. Io meꞌohaꞌ i Gera, mewali toaꞌ to mehupaꞌ. 2Inoꞌo hi Burahima mantiꞌi hi Sara halalinalu, koꞌukoana hi Abimeleꞌ, datu i woiꞌ Gera, morumbaꞌ toaꞌ ako moroa hi Sara. 3I tempo wini Pueꞌ Ala mehupaꞌ pe hi Abimeleꞌ i lali pepototuruna hei mantiꞌi pe io, “Ingko hangangaa mahiko alaꞌ moroako towoweꞌe tiꞌo to momaꞌanimo.” 4Hi Abimeleꞌ mololita, “Hi Sara handoaꞌi kupogauꞌ, aku hieꞌe handoaꞌa masipatoꞌ Irokoꞌ Pueꞌ hante roboꞌku. 5Maꞌanina hadoduona to mantiꞌi pe aku, towoweꞌe tiꞌo halalinalu, hante towoweꞌe tiꞌo hadoduona mantiꞌi, hi Burahima halalina, mewaliꞌ noniuꞌ hieꞌe kuwali hante kopopuhiꞌna lalingku.” 6Katoꞌo mohawaꞌmo Pueꞌ Ala pe io i lali pepototuruna, “Kubahaꞌlu woꞌo, ingko mowalimoko i lali to mononto, io horiana Kuꞌopimoko mowali to kodake i hinarongKu, alaꞌ tiꞌo hawaꞌko Kuleinaki mangkododungkuiꞌi. 7Mewaliꞌ hinewowoꞌena, ipopahuliꞌmo hantambine toaꞌ tiꞌo, alaꞌ io haduo nabi, io hingkiꞌ mampekokaekiko, hingkeꞌna ingko tontoko tuwuꞌ, angkana ane hawaꞌi ipopahuliꞌ, ibahaꞌmo, ingko hangangaa mahiko, ingko hante lekiꞌna toaꞌ to moꞌawa-awa hante ingko.”

8Ikonokoꞌondoina, hi Abimeleꞌ meꞌaro hampihoꞌolu mowowoi lekiꞌna hawiꞌna hei mampetiꞌiki lekiꞌna hapo to mewali tiꞌo pe iohi, katoꞌo monono kopotehuꞌre. 9Katoꞌo hi Abimeleꞌ mowowoi hi Burahima hei mololita pe io, “Walia haporeꞌi to ipoꞌintuꞌa hieꞌe pe ingka, hei komasalaꞌ haporeꞌi to kuwali pe ingko, horiana ingko mampopehupaꞌko kohorewuꞌ pe aku hei pe kodatuangku? Ingko mowaliko hapo-hapo to hawaꞌi masipatoꞌ pe aku.” 10Notiꞌi womo hi Abimeleꞌ pe hi Burahima, “Haporeꞌi palaihane, hinaꞌ ingko mowaliko hibali hieꞌe?” 11Katoꞌo hi Burahima mantiꞌi, “Kupekiri toaꞌ-toaꞌ to iseꞌe hawaꞌi motehuꞌ pe Pueꞌ Ala, horiana uwaꞌ intu to morokoꞌa alaꞌ mangkodokoꞌihi hantambiku. 12Kotuꞌuana io umbiꞌ halalingku, haꞌoꞌumoꞌka, hori inoꞌ, angkana ikomodindiangki io mewalimo hantambingku. 13I tempona Pueꞌ Ala morumbaꞌa kopeꞌimbo-imboangku molai ka tambina umoꞌku, kutiꞌiki hantambingku, itidoꞌkimoꞌa rimama pe aku, iomo, ipetiꞌikimolu i umbo-umbo kohupaꞌanta, ingko halalingkuko.” 14Katoꞌo hi Abimeleꞌ mampopahuliꞌ hi Sara pe hi Burahima, hei io moroa woꞌo bekeꞌ gimba hante gapiꞌ, hante hawiꞌna woꞌo tomaꞌani hei towoweꞌe, nopepaꞌaniki lekiꞌna tiꞌo pe hi Burahima. 15Hei hi Abimeleꞌ mantiꞌi, “Woiꞌ peꞌohaꞌangku hieꞌe kupalenaꞌkiko, iꞌuwiꞌmo i umbo to ilei itoꞌomoko meꞌohaꞌ.” 16Katoꞌo notiꞌi hi Abimeleꞌ pe hi Sara, “Kupepaꞌanikimo pe hi Burahima halalimu hasabu doiꞌ peraꞌ, pepaꞌani tiꞌo mewali komombahana i lekiꞌna toaꞌ kotama masalaꞌ.” 17Katoꞌo hi Burahima mekokae pe Pueꞌ Ala, hei Pueꞌ Ala mampokoꞌoriꞌ hi Abimeleꞌ hante hantambina, hei hawiꞌ-hawiꞌna towoweꞌe, horiana iohi moꞌanaꞌ. 18Alaꞌ hingkonia Pueꞌ Ala motutuꞌi bolaꞌ anaꞌra duo-duona towoweꞌe i kodatuana hi Abimeleꞌ alaꞌ hi Sara, hantambina hi Burahima tiꞌo.

Currently Selected:

Pewaliana 20: LAILJE

Highlight

Copy