Suro 3
3
Hi Peturuꞌ hante hi Yohanes mampokoꞌoriꞌ haduo tokohu
1I hampiha tempo, tenteꞌ tolu kononewa, hi Peturuꞌ hante hi Yohanes nolouhi pe Tambina Pueꞌ Ala, i tempora toYahudi mekokae. 2I wambaꞌ to rokokeneꞌi, “Wambaꞌ Manobaꞌ,” uwaꞌ haduo tomaꞌani to kohumo ka konipoꞌanaꞌkina. Ando-ando toaꞌ tiꞌo rokomi nolou mahura i wambaꞌ tiꞌo, hingkeꞌna merapiꞌ-rapiꞌi pe toaꞌ to mekahi pe Tambina Pueꞌ Ala. 3Ikopangkiꞌnalu hi Peturuꞌ hante hi Yohanes hingkiꞌ mekahi, liu-liu merapiꞌ-rapiꞌ pe iohi. 4Hi Peturuꞌ hante hi Yohanes mampenotoꞌ tokohu tiꞌo, honiꞌi notiꞌi hi Peturuꞌ pe io, “Eleꞌi humei!” 5Nopomoꞌoꞌelemo mpuꞌu nturusi, alaꞌ notiꞌiae hingkiꞌ nipaꞌaniꞌi doiꞌ. 6Angkana notiꞌi hi Peturuꞌ, “Hawaꞌi uwaꞌ bulawangki hante peraꞌki, angkana hieꞌelu to kipaꞌanikiko: i lali konaꞌna Yesu Kerisitu toNasareꞌ, matengkaꞌmoko!” 7Honiꞌi notiko korawe kuanane tokohu tiꞌo hei nopopetotiꞌi. Kaliuꞌ maroho kapuꞌne. 8Io melihaꞌ, metotiꞌi, honiꞌi matengkaꞌ nolou humei. Katoꞌo metuntumo pe hi Peturuꞌ hante hi Yohanes, mekahi i lali Tambina Pueꞌ Ala moꞌawa hante iohi, matengkaꞌ hei motaroꞌ-taroꞌ mampokodeꞌ Pueꞌ Ala. 9Woriꞌ toaꞌ pangkiꞌ io matengkaꞌmo hei mampokodeꞌ Pueꞌ Ala. 10Hokohi mpuꞌu toaꞌ to pangkiꞌ hapo to mewali tiꞌo, alaꞌ robahaꞌi toaꞌ tiꞌo iomo tokohu to merapiꞌ-rapiꞌlu rima ando-ando mahura i Wambaꞌ Manobaꞌ i Tambina Pueꞌ Ala.
Potunturakana hi Peturuꞌ i lali Tambina Pueꞌ Ala
11Tokohu tiꞌo metuntumo nturusi pe hi Peturuꞌ hante pe hi Yohanes. Kohupaꞌra i tangkoꞌna Tambina Pueꞌ Ala to rokokeneꞌi Tangkoꞌ Salomo, woriꞌ toaꞌ to mehupaꞌ mampeꞌeleꞌi, alaꞌ ropoheleꞌi. 12Konoꞌokiꞌna hi Peturuꞌ toaꞌ to woriꞌ tiꞌo, nopantiꞌikihi, “Halalingku toSareili! Mahamporeꞌi hinaꞌ ipohokokei hapo to iꞌokiꞌkei hieꞌe? Mahamporeꞌi hinaꞌ ipomoꞌoꞌeleka hei ipenotoꞌka nturusi? Ba itiꞌikeireꞌi, toaꞌ hieꞌe matengkaꞌ alaꞌ uwaꞌ kuasaꞌki, ba komoromiꞌna lalingki? Hawaꞌi! 13Pueꞌ Ala to ropenombai uweꞌta hampiha, to ropenombai hi Burahima, hi Isaki hante hi Akoꞌ, Pueꞌ Ala tiꞌo to mampokodeꞌmo HawiꞌNa, iomo hi Yesu. Hi Yesu tiꞌo to nipewei pe to mepohawiꞌ, hei to nisapuakamo i hinarona hi Pilatu kehapoꞌi pahuana hi Pilatu Io hangangaa nipolohoꞌ. 14Io mangkolehi hei moromiꞌ laliNe, angkana iparukulukei hingkeꞌna hi Pilatu mampolohoꞌ pe ingkei haduo to merorokoꞌ. 15Hi Yesu tiꞌo to mepaꞌani kotuwuꞌ to wolaꞌ pe lekiꞌna toaꞌ. Kehapoꞌi watoꞌo bateꞌna irokoꞌlukei, angkana Pueꞌ Ala mampotuwuꞌI huliꞌ ka komahia. Ingka hieꞌe sabiꞌNa to pangkiꞌ kotuwuꞌna huliꞌ hi Yesu. 16Kuasaꞌna hi Yesu, iomo to mampokaroho kapuꞌna tokohu hieꞌe. Mewaliꞌ, hapo to mewali, iꞌokiꞌkei hante isobiꞌikei, tiꞌo mewali alaꞌ pepoꞌohingki pe kuasaꞌna hi Yesu. Iomo hinaꞌ toaꞌ tokohu hieꞌe moꞌoriꞌ.
17Halali-halali, kibahaꞌ hapo to iwalimokei hante tadulakomi pe hi Yesu. Iwalikei tiꞌo ala hawaꞌkei ibahaꞌ hapo palaihane. 18Angkana kehapoꞌi watoꞌo, ka walia to iwalikei tiꞌo, mampobuhoꞌimo hapo to notiꞌi Pueꞌ Ala hampiha to ropowute lekiꞌ-lekiꞌna nabiNa to mantiꞌi: Datu Topohompoꞌ hangangaa mampolala komaporiꞌ. 19Halali-halali, mengkatobaꞌmokei hei mahuliꞌmokei pe Pueꞌ Ala, hingkeꞌna dosami Noꞌampuni. 20Hingkeꞌna Pueꞌ Ala mampaꞌanikei komaroho lali hei Io morumbaꞌ hi Yesu pe ingkei, alaꞌ Io to Nopokononto mewali Datu Topohompoꞌ. 21Pueꞌ Yesu uwaꞌ i suruga wute tempona Pueꞌ Ala mowali lekiꞌna mewali wolaꞌ hibali to notiꞌimo Pueꞌ Ala moliu i nabi-nabiNa to Norumbaꞌ i tempo hampiha.
22Hampiha notiꞌi nabi Musa noniuꞌ Pueꞌ Yesu to mantiꞌi waheꞌe:
‘Pueꞌ Ala hingkiꞌ mohini haduo ka halalimi
mewali nabi hibobali hante aku.
Hangangaa ipetuntuikei hapo to notiꞌikikei nabi tiꞌo.
23Himolu to hawaꞌi motuntuni hapo to notiꞌi nabi tiꞌo,
io hingkiꞌ nipohohida ka lumbuna toaꞌna Pueꞌ Ala,
hei nirokoꞌ.’ (Ul. 18:15, 18, 19; Im. 23:29)
24Nabi-nabi to hampiha to mampowutemo lolitana Pueꞌ Ala, mepongka ka nabi Semuel wute i nabi-nabi ntaniꞌna to mehuntuna, lekiꞌ-lekiꞌra mampowute hapo to mewali i tempo hinewowoꞌena. 25Hampiha Pueꞌ Ala mantiꞌi pe hi Burahima waheꞌe:
‘Ka muleꞌmu,
lekiꞌ-lekiꞌna hingkiꞌ pahua pebarakati.’ (Pwl. 22:18)
Halali-halali, ingkei woꞌo pahuakei pebarakati tiꞌo to nodandimo Pueꞌ Ala pe tododulunta hampiha. 26Iomo horiana Pueꞌ Ala moꞌuwiꞌ hi Yesu hawiꞌNa hei morumbaꞌ mehupaꞌ medulu pe ingkei hingkeꞌna Nobarakatikei hori-hori hingkeꞌna mengkatobaꞌkei ka kotuwuꞌmi to kodake.”
Currently Selected:
Suro 3: LAILJE
Highlight
Share
Copy

Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)