MARKUS 3

Tau to namate palena sabingga nipakabelo Yesus ri Eo Mpenonto

Mat. 12:9-14; Luk. 6:6-11

1Pade nesua wo'umo Yesus ri sapo mpodade. Ri setu naria samba'a tau to namate palena sabingga. 2Bara sakuya mba'a tau to Parisi ri setu nompariara mpakabelo-belo nanggita ane Yesus mompakabelo tau etu ri Eo Mpenonto ala ira mamala mompakasala I'a. 3Nangulimo Yesus ka tau to namate palena etu, “Kamai pekanggoremo ri tatongona ri se'i!” 4Pade nekutanamo Yesus ka tau-tau to Parisi ri setu, “Nantuki Atura-atura agamata nuapa to nipaloga ka kita ri Eo Mpenonto, mowia to nabelona atau to naja'ana? Mompakasalama tau atau mompatesi tau?” Tapi ira aga nekalino da'a nenjui. 5Yesus nanggita ira ntalili. Nasusa bo naraumo rarana sabana da'a naasi mata ira nanggita tau to namate palena. Pade nangulimo I'a ka tau etu, “Ojomo palemu!” Tau etu nangojo palena, pade kaliu-liu nabelo balimo palena etu. 6Naopu etu nesuwumo tau-tau to Parisi nggari sapo mpodade etu pade kaliu-liu ira nalau nolibu ante topantuki-topantuki Magau Herodes mangelo jala ala ira mamala mompatesi Yesus.

Nadea tau nantuki Yesus sabana naria kuasana mompakabelo tau-tau naju'a

7Pade nalaumo Yesus ante topantuki-topantuki I'a mpaka ri Rano Galilea. Nadea mpu'u tau nggari Bagia Galilea nantuki ira mpaka gusa'a. Nadea wo'u ira to narata nggari Bagia Yudea, 8nggari ngata Yerusalem, nggari Bagia Idumea, nggari sambote Binangga Yordan, pade nggari bagia namosu ngata Tirus bo Sidon. Ira pura-pura narata ri ja'i Yesus sabana nangepe lele to nantesa pura-pura nuapa to nipowiana. 9Nadea mpu'u tau to nasiromu ri setu sampe Yesus nompakau topantuki-topantuki I'a mompakasadia saongu sakaya ka I'a ala ne'e sampe I'a rarumpa ira. 10Etu najadi sabana nadea mpu'u tau naju'a nipakabelona bopia sampe pura-pura tau naju'a nosiaso-aso mompasimbuku mompakamosu I'a ala ira mamala manggabe I'a. 11Tempo tau-tau to nipesua seta nanggita Yesus, nekadedemo ira ri ngayona ante nongare-ngare, “Komimo Ana nu Alatala!”

12Tapi Yesus nombatagi seta-seta etu ala ne'e motesa isema kakonona I'a.

Yesus nompelisi sampulu romba'a anaguruna

Mat. 10:1-4; Luk. 6:12-16

13Naopu etu nantendemo Yesus mpaka ri saongu bulu, pade nipokiona ri ja'ina isema tau to nipodotana. Tau to nipokiona etu narata puramo ri ja'ina, 14pade nipelisina nggari tatongo ira sampulu romba'a tau momporoa I'a riara bagona. Ira nipelisina ala rapakauna malau mompatolele Kareba Belo, 15pade ala ira mamala rawai kuasa mompopalai seta-seta. 16Sanga ira sampulu romba'a to nipelisina etumo: i Simon to nidaena wo'u i Petrus, 17Yakobus ana i Zebedeus bo tua'ina Yohanes. Ira romba'a nidaena Boanerges, to naria batuana “Ana Guntu.” 18Naria wo'u Andreas, i Filipus, i Bartolomeus, i Matius, i Tomas, Yakobus ana Alfeus, i Tadeus, i Simon to Zelote, 19pade Yudas Iskariot to mompobalu I'a.

Guru-guru agama nanguli Yesus nompopalai seta ante kuasa nggari Magau nu Seta

Mat. 12:22-32; Luk. 11:14-23, 12:10

20Naopu etu nesuamo Yesus raranjapo, pade narata wo'umo tau dea ri ja'ina sampe I'a ante anaguru-anaguruna da'a ntoto naria loga manggoni. 21Tempo etu naria tau nanguli, “Nabayamo I'a!” Jadi sangga nangepe tesa etu naratamo indona bo sampesuwu-sampesuwuna ala mangala I'a matingguli ri sapo ira.

22Nangulimo guru-guru agama to narata nggari ngata Yerusalem, “I'a nipesua i Beelzebul, Magau nu Seta. Ante kuasa nggari ja'i Tadulako nu seta etu I'a nompopalai seta nggari ja'i ntau!”

23Nangepe etu Yesus nompokio guru-guru agama etu pade I'a notesa ka ira ante porapa iwe'i: “Natantumo Magau nu Seta da'a madota mompopalai roana. 24Rapana maria samba'a magau pade todea riara poparentana aga matibagi-bagi pade mosipobali, natantumo poparentana etu kana magero. 25Pade ane tau sanjapo matibagi-bagi pade mosipobali, natantumo ira kana magaro mosimpotatare. 26Iwetu wo'u ante Magau nu Seta. Ane i'a mangewa roana pade ira matibagi-bagi, natantumo poparentana da'a maroo. Mana masaeka magero.

27Da'a ria tau namala mesua riara njapo ntau to narosona ala mangago mbara-mbarana ane da'a ratipunggu ntani pue njapo to naroso etu. Ane iwetu i'a mamala mangago pura-pura isi njapona. #3:27 Riara porapa e'i Magau nu Seta nirapaka ewa pue njapo to narosona.

28Aku mpu'u-mpu'u notesa ka komi, mpengele-ngele silaka manusia bo tesa-tesa nanguli sinja'i namala raampungi. 29Tapi isema-sema nanguli sinja'i Nosa Nagasa nu Alatala da'a ntoto mamala raampungi. Silaka ira etu da'a ria ampuna sampe ri kasae-saena.” 30Yesus nanguli iwetu sabana naria tau nanguli I'a nipesua seta.

Tau-tau to nompowia dota Alatala nireke indo bo sampesuwu Yesus

Mat. 12:46-50; Luk. 8:19-21

31Naopu etu naratamo indo bo sampesuwu-sampesuwu Yesus. Narata ri setu nenggoremo ira ri sawalikuna pade nompakau tau mompokio Yesus momai mpaka ri ja'i ira. 32Tempo etu nadea tau nekatoko nantalili Yesus. Ira nanguli ka I'a, “Kitamo, naria indomu bo sampesuwu-sampesuwumu ri sawalikuna. Ira madota mosirata ka Komi.”

33Nesonomo Yesus ka ira, “Isema indoku bo sampesuwuku?” 34I'a nanggita ira pura-pura to nekatoko nantalili I'a, pade niulina, “E'i puramo indoku bo sampesuwu-sampesuwuku. 35Sabana isema-sema to nompowia dota Alatala, ira etumo nireke indoku bo sampesuwuku.”

Currently Selected:

MARKUS 3: KZF

Highlight

Copy