MATIUS 5
5
PEPATUDUKI YESUS RI BUNGGU NU BULU (Pasal 5-7)
Nasana mpu'u tau-tau to nantuki dota Alatala
Luk. 6:20-23
1Tempo Yesus nanggita tau dea etu, nantendemo I'a mpaka ri saongu bulu. Naopu I'a nekatoko ri setu naratamo topantuki-topantuki I'a ri ja'ina. 2Pade nompamulamo I'a nompatuduki ira. Niulina,
3“Nasana mpu'umo tau-tau aga netidombo ri ja'i Pue Alatala,
sabana iramo to majadi todea riara Poparenta nu Alatala.
4Nasana mpu'umo tau-tau to nasusa rara,
sabana iramo to rapakawoe rarana.
5Nasana mpu'umo tau-tau to naede rara,
sabana iramo to mantarima pura-pura nuapa to nijanji Alatala.
6Nasana mpu'umo tau-tau to mpu'u-mpu'u madota mowia dota Alatala,
sabana iramo to rawai ka pompakule mowia to nipodota ira etu.
7Nasana mpu'umo tau-tau to naasi matana nanggita roana,
sabana iramo to rapoasi mata nu Alatala.
8Nasana mpu'umo tau-tau to nagasa rarana,
sabana iramo to manggita Alatala.
9Nasana mpu'umo tau-tau to nompoposinggabelo roana,
sabana iramo to rauli ana-ana nu Alatala.
10Nasana mpu'umo tau-tau to rapandasa sabana madota mowia dota Alatala,
sabana iramo to majadi todea riara Poparenta nu Alatala.
11Nasana mpu'umo komi ane komi rasalaraka ntau atau rapandasa bara rauli sinja'i ntau sabana komi topomparasaya Aku. 12Iwetu wo'u nipowia ntotu'a ira ka nabi-nabi nggaolu. Jadi pakadambamo raramu ane etu majadi ri ja'imu sabana nadea mpu'u rasi to nipakasadia ka komi ri suruga.”
Topomparasaya Yesus nipakasimbayu ewa gara bo reme
Mrk. 9:50; Luk. 14:34-35
13“Komimo gara nu dunia. Tapi ane gara majadi nameli natantu da'a namala rapakapaga bali. Gara etu mana ria gunana, aga ratajiaka pade ralonggo-longgo ntau.
14Komimo reme nu dunia. Ngata ri bunggu nu bulu da'a namala ratabuniaka. 15Iwetu wo'u da'a ria poindo nitunju ntau pade niladuna ante tonda. Tapi poindo etu kana rabolina ri kalangana sampe pura-pura tau raranjapo rawanta remena. 16Iwetu wo'u reme to naria riara nta'i komi kana rapopokita ka tau ntanina ala ira mamala manggita pokainggumu to nabelona pade mantoiya Umamu ri suruga.”
Pepatuduki Yesus ewa Atura-atura agama Yahudi
17“Ne'e rapekiri komi Aku e'i narata mompakalipo Atura-atura agama bo pepatuduki nabi-nabi. Karataku e'i da'a mompakalipo Atura-atura bo pepatuduki etu, tapi aga mompakanoto batuana to nakonona. 18Aku mpu'u-mpu'u notesa ka komi, ane damaria langi bo dunia, da'a ntoto maria sambela nggari Atura-atura etu malipo, nau aga saongu huruf to neliu nggakedi bara saongu titik. Pura-pura Atura etu kana madupa. 19Jadi isema-sema to nombaliunaka saongu parenta riara Atura-atura etu nau aga parenta to neliu nggakedina pade nompatuduki tau ntanina mompasiala pokaingguna etu, i'a kana majadi tau to neliu nggaede katuwuna riara Poparenta nu Alatala. Tapi isema-sema to natundu riara Atura-atura etu pade nompatuduki tau ntanina wo'u matundu riarana, tau etumo kana majadi tau to nalanga katuwuna riara Poparenta nu Alatala. 20Sabana kuuli ka komi, ane pokainggumu da'a meliu ngganoa nggari pokainggu guru-guru agama bo tau-tau to Parisi natantumo komi da'a ntoto mamala majadi todea riara Poparenta nu Alatala.”
Pepatuduki Yesus ewa rau rara
Luk. 12:57-59
21“Natantu niepe komimo parenta to nitesa ka totu'ata nggaolu iwe'i: ‘Ne'e mepatesi! Isema-sema mepatesi kana rasuku.’ #5:21 Kel. 20:13, Ul. 5:17 22Tapi kuuli ka komi, isema-sema narau rara ri ja'i sampesuwuna kana rasuku. Isema-sema nanguli sinja'i sampesuwuna kana rakeni ri ngayo Ntopolibu Bete Agama Yahudi. Pade isema-sema nanguli sampesuwuna todoyo kana ratajiaka riara apu naraka.
23Sabana etu ane komi malau manggeni pesombamu ka Alatala ri meja mpesomba pade matitora komi ka sampesuwumu to naju'a rarana ri ja'imu, 24palasi ntanimo ruru pesombamu etu ri ngayo meja mpesomba. Pade patinggulimo komi mpaka ri ja'ina mosinggabelo bali ante i'a. Ane maopupa etu kalaumo komi mombawai pesombamu ka Alatala.
25Ane komi malau ratangara ri ja'i ntopotangara, komi kana masasinta mosinggabelo bali ante balimu ri santongo jala. Sabana ane komi da'a mosinggabelo ante i'a, natantumo balimu etu kana mompakasala komi ri ja'i ntopotangara, pade topotangara etu kana mombawai komi riara mpale polisi, pade polisi etu kana mombasuaraka komi riara tarunggu. 26Aku mpu'u-mpu'u notesa ka komi, natantumo komi da'a ntoto mamala rakabasaka nggariara tarunggu etu ane pura-pura salamu da'a mubayari.”
Pepatuduki Yesus ewa nogau sala
27“Natantu niepe komi parenta nggaolu iwe'i: ‘Ne'e mogau sala ante tau da'a rongomu mboto.’ #5:27 Kel. 20:14, Ul. 5:18 28Tapi kuuli ka komi isema-sema mombalele mata samba'a besi ante dota rara mogau sala ante i'a, natantumo tau etu nireke nombabualo besi etu riara pekirina. 29Ane mata ngganamu manggeni komi mowia silaka, su'i tajiakamo matamu etu. Nabelopa saongu sipa nu koromu malipo pade njumaongu koromu ratajiaka riara naraka. 30Pade ane pale ngganamu manggeni komi mowia silaka, tompo tajiakamo palemu etu. Nabelopa saongu sipa nu koromu malipo pade njumaongu koromu mesua riara naraka.”
Pepatuduki Yesus ewa posompo porongo
Mat. 19:9; Mrk. 10:11-12; Luk. 16:18
31“Naria wo'u tesa nggaolu nanguli iwe'i: ‘Isema-sema madota mombasompo rongona besi i'a kana mombawai ka rongona sura tala.’ #5:31 Ul. 24:1-4 32Tapi kuuli ka komi, isema-sema to mombasompo rongona besi to da'a nogau sala ante langgai ntanina i'a nompowia rongona besi etu nireke nebualo ane i'a raporongo langgai ntanina. Pade tau to nomporongo besi to nisompomo, i'a wo'u nireke nebualo.”
Pepatuduki Yesus ewa netunda
33“Niepe komi parenta to nitesa ka totu'ata nggaolu iwe'i: ‘Ne'e mompalewa janjimu, tapi paratamo janji to nitesamu ri ja'i Alatala ante netunda.’ #5:33 Im. 19:12, Bil. 30:2, Ul. 23:21 34Tapi kuuli ka komi, ne'e ntoto metunda! Ne'e metunda ante manguli langi, sabana langi pekatoko nu Alatala. 35Ne'e metunda ante manguli dunia, sabana dunia e'i polampi kada nu Alatala. Ne'e metunda ante manguli Yerusalem, sabana Yerusalem ngata nu Magau to Nakuasana. 36Pade ne'e metunda ante manguli balenggamu mboto, sabana da'a nompakule komi mombabali wulu wo'omu nau aga sambalaa majadi mabula bara mawuri. 37Tapi ane makono ulimo ‘iyo,’ pade ane da'a makono, ulimo ‘da'a.’ Tesa to neliu nggari etu nopu'u nggari ja'i Magau nu Seta.”
Pepatuduki Yesus ewa mombabalasi kaja'ana
Luk. 6:29-30
38“Niepe komi parenta nggaolu iwe'i: ‘Mata kana rasambei ante mata, ngisi kana rasambei ante ngisi.’ #5:38 Kel. 21:24, Im. 24:20; Ul. 19:21 39Tapi kuuli ka komi ne'e mombabalasi tau to nompowia kaja'ana ka komi. Tapi ane maria tau mombasapa kalimpi ngganamu, wai ka i'a wo'umo kalimpi njidimu. 40Pade ane maria tau manggeni komi ri ja'i ntopotangara sabana madota mangala bajumu, wai ka i'a wo'umo buyamu. 41Ane maria tau mompasu'u komi manggolo mbara-mbarana saongu kilo kakawaona, kolomo mbara-mbara etu rongu kilo. 42Waimo ka tau to merapi ri ja'imu, pade ne'e mompoara tau to marata manginda nggari ja'imu.”
Potowemo balimu
Luk. 6:27-28, 32-36
43“Niepe komi parenta nggaolu iwe'i: ‘Potowemo sanggamanusiamu pade porau raramo balimu.’ #5:43 Im. 19:18 44Tapi kuuli ka komi, potowemo balimu pade posambayamo ka tau-tau to mompandasa komi. 45Sabana ante iwetu komi moinggu nasimbayu ewa Umamu ri suruga. I'a nompopebulu eo ka tau-tau naja'a bo tau-tau to nabelo. Pade I'a nompakadunggu uja ka tau-tau to nanoa pade ka tau-tau to nadenggona wo'u. 46Ane komi aga mompotowe tau to nompotowe komi, natantumo Alatala da'a mombabalasi kabelomu etu. Sabana topomperapi balasitee wo'u noinggu ewa etu. 47Pade ane komi aga najole ri ja'i roamu mboto, natantumo powiamu etu da'a neliu nggabelo nggari powia tau ntanina. Nau tau-tau da'a nangginjani Alatala wo'u noinggu iwetu! 48Jadi komi kana moinggu mabelo pura nasimbayu ewa Umamu to naria riara suruga.”
Currently Selected:
MATIUS 5: KZF
Highlight
Share
Copy
Want to have your highlights saved across all your devices? Sign up or sign in
