MATIUS 27
27
Yudas nompatesi korona mboto
Mrk. 15:1; Luk. 23:1-2; Yoh. 18:28-32
1Kampadondo njiina balengga-balengga topanggeni agama bo totu'a-totu'a nto Yahudi nasiromu nolibu nompakatantu Yesus kana rapatesi. 2Ira nombaso'o I'a pade nanggeni I'a mpaka ri ja'i Gubernur Pilatus. Narata ri setu Yesus niwai ira ka i Pilatus.
3Tempo Yudas to nompobalu Yesus nanggita Yesus nipakatantu kana rapatesi, nanjoso raramo i'a. Nalaumo i'a mpaka ri ja'i balengga-balengga topanggeni agama pade nipopanjilina ka ira tolumpulu mpeka doi salaka. 4Niulina ka ira, “Nasilakamo aku e'i! Aku nompobalu samba'a tau da'a ria salana sampe I'a kana rapatesi!”
Nesonomo ira, “Etu da'a urusa kami! Urusamu mboto!” 5Nangepe etu Yudas nantajiaka doi salaka etu riara Sapo Mpepue pade nalaimo i'a neloe. 6Balengga-balengga topanggeni agama nantirunaka doi salaka etu pade niuli ira, “Doi e'i doi oli nu lei. Da'a namala rapasanggani ante doi nipasiromu ri Sapo Mpepue.” 7Jadi nipakatantu ira doi etu rapake mangoli salimpu tana to niuli “Tana Ntopowia Kura” majadi tana rapombatana tau-tau da'a to Yahudi to mamate ri ngata Yerusalem. 8Etu sampe tana etu niuli “Tana Nikabubu Nu Lei” sampe we'i-we'i.
9-10Ante powia etu nadupamo tesa nabi Yeremia nggaolu to nanguli iwe'i: “Olina to nipakatantu to Israel tolumpulu mpeka doi salaka. Pade doi etu nipake ira nangoli tana ntopowia kura. Etu najadi nantuki to niparenta i Pue ka aku.” #27:9-10 Za. 11:12-13
Yesus ri ngayo Gubernur Pilatus
Mrk. 15:2-5; Luk. 23:3-5; Yoh. 18:33-38
11Tempo Yesus nantingayo Gubernur Pilatus nekutanamo Gubernur ka I'a, “Komimo Magau nto Yahudi?”
Nesonomo Yesus, “Ewa to niuli komi etu, Uma, nakono.”
12Tapi tempo balengga-balengga topanggeni agama bo totu'a-totu'a nto Yahudi nompangadu I'a, da'a ria I'a nenjui. 13Etu sampe Gubernur Pilatus nekutana ka I'a, “Da'a niepemu pura-pura tesa ira nompangadu Komi?” 14Tapi Yesus da'a ntoto nesono kamba sambela sampe nasumara mpu'u rara Gubernur.
Yesus nitangara kana rapatesi
Mrk. 15:6-15; Luk. 23:13-25; Yoh. 18:39–19:16
15Butu-butu mpae tempo Eo Bete Paska Gubernur nabiasa nombakabasaka samba'a tau to nitarunggu nantuki dota ntau dea. 16Mpae etu naria samba'a tau nitarunggu to ninjani ntau dea, sangana Yesus Barabas. 17Jadi tempo i Pilatus nombatangara Yesus tau dea nasiromu. Pade nekutanamo i Pilatus ka ira, “Isema rapodota komi kukabasaka ka komi? Yesus Barabas atau Yesus to niuli Kristus?” 18Niuli i Pilatus iwetu apa ninjaninamo topanggeniaka nto Yahudi nombawai Yesus ka i'a sabana nasiriati rara ira.
19Tempo i Pilatus nekatoko ri peto'o mpotangara etu, naratamo samba'a tau nanggeni tesa nggari ja'i rongo i Pilatus to nanguli iwe'i: “Ne'e mombagalo urusa tau to nanoana etu! Sabana nggari I'a aku nombarata pangipi to nompakasusa raraku iwengi.”
20Tapi balengga-balengga topanggeni agama bo totu'a-totu'a nto Yahudi nompakapane rara ntau dea ala ira merapi Pilatus mombakabasaka ka ira i Barabas pade mombasuku Yesus kana mamate. 21Nekutanamo i Pilatus ka tau dea, “Nggari ira romba'a isema rapodota komi kukabasaka ka komi?”
Nesonomo ira, “Barabas!”
22Pade nekutana wo'umo i Pilatus, “Ane iwetu, nuapa kupowia ante Yesus to niuli Kristus?”
Nesonomo ira, “Paku I'a ri kayu parika!”
23Pade nekutana wo'umo i Pilatus, “Nokuya? Kaja'ana nuapa ntoto to nipowiana?”
Tapi ira aga nantambai nongare ante suara to neliu nggamangga, “Paku I'a ri kayu parika!”
24Kaopuna nanotomo ka i Pilatus da'a ria gunana mompapola motesa ka ira, sabana ira aga nantambai nongare-ngare, sakedika majadi kakanano. Jadi nialana ue niramana palena ri ngayo ntau dea ewa tandaina da'a i'a to nasala ane Yesus rapatesi. Pade niulina ka ira, “Aku da'a mombatanggu kamate ntau e'i. Etu kana ratanggu komi!”
25Nesonomo tau dea, “Wa'a mamimo! Damo kami bo muli-muli kami mombatanggu kamatena!”
26Naopu etu i Pilatus nombakabasaka ka ira i Barabas. Pade nipakauna tantarana mombaporo Yesus pade mombapaku I'a ri kayu parika.
Yesus nipongei-ngei tantara
Mrk. 15:16-20; Yoh. 19:2-3
27Naopu etu tantara nu Gubernur nanggeni Yesus riara sapo Gubernur pade nipokio ira pura-pura roa ira nasiromu nantalili I'a. 28Niwonju iramo pakea Yesus pade nipopasua ka I'a baju nalei ewa to nipake magau. 29Nipowia ira songgo nggari karui pade nipoposonggo ka I'a. Niwai ira ka I'a sampeka lembau ri pale ngganana ewa lembau nisoko samba'a magau. Pade nekadedemo ira ri ngayona nompongei-ngei I'a ante nanguli, “Ratoiyata Magau nto Yahudi!” 30Ira nantailu I'a pade lembau ri palena niala ira nipombaboba balenggana. 31Sangga naopupa ira nompongei-ngei I'a iwetu, niwonju iramo baju nalei etu pade nipopasua bali ka I'a pakeana mboto. Naopu etu I'a nikeni ira mpaka ri sawaliku ngata ala rapaku ri kayu parika.
Yesus nipaku ri kayu parika
Mrk. 15:21-32; Luk. 23:26-43; Yoh. 19:17-27
32Ri tatongo jala ira nosintomu ka samba'a tau nggari ngata Kirene to nosanga ka i Simon. I'a nisoko ira pade nipasu'u ira nanjumbuaka kayu pomparika Yesus. 33Napolamo ira sampe narata ri peto'o nosanga ka Golgota, batuana “Peto'o Wuku Balengga.” 34Narata ri setu Yesus nipopoinu ka anggur nigalo ante pakuli to napa'i. Tapi iwetu nipetamina sakedi mana nadota I'a nanginu.
35Ri setumo ira nombapaku Yesus ri kayu parika. Naopu etu ira nombabagi pakeana ante nompenoa nowia nomoro. Isema nawela nomoro i'a nombarata pakea etu. 36Naopu etu nekatokomo ira ri setu nombajagai I'a. 37Ri ntoto balenggana ri kayu parika etu nipataka ira dopi to nitulisi tesa pebata to nipawela ka I'a iwe'i: E'IMO YESUS, MAGAU NTO YAHUDI. 38Ri setu naria wo'u romba'a parampo nipaku ri kayu parika ntanina mpasanggani-nggani ante Yesus, samba'a ri sabingga ngganana, pade samba'apa ri sabingga njidina.
39Tau-tau to noliu ri setu nanguli sinja'i I'a pade nombawiri mata ka I'a. 40Ira nanguli, “Niulimu Iko mamala mombagero Sapo Mpepue pade mombabanguna mpanjili riara tolu eo! Ane Iko mpu'u-mpu'u Ana nu Alatala, pakasalama koromu mboto! Pana'umo nggari kayu parika etu!” 41Iwetu wo'u balengga-balengga topanggeni agama bo guru-guru agama ante totu'a-totu'a nto Yahudi nompongei-ngei I'a. Niuli ira, 42“Tau ntanina namala nipakasalamana. Tapi kita we'i! Korona mboto da'a namala nipakasalamana! Ane I'a mpu'u-mpu'u Magau nto Israel, agina I'a mana'u nggari kayu parika pade kami momparasaya I'a! 43I'a nanjarumaka Alatala pade niulina I'a Ana nu Alatala! Jadi kamaimo kita manggita ane Alatala madota mompakasalama I'a we'i-we'i!” 44Pade parampo-parampo to nipaku ri kayu parika mpasanggani ante Yesus wo'u nanguli sinja'i I'a iwetu.
Kamate Yesus
Mrk. 15:33-41; Luk. 23:44-49; Yoh. 19:28-30
45Nompamula nggari katongo nu eo narumaumo eo ri njumaongu tana etu sampe ri tinti toluongu ngguwiana. 46Kira-kira tinti toluongu ngguwiana etu, nongaremo Yesus ante suara namangga, “Eli, Eli, lama sabakhtani?” Batuana, “Alatalaku, Alatalaku, nokuya Komi nompalasi Aku?”
47Sangga nangepe etu nangulimo bara sakuya mba'a tau ri setu, “I'a nompokio nabi Elia!” 48Pade nangowamo samba'a nggari tatongo ira nasalisa nangala sangele wunga to nasimbayu ante lumu nibanggana riara anggur napoi. Naopu etu niumpuna ante wolo nipopoinuna ka Yesus. 49Tapi naria tau ntanina nanguli, “Ne'epa ruru! Rakitata ane nabi Elia marata mompakasalama I'a!”
50Naopu etu nongare wo'umo Yesus ante suara namangga, pade nalaimo nosana. 51Ri tempo etu wo'u naseri ntongomo kae powombo ri Sapo Mpepue nggari ba'ana narata ri wayona. Pade naria wo'u lingu bete bo watu-watu bete natebingga. 52Dayo-dayo natebuka pade nadea topomparasaya to namatena natuwu bali 53pade nesuwu nggariara dayo-dayo etu. Pade naopu Yesus natuwu bali nesuamo ira riara ngata Yerusalem, ngata to nagasana, pade nadea tau ntanina nanggita ira.
54Tempo balengga tantara bo tantara-tantarana to nombajagai Yesus ri setu nangepe lingu bete etu pade nanggita nuapa-nuapa to najadi ri setu, naeka mpu'umo rara ira. Niuli ira, “Mpu'u-mpu'u tau e'i Ana nu Alatala!”
55Ri setu naria wo'u nadea besi to nenggore neantoaka nggawao. Iramo besi-besi to nantuki Yesus pade nantulungi I'a nompamula nggari bagona ri Bagia Galilea. 56Ri tatongo ira naria i Maria Magdalena pade i Maria indo Yakobus bo Yusuf, pade indo ana-ana i Zebedeus.
Yesus nitana
Mrk. 15:42-47; Luk. 23:50-56; Yoh. 19:38-42
57Tempo ntora nasolomo eo naratamo samba'a tau nasugi nggari ngata Arimatea to nosanga ka Yusuf. Yusuf e'i wo'u samba'a topomparasaya Yesus. 58Nalaumo i'a mpaka ri ja'i Pilatus nerapi watabaku Yesus. Nangepe pomperapi etu i Pilatus nompakau tantarana nombawai watabaku Yesus ka Yusuf. 59Pade Yusuf nangala watabaku Yesus etu, nisompuna ante kae gandisi to nalusuna 60pade nibolina riara dayona mboto to lako nipa'a ri saongu bulu watu. Naopu etu niluliakana wo'u saongu watu bete nipombapiku pewobo dayo etu, pade nalaimo i'a. 61Tempo etu i Maria Magdalena ante i Maria ntanina nekatoko ri ngayo dayo etu.
Dayo Yesus nikatono tantara-tantara
62Naeompadondona ri Eo Mpenonto nalaumo balengga-balengga topanggeni agama bo tau-tau to Parisi mpaka ri ja'i Pilatus. 63Narata ri setu nangulimo ira, “Uma, nitora kami tesa topebagiu etu tempo I'a danatuwu. Niulina, ‘Ri eo katolueona Aku kana matuwu bali.’ 64Jadi etu sampe kami merapi ala komi mompakau tantara-tantara malau manggatono dayona ria sampe eo katolueona ala ne'e-ne'e anaguruna malau mangala watabakuna pade manguli ka tau dea, ‘Natuwu balimo I'a!’ Ane etu majadi bagiu kaopuna meliu nggaja'a nggari bagiuna pamulana.”
65Nesonomo i Pilatus, “Etumo tantara-tantara. Kenimo ira manggatono dayo mpakabelo-belo.” 66Jadi nalaumo ira nombamere watu nipompiku dayo ala ne'e rabuka ntau. Pade nipakau ira tantara-tantara manggatono ri setu.
Currently Selected:
MATIUS 27: KZF
Highlight
Share
Copy
Want to have your highlights saved across all your devices? Sign up or sign in
