YOHANES 12

Yesus nitoli minya wongi ri ngata Betania

Mat. 26:6-13; Mrk. 14:3-9

1Onoeopa pade marata Eo Bete Paska nalaumo Yesus mpaka ri ngata Betania, ngata nipeto'o i Lazarus to nipakatuwu Yesus bali nggari kamatena bopia. 2Ri setu ira nompowia posusa mombabila I'a. Marta nantulungi nanggeni panggoni ka ira pade i Lazarus naria ri tatongo tau-tau to nekatoko nanggoni mpasanggani-nggani ante Yesus.

3Tempo ira nekatoko ri setu i Maria nangala sabotolo minya wongi to nasuli mpu'u olina, kira-kira santongo lite isina. #12:3 minya wongi: etu nipowia nggari kale to nawongi mpu'u to niuli narwastu. Pade naratamo i'a nombatoli lana etu ri kada Yesus pade nipe'ena ante wo'ona sampe nangau. Pade ranjapo etu pura-pura nawongi mpu'u soana nggari minya wongi etu. 4Nanggita etu notesamo samba'a anaguru Yesus to nosanga ka Yudas Iskariot to mompobalu Yesus banepia. Niulina, 5“Nokuya minya to nasuli olina etu da'a nipobalu nte toluatu mpeka doi salaka #12:5 doi salaka: sampeka doi salaka nasimbayu olina ante gaji samba'a saeo. pade doi etu rawai ka tau nakasiasi?” 6Kakonona Yudas da'a nantora tau nakasiasi, tapi i'a madota mompelea doi etu, sabana i'amo anaguru to niparasaya nombaboli doi ira, pade sanggani-sanggani i'a nompelea doi etu. Etu sampe i'a notesa iwetu.

7Tapi nangulimo Yesus ka Yudas, “Palambamo i'a manggawia etu, sabana to nikawiana etu mantora eo pombatana Aku banepia. 8Tau nakasiasi bate-batena maria ri tatongo komi, tapi Aku e'i da'a mana masaeka ri tatongo komi.”

Sintuwu balengga-balengga topanggeni agama mompatesi Lazarus

9Nadeamo tau to Yahudi nangepe lele Yesus naria ri ngata Betania. Jadi nalaumo ira mpaka ri setu ala manggita Yesus pade ala manggita i Lazarus wo'u to nipakatuwu Yesus bali nggari kamatena. 10Jadi balengga-balengga topanggeni agama nasintuwu madota mompatesi i Lazarus wo'u. 11Sabana nggari i Lazarus etumo nadeamo tau to Yahudi da'a mana madota mantuki balengga-balengga topanggeni agama. Ira aga madota mantuki Yesus bo momparasaya I'a.

Yesus nitomunaka ntau dea ri ngata Yerusalem ewa samba'a magau

Mat. 21:1-11; Mrk. 11:1-10; Luk. 19:28-38

12Naeo mpadondona nadeamo tau to narata ri ngata Yerusalem ala mantuki posusa Paska etu nangepe lele Yesus nompakamosu ngata Yerusalem. 13Jadi niala ira lolo tawa nggaluku #12:13 tawa nggaluku: Tawa-tawa etu nitale ira ri jala rapoliu Yesus ala mombabila I'a nantuki ada nto Yahudi ane maria torata bete marata riara ngata ira. Kitamo Mat. 21:8, Mrk. 11:8. pade nalaumo ira nombatomunaka Yesus. Nongare-ngaremo ira,

“Ratoiyata Alatala!

Perapi Pue Mombagane Magau to narata niposumba i Pue!

Perapi I'a mombagane Magau nto Israel!”

14Yesus nosirata ka saongu ana keledai pade nipesawina. Kajadia etu nompakadupa tesa nitulisi riara Buku Nagasa iwe'i:

15“Ne'e komi maeka, pue ngata Yerusalem! #12:15 ngata Yerusalem: Basa Yunani, Sion. Sion sanga bunggu ri tatongo ngata Yerusalem. Nabiasa ngata Yerusalem niuli Sion.

Kitamo! Magau komi marata nesawi ana keledai!” #12:15b keledai: sangele jara nggedi to naria ri tana Israel. Ane samba'a magau marata mesawi jara batuana i'a marata mosipatesi. Tapi ane i'a marata mesawi keledai batuana i'a marata mosinggabelo ante pue ngata etu. (Za. 9:9)

16Tempo etu da'apa ninjani anaguru-anaguruna batuana kajadia etu. Tapi naliu Yesus natuwu bali nggari kamatena pade neoremo mpaka ri suruga, nanotomo ka ira tesa-tesa nggari Buku Nagasa etu nantesa Yesus pade etumo to najadi ri ja'ina.

17Tempo etu ri ngata Yerusalem nadeamo tau to nosanggani-nggani ante Yesus tempo I'a nompokio i Lazarus nggariara dayona pade nompakatuwu bali i'a. Ira batena nantesa ka tau ntanina kajadia etu. 18Etumo sampe nadea tau nalau nantomunaka Yesus sabana niepe ira Yesusmo to nompowia kabaraka etu. 19Nanggita etu nangulimo tau-tau to Parisi samba'a bo samba'a, “Nidagimo kita! Kitamo! Pura-pura tau ri dunia e'i nalau nantuki I'a!”

Yesus nombaboto kamatena banepia

20Ri tatongo ntau dea to nalau mepue ka Alatala ri ngata Yerusalem tempo posusa Paska etu naria wo'u bara sakuya mba'a to Yunani. 21Ira narata ri ja'i Filipus pade nanguli ka i'a, “Ane mamala kami wo'u madota mosirata ka Yesus.” (Filipus etu tau nggari ngata Betsaida ri Bagia Galilea.) 22Sangga nangepe pomperapi ira etu nalaumo i Filipus notesa ka Andreas pade ira romba'a nalau nombatesa pomperapi etu ka Yesus. 23Nangulimo Yesus ka ira, “Naratamo tempona Aku, Ana nu Manusia rapakabete pade rabila. 24Aku mpu'u-mpu'u notesa ka komi, ane rapana ongu pae da'a ratuja ri tana pade raiwu nasimbayu ewa tomate, pae etu bate-batena aga saongu lau. Tapi ane ongu pae etu ratuja ri tana pade raiwu nasimbayu ewa tomate, kaopuna pae etu mowua madea. 25Isema-sema aga nompotowe katuwuna riara dunia e'i kana malipo katuwuna banepia. Tapi isema-sema da'a nompotowe katuwuna riara dunia e'i, ira kana mombarata katuwua mabelo sampe ri kasae-saena. 26Isema-sema madota mantulungi Aku kana mantuki Aku ala ira mosanggani-nggani ante Aku. Pade isema-sema mantulungi Aku kana rabila Umaku.

27We'i-we'i nasusamo raraku e'i. Nuapa masipato kuuli we'i-we'i? Da'a masipato Aku manguli, ‘Uma, kabasakamo Aku nggari kasusana to marata ri ja'iku.’ Sabana patuju karataku e'i ala mombarasai kasusa etu! 28Tapi iwe'i to masipato kuuli: ‘Uma, powiamo to mompakabete sangamu!’ ”

Naopu I'a nanguli iwetu nariamo suara nggari langi nanguli, “Nipakabetekumo sangaku, pade kana kupakabetepa ngina.”

29Nangepe suara etu nariamo tau-tau to nanguli, “Etu aga guntu.” Tapi naria wo'u sanu ira nanguli, “Naria malaeka notesa ka I'a.”

30Jadi nangulimo Yesus ka ira, “Suara to niepe komi pani'a da'a nitesa ala mantulungi Aku, tapi ala mantulungi komi. 31We'i-we'i naratamo tempona sala manusia ri dunia kana ratangara. We'i-we'i tempona wo'umo Magau nu Seta to nakuasana riara dunia rapopalai. 32Pade ane Aku raonggotaka mpakalanga nggari dunia e'i #12:32 raonggotaka mpakalanga nggari dunia e'i: Patuju tesa e'i Yesus kana raonggotaka ri kayu parika pade raore mpaka ri suruga tempo I'a matuwu bali nggari kamatena. Aku kana manggeni pura-pura tau marata ri ja'iku.” 33Yesus notesa iwetu ala mompakanoto iwenu jala nggamatena.

34Pade nangulimo tau dea ka I'a, “Naria nitulisi riara buku Atura-atura agama Magau to Mompakasalama to nijanji Alatala kana matuwu sampe ri kasae-saena. Jadi iwenu sampe Komi nanguli Ana nu Manusia kana raonggotaka mpakalanga? Isema Ana nu Manusia etu?” #12:34 Nantuki tau dea Ana nu Manusia nasimbayu ante Magau to Mompakasalama to nijanji Alatala. Tapi Yesus nanguli Ana nu Manusia kana mamate raonggotaka mpakalanga. Jadi ira nompamula mompekiri Ana nu Manusia bara da'a nasimbayu ante Magau to Mompakasalama etu.

35Nesonomo Yesus, “Damo sampalai reme maroo ri ja'i komi. Jadi agina komi molumako tempo danarawa ala ne'e komi rarata rumau. Tau nolumako riara karumauna da'a nanoto mpaka ri umba rakalauna. 36Parasayamo reme etu tempo danaria nosanggani-nggani ante komi ala komi wo'u majadi ana-ana nu reme.”

Nadea tau to Yahudi da'a nomparasaya Yesus

Sangga notesa iwetu nalaimo Yesus nggari ja'i ntau dea. I'a da'a mana nosanggani-nggani ante ira. 37Naupa nadeamo kabaraka nikawiana ri ngayo ntau dea, ira da'a nomparasaya I'a. 38Etu pura-pura najadi ala madupamo tesa to nitulisi nabi Yesaya nggaolu iwe'i:

“Pue, da'a ria to nomparasaya kareba to nikeni kami ka ira!

Da'a ria to nompariara nta'i kabaraka-kabaraka to nipopokita i Pue ka ira!” (Yes. 53:1)

39Jadi ira da'a namala nomparasaya, sabana naria wo'u tesa Alatala to nipasimbayu nabi Yesaya nggaolu iwe'i:

40“Nitunggaiku nompakaburo mata ira

pade nompakako'o rara ira,

ala mata ira da'a mamala mekita

pade rara ira da'a mangginjani,

pade ira da'a manjili ri ja'iku ala Aku mompakabelo ira.” (Yes. 6:10)

41Iwetumo tesa to niuli nabi Yesaya nggaolu sabana nikitana mamimo baraka Yesus pade nitesana nombaboto etu.

42Naupa iwetu nadea wo'u topanggeniaka nto Yahudi to nomparasaya Yesus. Aga ira da'a nabia nompangaku etu ri ngayo ntau dea sabana naeka ira ka to Parisi, ne'e-ne'e ira rasuwuraka nggariara sapo mpodade. 43Sabana neliupa dota ira rabila manusia pade rabila Alatala.

Tesa Yesus kaopuna ka tau dea

44Pade nongaremo Yesus ri tatongo ntau dea, “Isema-sema nomparasaya Aku, da'a aga nomparasaya Aku tapi ira wo'u nomparasaya Alatala to nompakau Aku. 45Pade isema-sema to nanggita Aku, ira wo'u nanggita Alatala to nompakau Aku. 46Aku e'i nomai ri dunia e'i ewa reme ala isema-sema momparasaya Aku mana meto'o riara karumauna.

47Ane maria tau to mangepe tesaku tapi da'a mantuki tesa etu, da'a Aku to mompakasala ira. Sabana Aku narata riara dunia e'i da'a ala mompakasala manusia, tapi ala mompakasalama manusia. 48Ane tau da'a madota mantarima Aku pade da'a madota mangepe tesaku nariamo to mompakasala ira. Tesa to nitesaku ka ira etumo to mompakasala ira ri kaopu nu dunia. 49Sabana Aku da'a notesa nantuki dotaku mboto. Aku aga nombatesa bo nanguli nuapa to niparenta Umaku ka Aku, sabana I'amo to nompakau Aku marata ri dunia. 50Pade ninjaniku wo'u parentana etu mombawai katuwua mabelo sampe ri kasae-saena. Jadi tesa to nitesaku ka komi aga nantuki nuapa to niparenta Umaku ka Aku.”

Currently Selected:

YOHANES 12: KZF

Highlight

Copy