Matius 26

Yé fro os wa but Yefun Yesus

(Mrk. 14:1-2; Luk. 22:1-2; Yoh. 11:45-53)

1Yefun Yesus duno nje su suk mwa ne or sa, An ki nai An bi pakon do, 2”Kam we ete kam sye gato gum do Kam Sye Waiket, nin dakai jam re. {Yé napawa kam gato malaikat waiket ye Israel bi pa futmo mo bur Mesir suga nyim tuya.} Su kam ne, bere yé syo Yetu bi Pa to Ji ré mo yé syim wa yé mban Ji mo kwesukwin.”

3Sugane yekwesú mo Yefun Allah bi nu si ye Yahudi bi yepasye sum mo Kaiafas bi nu sye. Kaiafas anato yekwesu gato gum kok wai mo Yefun Allah bi nu. 4Án sino sum wa fro os yo wa án but Yefun Yesus wa gu apre, subere yé mwa jam nde. 5Án ki nai yu do, ”Men but An, sarewo men but An su kam sye ré nde, sawe yé mwa more maskwa e, saiye daret, ete am men su jok.”

Nggon ge dik yo sye manik gato grik mo Yefun Yesus su mo Betania

(Mrk. 14:3-9; Yoh. 12:1-8)

6Yefun Yesus kem mo Simon bi nu mo kampung Betania. Simon ne, su nyim neya suki borbuk git an. Yefun Yesus kem mo nu ne saresa, 7nggon ge dik yo ma ku An. Nggon ne gwat manik gato grik ndo su sukbo pualam ma. Manik ne bi sugum sye. Yefun Yesus kem ga wa git sugit sa, nggon ne syé manik ne mo Yefun Yesus su. 8Yefun Yesus bi pakon me suk gato nggon ne ben sa, án maskwa, án ki do, ”Bei! Nggon ré kamo su manik ne wa suma ne? 9Ndo sa, men gwat manik ne, men win su sugum orete yo, men syo sugum nai yé gato yewa suk et.”

10Yefun Yesus jam án bi sukjimnut, ete Yefun ki do, ”Ben sa u anato nin maskwa ket nggon ré ne? Mom ben suk gato ndo wa un Ji. 11Yé gato yewa suk kem su nin sino mo bur ré petok sor, wo Ji yo kem pe su nin nde. 12Nggon ré syé manik mo Ji kaim ré subere mom fro Ji kaim nyim, subere Ji kwop yo, yé bi Ji mo makwe. 13Suk gato Ji ki ré suksangge anare, bere yé mu mo pe mwa ne sino mo bur ré, yé ki subot os ndo gato Yefun Allah fro wa yetu ne, bere yé ki subot suk gato nggon ré ben ne dom. Bere yé napawa suk gato nggon ré ben ne.”

Yudas tom su yekwesú mo Yefun Allah bi nu do, bere an meret os wa gwat yeko ma wa but Yefun Yesus

(Mrk. 14:10-11; Luk. 22:3-6)

14Orete Yefun Yesus bi pakon ge musyu dik sop we, ge dik yo gato gum do Yudas Iskariot mu ku yekwesú mo Yefun Allah bi nu. 15Yudas ki nai yé ne do, ”Nin syo suma nai ji subere ji fro os wa nin but Yesus ne?” Yekwesú mo Yefun Allah bi nu ne ki do, ”Men syo sugum perak det musyu gri nai nan.” Sane yekwesú ne newa sugum ne, ete án bi nai Yudas. {Sugum ne sye tepsu mbre toba syos dik.} 16Kadit kam gane Yudas meret os tepsu yeketut gato gwat os wa yeko ma wa but Yefun Yesus.

Yefun Yesus si bi pakon git sugit wa napawa Kam Sye Waiket

(Mrk. 14:12-21; Luk. 22:7-14, 21-23; Yoh. 13:21-30)

17Su ye Yahudi bi kam sye gato ye kendo gum do Waiket ne, bi kam futmo, su kam ne yé kon roti su bibit roti nde, yé git roti gane, roti gato yo it nde. Sane su kam ne Yefun Yesus bi pakon ma ku An, ete pa ndo mo An do, ”Nan iwa men fro suk wa Nan git su kam sye ré mo u ne?”

18Yefun Yesus ki do, ”Nin mu mo kota, bere nin ku yetu ge dik yo, nin ki nai an do, ’Yeguru ki do, karowa kam gato Yefun Allah fro wa Ji kwop it anare, sane bere Ji si Ji bi pakon konwa Kam Sye Waiket mo nan bi nu.’ ”

19Sane Yefun Yesus bi pakon ne mu benbot suk gato Yefun ki ne. Án mu fro sugit wa án si Yefun Yesus git su Kam Sye Waiket ne.

20Kam sye ne bi noru, Yefun Yesus si bi pakon ge musyu dik sop we ne kem ga wa án git sugit sino. 21Án git sino saresa, Yefun Yesus ki nai án do, ”Suk gato Ji ki ré suksangge anare, kadit nin ré, bere nin ge dik yo meret os wa gwat yeko ma wa but Ji.”

22Án sino jam sukdu ne or sa, án kwabom dek ku Yefun, án jimnotbot sukdu ne ndo nde, or án kadik-kadik ndo mo Yefun Yesus do, ”Yenggras bi sukdu-i ne te, ji bado nde e?”

23Yefun Yesus ki do, ”Ye gato si Ji ras roti mo sukrom mo mbem ré sino, ye ne anato bere meret os wa gwat yeko ma wa but Ji. 24Sangge, Yetu bi Pa to Ji ré bere kwop sagato yenabi krom mo Yefun Allah bi sukdu ne. Sarewo ye gato meret os wa gwat yeko ma wa but Ji bere ku sukye. Ndo sa, ye ne bi im yo pe an mo nde.”

25Orete Yudas, yeketut gato bere meret os wa gwat yeko ma wa but Yefun Yesus ne ki do, ”Yeguru, sangge, ji bado?”

Yefun Yesus ki do, ”Nan dakai ki it.”

Yefun Yesus syat roti ete syobot bi pakon

(Mrk. 14:22-26; Luk. 22:14-20; 1Kor. 11:23-25)

26Yefun Yesus si An bi pakon git sugit saresa, Yefun Yesus nai roti, ete An ki do, ”Ndo mo Nan, Yefun Allah wa roti gato Nan syo nai men ré.” Or o An syat roti ne, An syo nai An bi pakon. An syo nai An bi pakon saresa, An ki do, ”Nin nai nin git sor. Ji ku anare.”

27Or o An nai mok su nau anggur, ete An ki do, ”Ndo mo Nan, Yefun Allah wa nau gato Nan syo nai men ré.” Or o An syo nai An bi pakon ne da saresa, An ki do, ”Nin sino da et, 28Ji dé anare, bere Ji dé sye wa yé mwa subere kak os be wa Yefun Allah nai yé mwa sok mo An bi rus-i sagato An tom ne. Ji dé ré tepsu suktot gato Yefun Allah tom ne. Ji dé ré anato sye wa kak os subere Yefun Allah yo maskwa nin mo sukibit mwa gato nin yetu ben ne o nde, An yo nutbot o nde, tepsu An rus sukibit ne wé it. 29Ji ki sare do, Ji yo da nau ré o nde yei, kom mo kam gato Yefun Allah jowa An bi rus-i mo Ji bi Ai bi nat be ne tepsu Yekwesu ne yo, bere Ji da o mone.”

30Án git, án da nau ne, orete án kos sukos dik yo wa un Yefun Allah, or o án mu kadit pe ne mu mo nden mo bobuk Zaitun.

Yefun Yesus ki do, bere Petrus rewa An

(Mrk. 14:27-31; Luk. 22:31-34; Yoh. 13:36-38)

31Orete Yefun Yesus ki nai An bi pakon ne do, ”Su noru ré, bere nin sino titi kadit Ji, bere nin misyar Ji sagato ye krom sukamno dik yo mo Yefun Allah bi sukdu do, ’Bere Ji gu ye gato mewa suksi, ete an bi suksi ne titi kadit an.’ 32Sarewo Yefun Allah sun Ji kadit sukkwop satu yo, bere Ji mu nyim mo bur Galilea kem kret nin motu.”

33Petrus ki nai Yefun Yesus do, ”Kapre pa ge bok ré misyar Nan, ji ré yo misyar Nan nde, wokgan yo dom nde.”

34Yefun Yesus ki nai Petrus do, ”Suk gato Ji ki ré suksangge anare, ber noru ré, ndam kokor yo ke nde tó, nan anato rewa Ji wam gri re.”

35Petrus ki do, ”Kapre ji kwop o, ji mbau o, ji yo rewa Nan nde.”

Sugane pakon bok ne ki sukdu tepsu Petrus dom.

Yefun Yesus ki suk su Yefun Allah mo Getsemani

(Mrk. 14:32-42; Luk. 22:39-46)

36Orete Yefun Yesus si An bi pakon bok ne mu mo nat dik yo gato gum do Getsemani. Mone Yefun Yesus ki nai pakon ne do, ”Nin kem more yei, Ji mu mo neya, Ji ki suk su Yefun Allah et.” 37An ki nai Petrus si Zebedeus bi pa we ne, subere an ka gri si An mu sino. Kom mo pe ne Yefun Yesus nderku nggwa, An kwabom dek subot sukye gato bere An ku ne, An nutbot sor An kaim rere su. 38Yefun Yesus ki nai An bi pakon ka gri ne do, ”Ji nderku Ji nggwa ndo nde. Ji kaim rere bot suk gato bere bor mo Ji ne, karowa Ji kwop rok it anare. Nin ka gri kem more yei, nin ka gri si Ji, men sino mewa yu et.”

39Yefun Yesus mu ko gan kadit pakon ka gri ne, ete An sem An gwem mu bur wa An ki suk su Yefun Allah. An ki nai Yefun Allah do, ”Ji bi Ai o, os yo mó yo, Nan nai Ji wé kadit sukye gato bere Ji ku ré et. ”

40Orge Yefun Yesus satu ma ku An bi pakon ka gri ne sa, pakon ne sem re. An ndo mo Petrus do, ”Jam dik sor, nin ka gri gare yo nggiwa si Ji mewa yu kom mo jam dik nde, bado? 41Nin mewa nin nggwa, nin ndekwa Yefun Allah mewa nin subere suk yo tik nin mit ete ben nin misyar Ji nde. Nin da bi sukjimnut dik wa nin jammo Ji, sarewo nin dakai yo nggiwa benbot nde.”

42Yefun Yesus mu ki suk su Yefun Allah wam dik yo o, An ki do, ”Ji bi Ai o, os yo wa Nan nai Ji wé kadit sukye ré mo nde yo, Ji simo os gato Nan dakai imo ne sor.” 43Orete An satu ma o, An ku An bi pakon ka gri ne sem o re. Pa ne gro rup ndo nde.

44Sane Yefun Yesus misyar pa ka gri ne kem, ete An mu ki suk su Yefun Allah wam dogri o. An ki sukdu gado ne o. 45Or o An satu ma ku An bi pakon ka gri ne, An ki nai do, ”Nin ka gri kem not mo nat ré sor re bado, nin ka gri sem tó are, e? Tep it! Nin sem o nde, nin sun se! Nin me ré, yeko ma wa but Ji it anare. Yeketut gato meret os wa gwat yeko ma wa but Yetu bi Pa ma it anare. 46Nin ka gri sun se! Men mu se! Yeketut gwat yeko ma wa but Ji it anare!”

Yeko but Yefun Yesus

(Mrk. 14:43-50; Luk. 22:47-53; Yoh. 18:3-12)

47Yefun Yesus do ki sukdu ne saresa, An bi pakon dik yo kadit pakon musyu dik sop we ne gato gum do Yudas bor mone. Yé mwa gato gwat nyom si kwekoi ne simo Yudas ma dom. Yekwesú mo Yefun Allah bi nu si ye Yahudi bi yepasye anato syogat yeko ne ma wa but Yefun Yesus. 48Kom mo nat ne nde tó, Yudas, yeketut ne, an ki nai yeko ne do, ”Nin me ye gato ji baput mó yo, Yesus anane it, nin but An sor.”

49Kom mo nat gato Yefun Yesus ti mone sa, Yudas mu ku Yefun Yesus. Sugane it, Yudas ki do, ”Yeguru, ndo mo Nan,” orete an baput mo Yefun Yesus.

50Yefun Yesus ki do, ”Pa nji a, nan ma more wa suma ne?”

Orete yeko gato si Yudas ma ne muya ete but Yefun Yesus. 51Sugane Yefun Yesus bi pakon dik yo nai bi nyom, ete sap pakwerut dik yo dabe toko wé re. Pakwerut ne ben suk wa yekwesu gato gum kok wai mo Yefun Allah bi nu. 52Yefun Yesus ki nai pakon ne do, ”Nan bok nan bi nyom ne satu mo bi fat. Ye gato gu nje su nyom yo, bere ye yi waii gu an kwop su nyom o re. Sane nan misyar sor. 53Ji nggiwa Ji kendo Ji bi Ai bi yesukmise malaikat pasukan musyu dik sop we ma su ré it. Nan jam nde bado? 54Sarewo Ji do kendo malaikat mwa ne ma it yo, bere sukdu gato yenabi krom mo Yefun Allah bi sukdu ne, bere yo bor nde.”

55Orete Yefun Yesus ki nai yeko ga mone do, ”Te nin nut do Ji ré, yekwesu wa yeko gato futma wa gu nin, anato nin gwat nyom si kwekoi ma wa but Ji su ne bado? Kamdik-kamdik Ji da duno nje mo Yefun Allah bi nu ne mó re, sarewo nin yo but Ji mone nde. 56Sarewo suk mwa gare bor, subere tepsu sukdu gato yenabi krom mo Yefun Allah bi sukdu ne.”

Yefun Yesus ki sane, orete An bi pakon mwa ne sino titi kadit An re.

Ye Yahudi bi yepasye si yekwesú ndobot Yefun Yesus

(Mrk. 14:53-65; Luk. 22:54-55, 63-71; Yoh. 18:13-14, 19-24)

57Yeko gato but Yefun Yesus ne gwat An mu mo yekwesu gato gum kok wai mo Yefun Allah bi nu gato gum do, Kaiafas bi nu. Yeguru agama si ye Yahudi bi yepasye sum sino mone. 58Petrus ndar boribot Yefun Yesus ko gan sane sor kom mo yekwesu gato gum kok wai mo Yefun Allah bi nu ne bi nu de. Orete Petrus si yesukmise gato mewa Yefun Yesus ne sok ket ros syo ete kem karowa mo nu de ne o. An iwa jam subot suk gato bere yé ben nai Yefun Yesus mone. 59Yekwesú mo Yefun Allah bi nu si ye Yahudi bi yepasye si yekwesu gato sum sino wa kibot sukdu, án sino meret yé gato ma wa ndak Yefun Yesus su sukkidar, subere án ku os wa án syokom ye gu Yefun Yesus kwop wé. 60Kapre yé mwa ma wa ndak Yefun Yesus su sukkidar, án yo ku os yo mo nde. Kom mo rut sa, yetu ge we yo ma ti mo yepasye ne gwem wa ki sukdu. 61Ye we ne ki do, ”Ye ré ki do, ’Ji tarak Yefun Allah bi nu, orete kam gri rek Ji nggo nu ne satu or re.’ ”

62Orete yekwesu gato gum kok wai mo Yefun Allah bi nu ne ti, an ndo mo Yefun Yesus do, ”Nan ki suma subot suk gato ye we ré ndak Nan su ne? Nan yo du nde wa suma ne?” 63Sarewo Yefun Yesus not sor. Yekwesu ne ki nai Yefun Yesus o do, ”Ji syogat Nan ki suk gato sangge tepsu Nan ki mo Yefun Allah gato gesyos ne gwem. Nan ki rer nai men jam et, Nan anato Yekwesu gato Yefun Allah syogat ma mo bur ré wa nai men yetu kadit sukye ete jowa men, bado? Te nan anato Yefun Allah bi Gan ne bado?”

64Yefun Yesus ki do, ”Sangge, suk gato nan ki ne sangge. Sane sor nde, wo Ji ki nai nin sare do, bere nin me Yetu bi Pa to Ji ré kem tak Yefun Allah gato nggi wai ne de syim ge, ete bere Ji satu is ma mo bur ré su nyotem kadit gu.”

65Sugane yekwesu gato gum kok wai mo Yefun Allah bi nu ne maskwa ndo nde anato yekwesu ne syik an dakai bi san, ete an ki do, ”Ye ré dakai bes An nggwa kok tepsu Yefun Allah, ete An ki suk tepsu Yefun Allah ko ré go! Men yo mitwa ye yi yo ma ki sukdu subot An o nde. Men sino dakai jam An kiket Yefun Allah gum ibit it.

66Su ré te, nin nutbot sa u ne?”

Yé mwa mone bi sukdu dik do, ”An ki Yefun Allah gum ibit re, sane men syokom ye gu An kwop wé sor.”

67Orete yekwesú si yepasye ne sino sukut tom Yefun Yesus gwem, án tut Yefun Yesus su án syim. Yekwesu deyo gwa su syim tak dom, 68ete án ki do, ”Nan anato Kristus gato jam suk rer yo, Nan ki ye gato gwa Nan ré gum et.”

Petrus rewa Yefun Yesus

(Mrk. 14:66-72; Luk. 22:56-62; Yoh. 18:15-18, 25-27)

69Petrus kem mo yekwesu gato gum kok wai mo Yefun Allah bi nu ne bi nu de saresa, nggon kwerut dik yo ma ki nai an do, ”Nan dom simo Yesus, ye Galilea ne fe!”

70Sarewo Petrus rewa sukdu ne mo yé bok ne sino gwem, an ki do, ”Ji jam nde suk gato nan ki ne.” 71Orete Petrus mu syesyar ket ros syo. Or o nggon kwerut dik yo o ma me an. Nggon ne ki nai yé mone do, ”Ye ré sisu Yefun Yesus gato ma kadit kota Nazaret ne.”

72Petrus rewa sukdu ne o, ete an dufo do, ”Sangge, bur anare, gu ana nim ne, ji jam nde Ye ne, sangge re.”

73Bergan yo o, yé bok yo gato ti mone ma ku Petrus ete ki nai an do, ”Sangge, nan dom simo Ye ne, we men jam kadit nan bi a-i gato nan ki ne.”

74Orete Petrus syo syim, an dufo mo yé ne gwem do, ”Bur anare, gu ana nim ne, ji jam nde Ye ne sangge kai!”

Sugane, ndam kokor ke it. 75Petrus napakom sukdu gato Yefun Yesus ki nai an ne do, ”Ndam kokor yo ke nde tó, nan rewa Ji wam gri re.” Orete Petrus syesyar mu nden, ete an wo ndo nde.

Currently Selected:

Matius 26: KGR

Highlight

Copy