Matius 17

Yefun Yesus kaim tara or re

(Mrk. 9:2-13; Luk. 9:28-36)

1Kam mumat rek o, Yefun Yesus kendo Petrus, Yakobus si bi nji Yohanes sisu An it mo banbo sye. Yefun Yesus si an ka gri ré sor re anato it mo banbo ne. 2An ka gri ne sokme sa, Yefun Yesus kaim tara o re. An gwem ru tepsu kam su, An bi san kwo rer-rik. 3Sugane an ka gri ne me ye we gato gum do Musa si Elia si Yefun Yesus nuk subot sukdu sino. 4Sane Petrus ki nai Yefun Yesus do, ”Yenggras o, men ka gri si Nan ma more anato ndo. Nan imo yo, ji nggo nu ti ke gri et, dik yo wa Nan, dik yo wa Musa si dik yo wa Elia.”

5Petrus ki suk saresa, duk gato rer-rik is ma kewa án sino, ete án jam Yefun Allah ki sukdu kadit duk mit ne do, ”Ji bi Gan gato Ji jimnotku anare. Suk gato An ben ne Ji mit iwa. Nin jammo An ne sor.”

6Yefun Yesus bi pakon ka gri ne jam sukdu ne sa, án ka gri nyu ndo nde, án ka gri bare nggwa mo bur, án sem án gwem mu bur. 7Sane Yefun Yesus ma syimtok án ka gri ne, ete Yefun ki do, ”Nin sun et! Nin nyu nde!” 8Án ka gri ne brek án gwem sa, án ka gri sok meret pe ne kekro ware, án yo me ye yo mone o nde, Yefun Yesus wadigan anato ti mone sor re.

9An ka gri si Yefun Yesus is kadit banbo ne saresa, Yefun Yesus dumik wa an ka gri ne do, ”Nin kibot suk gato nin ka gri me ne nai ye yi jam nde, wo Yetu bi Pa sun kadit sukkwop orete yo, nin ka gri ki nai yé yi jam.”

10Sane pakon ka gri ne ndo mo Yefun Yesus do, ”Suma ben anato ye Yahudi bi yeguru agama ki do, Elia ma nyim mo Yetu bi Pa gwem mo bur ré ne?”

11Yefun Yesus ki do, ”Sukdu gato yeguru ki ne sangge do, Elia ma nyim, ete fro os wa Ji re. 12Wo Ji ki sare do, Elia da ma re, sarewo yé yo jam an nde. Yé ben sukye nai an ket kwayo-kwayo. Sane bere yé ben sukye nai Yetu bi Pa to Ji ré ket kwayo-kwayo dom.”

13Sugane Yefun Yesus bi pakon ka gri ne jam do, Elia gato Yefun Yesus kibot ne anato Yohanes gato ras nje mo syur ne.

Yefun Yesus syun semda wé kadit pa dik yo

(Mrk. 9:14-29; Luk. 9:37-43a)

14Yefun Yesus si bi pakon ka gri ne satu ma ku yé mwa sa, yebris ge dik yo ma ku Yefun Yesus, ete an tu an umsu mo Yefun Yesus gwem, 15orete an ki do, ”Yenggras, Nan jimnotku ji bi pa et! Semda ben pa ndo nde sane sor pa tetet e, pa ges mo bot e, pa ges mo syur e ne. 16Ji gwat pa ne ma mo Nan bi pakon ware, án yo nggiwa syun semda ne wé kadit pa ne nde.”

17Yefun Yesus ki do, ”Mban! Nin gare, nin yo onyar kem ri mo Yefun nde, nin su krat teker ware! Ji bambrai wa Ji ben Ji bi suk-i njep si nin o it! Kam ot, ete bere Yefun Allah nai Ji wé kadit nin ne? Nin gwat pa ne ma mo Ji et.” 18Yefun Yesus ndantom semda ne sombok wé kadit pa ne. Sugane pa ge re.

19Orete Yefun Yesus bi pakon ma ku An wadigan ete ndobot do, ”Men yo nggiwa syun semda ne wé nde wa suma ne?”

20Yefun Yesus ki do, ”Nin yo onyar kem mo Yefun krat tep wa ben pa ne ge nde. Suk gato Ji ki ré suksangge anare, nin onyar kem mo Yefun wokgan sor re, saga sawi gro wokgan ne, bere nin ku suktinggi tep wa nin syogat bobuk ré do, ’Nan mu kem motu et!’ orete bobuk ne mu re. Bere nin nggiwa ben suk mwa ne sino. [ 21Wo men ki suk su Yefun Allah, ete men mewa men nggwa kadit sugit yei, sane sa, bere men nggiwa syun semda ga sane wé.]”

Yefun Yesus ki subot kam gato bere An kwop su ne wam dik yo o

(Mrk. 9:30-32; Luk. 9:43b-45)

22Pakon bok ne sino sum mo bur Galilea sa, Yefun Yesus ki nai án do, ”Bere yeko ma wa but Yetu bi Pa to Ji ré, ete 23yé gu Ji kwop wé. Yé gu Ji kwop, sarewo kom mo kam we rek bere Yefun Allah sun Ji kadit sukkwop o re.”

Pakon jam sukdu ne sa, án kwabom dek subot sukdu ne ndo nde.

Yefun Yesus bi pajak mo Yefun Allah bi nu

24Yefun Yesus si bi pakon ma kom mo kota Kapernaum, orete yé gato sum sugum pajak wa Yefun Allah bi nu ma ku Petrus ete ndo do, ”Nan bi yeguru, bere bi sugum mo Yefun Allah bi nu bi pajak bado, nde e?”

25Petrus ki do, ”Bere yenggras ne bi.”

Petrus sok mo nu mit sa, Yefun Yesus ki nai an nyim do, ”Simon, nan bi sukjimnut sa u subot Ji bi sukdu ré ne? Yepasye mo bur ré nai suk tepsu pajak kadit an dakai bi nje-i, bado, an nai kadit yedamok bok yo gato ma kem mo pe ne, e?”

26Petrus ki do, ”Bere yepasye nai kadit yedamok gato ma kem mone.”

Orete Yefun Yesus ki do, ”Sane yepasye dakai bi nje-i ne yo bi nde. 27Wo kapre men yé gato Yefun bi nje-i yo bi nde, sa ndo sa, men bi pajak ne sor, subere án yo maskwa men daret nde. Sane nan mu paper em et. Nan do tik boge dofutmo, ete nan kak boge ne syokwet yo, bere nan ku sugum det dik yo mone. Sugum ne bere tep wa Ji si nan bi pajak ne sino, sane nan gwat sugum ne, ete nan biwa men ka we bi pajak et.”

Currently Selected:

Matius 17: KGR

Highlight

Copy