Yohanes 2

Yé konwa sukra mo kota Kana

1Kam we rek o, yé konwa sukra mo kota Kana mo Galilea. Yefun Yesus bi im si nje konwa sukra mone dom. 2Ye kendo Yefun Yesus si bi pakon mu sino dom. 3Ye konwa sukra ne sa, nau anggur rom yo tep wa yé mwa da nde. Nau ne or sa, Yefun Yesus bi im ma ki nai An do, ”Nau ne or re.”

4Yefun Yesus ki nai bi im do, ”Im, nan ma ki napyo wa Ji jam wa suma ne? Su ré yo tepsu bi kam-i wa Ji ben suk gato kadum Ji bi suktinggi nde tó.”

5Sarewo Yefun Yesus bi im ki nai nje gato fro suk mone do, ”Suk gato An ki nai nin, nin benbot sor.”

6Mo pe ne ye grem sukbo mumat wa yé rin syur mó. Sagana ye Yahudi yo sok ari nde tó, yé de syur gato yé rin mo sukbo ne. Yé rin syur mo sukbo ne ses yo, bergan tepsu liter wotin dik mo sukbo dik. Sugane sukbo mumat kwop mone. 7Yefun Yesus ki nai ye gato fro suk mo sukra ne do, ”Nin rin syur mo sukbo bok ré ses et.” Sane yé ne mu gwat syur ma rin mo sukbo bok ne ses kai. 8Orge Yefun Yesus ki nai án do, ”Nin nai syur napyo, nin gwat mu syo nai yesu mo sukra ne da et.” Án en syur wokgan, ete án gwat mu syo nai yesu mo sukra ne. 9Án gwat mo yesu ne sa, Yefun Yesus ben syur ne frus tepsu nau anggur. Yesu ne da syur gato ré ne frus tepsu nau anggur ne wokgan mó. (Yesu jam nde nat gato yé nai nau ne kadit u ne, wo ye gato gwat syur ma ne sor ete jam.) Sane yesu kendo yebris gato kra ne ma karowa an, 10ete an ki nai yebris ne do, ”Yé konwa suk yo it yo, sagana yé fro nau gato wik wa yé da nyim. Orete yé da nau gato wik tep mó it, yé gwat nau gato yo ndo teker nde ne wa yé da wari o. Sarewo nan sa, nan grem nau gato wik wai ré kwop sor kom more, ete nan syo nai men da.”

11Yefun Yesus ben syur tepsu nau anggur rom ne mo kota Kana mo bur Galilea. Yefun Yesus ben suk doketke gato ben yetu yeket mone. Yefun Yesus kadum An bi Ai bi suktinggi bor wa yetu jam mone. Sane anato An bi pakon onyar kem mo An.

12Or o Yefun Yesus si bi im, si bi nji, si bi pakon án sino mu mo kota Kapernaum. Án kem mone kam bok yo rek.

Yefun Yesus sok mo Yefun Allah bi nu mit

(Mat. 21:12-13; Mrk. 11:15-17; Luk. 19:45-46)

13Karowa ye Yahudi bi Kam Sye Waiket sa, Yefun Yesus mu mo Yerusalem wa An simo kam sye ne. 14Kom mone sa, Yefun Yesus ku yé gato so suk mo Yefun Allah bi nu de mo ros de mit ne. Yé bok ne so sapi e, domba e, ndabu e ne. Yefun ku ye gato win sugum su sugum wok ne kem mo bi meja de. 15Sane Yefun Yesus jamji bus muk we bot yu, tepsu kwe kwam. Orete An syun suge mwa ne mu mo nden, sapi si domba ne sino titi mu mo nden kadit Yefun Allah bi nu. Sugum wok gato ye grem wa win sugum sye su ne Yefun Yesus brek bi meja sane sor sugum ne ges mo bur o re. 16Yefun Yesus ki nai ye gato so ndabu do, ”Nin nai ndam ré mu mo nden se!. Nin ben Ji bi Ai bi nu ré tepsu nu gato yé so suk mo ne nde.” 17Sane Yefun Yesus bi pakon napakom Yefun bi sukdu kwa dik yo sare do, ”Ji jimnotbot Nan bi nu sye teker, tepsu bot git Ji mit.”

18Ye Yahudi bi yepasye syogat Yefun Yesus do, ”Nan kadum Yefun Allah bi suktinggi bor. Nan ben suk gato ben men yeket wa men me bor et, subere men jam do, sangge, Yefun Allah bes Nan ete syo suktinggi nai Nan wa Nan syun suge mwa ne mu nden wé kadit nu ré.”

19Yefun Yesus ki nai yepasye ne do, ”Nin tarak Yefun Allah bi nu ré, bere kom mo kam gri rek Ji nggo satu or re.”

20Ete yepasye ki nai An do, ”Nu ré men nggo nam, kom mo tahun musyu at sop mat ete or. Sarewo Nan ki do, Nan nggo nu ré kom mo kam gri rek sor re ete or, bado?”

21Ye Yahudi bi yepasye ne nut do, Yefun Yesus ki subot Yefun Allah bi nu, ondewo Yefun kibot An dakai kaim sor re. 22Sane kam gato Yefun Yesus sun kadit sukkwop or wé, ete An bi pakon napakom sukdu gato An ki ne. Sane án onyar kem mo sukdu gato yé krom mo Yefun Allah bi sukdu si sukdu gato Yefun Yesus dakai ki ne sino dom.

Yefun Yesus jam yetu mwa ne sino

23Yefun Yesus kem mo Yerusalem. An simo Kam Sye Waiket sa, yé mwa onyar kem mo An, we yé mwa ne yeket suk gato Yefun Yesus ben gato kadum An bi Ai bi suktinggi bor wa yetu jam mone. 24Sarewo Yefun Yesus yo onyar kem mo yé mwa ne nde, we An jam yetu mwa ne sino it. 25Yefun yo mitmo yetu ge dik yo ki rer nai Yefun Yesus jam subot yetu nde, we An jam yetu mit si onyar sino re.

Currently Selected:

Yohanes 2: KGR

Highlight

Copy