MATIUS 19

Liajha Yesus jhara lu pehagghi

(Mrk. 10:1-12)

1Ta tuu le hari-hari ne lipedhiri Yesus do na harre, ta hane ke ri No Galilea, jhe kako la ihi rai Yudea pa hebhakko Loko Yordan. 2Ae ddau ne do pedute No. Pa anne ae ne ddau do peie ri No ti dhara lua paddha ro.

3Moko ta dakka ke ne do Farisi he ta kale-kale ne hala Yesus. Ta kebhali ke ro, ”Pedutu nga uku aigama di, ie marra hino ddau ta pehagghi nga ihi-ammu no, jhe ne nga ke ne do ta pake mii era jhalli?”

4 # Kej. 1:27, 5:2 Ta bhale ke ri Yesus pa ro, ”Ajha de dho mu pa dhara Buku Lidara-Likewahhu Deo, ta do ne Mone woro-Mone panynyi ddau raiwawa, pa petari rai, ne tao ddau raiwawa ta momone nga mobanni? 5#Kej. 2:24 Jhe alla penaanne ta lii ke No, ’Rido mina harre ke, hakku momone do ta hani ke ri no ne ina-ama no, jhe jadhi ta hahhi nga ihi-ammu no, moko ro hari do dhue do jadhi ta hahhi ke.’ 6Hakku ro adho ke ta dhue ddau ri, tapulara do jadhi keta heraa-hemanynyi. Rowi do mina harre ke, ne nga ne do alle pepeheujhe-headde ri Deo ta jadhi hahhi, ie dho ke ta pehagghi ri ddau raiwawa.”

7 # Ul. 24:1-4; Mat. 5:31 Moko ta kebhali ri ke ne do Farisi he, ”Ki do mina harre ma, ta nga hakku lii Musa pa ddau he ta wie huri pehagghi pa ihi-ammu do alla pepehagghe ri no ne?”

8Ta bhale ke ri Yesus, ”Hakku wie lua ri Musa pa mu ta pehagghi nga ihi-ammu mu taga tari lua keti-ketinga mu. Tapulara ne pa petu ne, adho mina harre rai ti petari. 9#Mat. 5:32; 1Kor. 7:10-11 Hakku dhanno ko we nadhe: Nadu do pehagghi nga ihi – ammu no – jhe do adho ma ne mo banni monanni do naanne do hala ne loro jhara kako, jhe banga-ammu ri ne momone do naanne nga mobanni do wala, moko ne ddau do na poanne, ddau do kenyo-langa huka ke.”

10Moko ta lii ke ne ana hekola Yesus he, ”Ki do mina harre ke ne lua pedu momone nga mobanni, rihi ie ta bhole tenge we ta banga-ammu.”

11Ta bhale ke ri Yesus, ”Ne lai napoanne nara dho ta hammi ri hari-hari ddau, titu wata ke ri ddau-ddau do alla pepetatu ri Deo we. 12Rowi era ddau do dho nara ta banga-ammu, rowi do mina harre ke no rai ti awe ta metana, Era lema do dho nara ta banga-ammu, taga tari do mina harre ke ne tao ri ddau do wala pa no. Era lema ri lua ddhei miha ta do dho wae ta banga-ammu, mita nara ta pekako lua jhagga Deo. Ddau do nara ta hamme ne liajha do nadhe, hane we pehamme ri no ma.”

Yesus wie lua tarro ie-menyarro mangngi pa naiki-naiki

(Mrk. 10:13-16; Luk. 18:15-17)

13Ta era ke ne ddau-ddau do nga aggu ne ana-ana ro la nga Yesus, mita ie ta takke ri Yesus ne ruai No pa wokolo ro jhe hebhajha tu ro. Tapulara ta bhani ke ne ana hekola Yesus he nga ddau-ddau do na harre. 14Moko ta lii ke Yesus pa ana hekola No he, ”Hani ro ne naiki do napoharre pe dakka ma nga Ya! Bhole labba ro. Rowi ddau-ddau do mina hedhe ke, ne do ta jadhi annu niki Deo.”

15Moko ta takke ke ri Yesus ne ruai No pa wokolo naiki do na harre, jhe wie pa ro ne lua tarro ie nga menyarro mangngi. Ta alla pemina harre ta pekaddhi ke Yesus ngati anne.

Heddau do ngarru do kaja

(Mrk. 10:17-31; Luk. 18:18-30)

16Pa dhara helodho ta dakka ke heddau momone la nga Yesus, jhe lii no, ”Ama Guru, wui ai-wui tao ne nga ke ne do woie, do jhamma ta tao ri ya, mita nara ta hamme ri ya ne muri mada do peloro ne?”

17Ta bhale ke ri Yesus pa no, ”Tanga au hakku kebhali pa Ya, jhara lai ne nga ne do woie? Titu wata Heddau we ne do woie. Kiri do ddhei au ta muri mada, do jhamma ke au ta pedute ne lipedara Deo ne.”

18 # Kel. 20:13-16; Ul. 5:17-20 ”Lipedara do nami ke ne do naanne?” ne kebhali ddau do naanne.

Ta bhale ke ri Yesus, ”Bhole pemade ddau, bhole kenyo langa huka, bhole me na'o, bhole jadhi hakahi pote, 19#Kel. 20:12; Im. 19:18; Ul. 5:16 takka pekerihi we ina nga ama, jhe hajhaddhei we nga ddau nga ddau ihi-anga mii ddhei nga ngi'u au miha.”

20”Hari-hari ne lipereda do napoharre alla ke ri ya pepedutu. Nenga ri ko ke ne do ta kale ri ya?” bhale ri ddau do ngaru do naanne.

21Ta lii ke Yesus, ”Ki do ddhei au ta jadhi ddau do keteme, kako we au la pewie hari-hari ne unu-oha au. Jhe ne kebhue na harre, pebhagi we ri au pa do kehia nga gahara, moko do ta hamme ke ri au ne puhaka do pa era do mmau do megala ne. Ki moko mina harre, mai we au ma pedute Ya!”

22Ta rangnge ri ddau do naanne ne lipedai Yesus do mina harre, ta langnga ke no tianne nga dhai hedui ne ade no, rowi do dhai kaja no.

23Moko ta lii ke Yesus pa ana hekola No he, ”Ne lii Ya pa mu, dhai hedui tu heddau do kaja ta jadhi ai-alla annu-niki Deo. 24Jhe na dhe ri ko ne do ddhei ta pale ri Ya pa mu: do rihi memudhe hengi'u unta ta maho jhara wui-wohe ajhu jhau, ngati heddau do kaja ta maho la dhara Raiwawa Deo do Wowiu ne.”

25Ta rangngi ri ana hekola Yesus he ta do mina harre, ta madalae ke ro, jhe lii, ”Ki do mina harre ma, nadu he ke ne do ta nara ne lua helama ne?”

26Ta katarri ke ro ri Yesus jhe lii, ”Tu ddau raiwawa nara ta do dho jadhi tapulara tu Deo do i'a jadhi he we.”

27Moko ta lii ke Petrus, ”Heleo ko we ri Ama, hari-hari alla ke ri jhi pehani, jhe mai ma pedute Ama. Ne nga ne do ta hammi ri jhi?”

28 # Mat. 25:31; Luk. 22:30 Ta lii ke Yesus pa ro, ”Parahajha we mu, Pa Raiwawa Deo do Wowiu ne, Ana Ddau Raiwawa do medae ta mejaddhi pa kedera era mejaddhi No do dhida do kelodo ne. Pa dhara awe naanne ke, mu ne ddau-ddau pedute Ya do ta mejaddhi pa dhida henguru dhue bhue kedera, jhe pehappo ne hala henguru do dhue huhu do Israel. 29Jhe nadu we do alla pehani ammu nga kemali, tuahhu no momone nga mobanni, ina nga ama no, unu-oha no, lada maa no taga Ya, do ta hamme ke ri ddau do napoanne hengahu wari lipa. Hari lema do ta hamme ke ri no ne muri mada do peloro ne. 30#Mat. 20:16; Luk. 13:30 Tapulara ae ddau do uru jhara pa dhara awe nadhe do medae ta jadhi ta do pedakka rahi, jhe do pa dhara awe nadhe do letto-takka do ta jadhi ta do uru jhara.”

Currently Selected:

MATIUS 19: LAIHVN

Highlight

Copy