ZAKHARIA 7
7
Eberogo mene lek oba nen sumburu ninggi'lek hilingitarek mene faget inenggali watikhe wene
1Hun Darius raja menlagaikhesik ferinarek werek kwelek enek he tahun enggaminogonek meneba tugi sogo mene enu Kislew tanggal empat meneba were'ma, Tuhan nen nekhengge wene yi'nogo ino iluk, an yaganete.
2Afuni o Betel werek mene nen he Sarezer inom Regem Melekh inom nen it inagoromi inom Tuhan nen fanotninabin iluk yagasi loageluk o Tuhan Omame Mondok Hokho mene were'ma iluk agarek awiba omanogo lakfisa wagaikha. 3A'nogo lakfisa waga logolik, ”O Tuhan awiba meisalkhukwa mene andi faget niren tahun hundik-hundik andoma tugi fuap meneba werek kwelek he sumburu ninggi'lek ninambe pok welago aremnogo hakhogo logouwoga? Iluk imam inom, nabi inom inoba heinok woginabi lano,” iluk lakfisa wagaikha.
4A'nogo hilingitama Tuhan nen wene an noba fikhi logolik, yi'nogo yagaisano iluk yaganete mene re yi: 5”Afuni o kweang yiba werek mene inebe mondogat inom, nen it imam lak inoba yi'nogo yagaisano, iren tugi fuap meneba inom sabit meneba inom hinambe pok welagik, le yagaisogo welagik, hilingitu werek kwelek enek tujuh puluh tahun hilingiti lagaikha mene andi re iren An nobaget esinet nobagaikhi logolik hilingiti lagaikha re lego. 6Nen ekhe iren inamburu ninggik, inagai ninggik, hilingitu logolik it inoba homot fisikherek mene omanogo nek herarik laga lagaikha o, iluk ikhe yagaisano, ugunem higi.
7Andi re Tuhan nen ap nabi bene nen o fem attak-attak andoma o Yerusalem oba afuni inebe inangge sik-pikhogo were'ma welagaukwaba andoma a'nogo yagaisikhi lagaukwa. Andem oba afuni re o kota nen esanggo-esanggo andoma re welagaukwa lek, we abel selatan fikhit inom, barat fikhit inom he, tom alemkwe andoma nek welagaukwa.
Wene sagalogo hilingitukwaba hele warogo lakfisasikhe wene
8At Tuhan Omame Mondok Hokho welagarek mene a'nogo nen an noba wene yi'nogo yagaisano iluk yaganete, 9”O attak andoma nenat tahun mondok hokhorogo hilinglarik wagaikhe andomaba nen engge An nawene melalek yi An nagainafuri mene inoba yagaisilik wagirek andi. An nen yagaisikhi logolik, ’Hit hinobabut higithogo nek hilingitik, hinendawi hundik hilinginafik, hinagaila'lak hinom nendawi-hendawirogo welagik hilingiti logoino o. 10Nen it hemi sogwe mene inoba inom, yenggerugwi suarek mene inoba inom, ap pok hit hinanggelekwe werek mene inoba inom, athe it ekhe inoba enggin-fenggin werek mene inoba inom, hinomameba sebelinarek logou fuk. Nen, ekhe afuni hinom welagep mene inoba weak mene hilingfisogoin iluk inabok palu fugat,’ iluk yagaisikhi lagaat.
11Oba nen he An nagainafuri inendawi mondok omame logolik iren holu re inabit mondok welagaikha, nen holu inabiren he inesanggo to'moti lagaikha. 12It he inendawinggen mondok omamerek logolik were'ma nen enek he inendawinggen mondogat helep aga lagaukwa. Nen an nawene melalek it ap nabi attak welagaukwa mene omanogo inebene nen wogisasigiba nen he hologo hilingiti lagaukwa lek andi nen he An na'mage lagaikhi lagaikhe andi. 13An nane ikhi lagagi mene holhi lagaukwa le'ma re, iren samban oba An nayonggo fikhi lagaukwa mene ogore holhi lagagi legat andi. 14Sogoi sielu nen hakhogo An nen furisugunem he ninggi'nogo hilingisugun iluk o kweangma afuni pok mene inaiba omanogo laluk welagaukwa. Kweang mondok fano mulire'ma yi nogore afuni werek lek oba, inareng tiring-terengse'ma unggulasili wagane'ma hilinglaga andi o,” iluk yaganetunem holhi.
Currently Selected:
ZAKHARIA 7: inohap
Highlight
Share
Copy
Want to have your highlights saved across all your devices? Sign up or sign in
