ZAKHARIA 6
6
Kereta weim yafarek mene ebe enggaminogo nen were'ma abikanggoba hasikhe wene
1An nabikanggo amu mene ekhe wokhigi re yi'nogo. No kereta weim yafarek mene re ebe enggaminogo mene tom unggul pire mene honggolek elekwe nen wulibi wagunem isigi. Tom andem oba re no tembaga welagarek andom. 2Kereta andem ebe re kuda inom wuthigik hilingi'mo re, attak mene andi re kuda esi mep mene, nen ombo'ne kuda pirenek mene andi re esi eil sinduk mene,#Why. 6:4, 5 3nen kuda henaganek mene re esi mola mene, nen enggaminogonek mene re kuda esi ambigit waganek mene, andem en lisogo woginarek lagunem isigi.#Why. 6:2 4A'nogo higirik an nen malaikat a'nogoba heinok wokhikhi logolik he, ”Noe kereta weim yagarek mene oma re ninggi'nogo faget nogo?” iluk heinok wokhigimo re,
5aren onggo yaganeti logolik, ”It he Tuhan pogot kweang elalhikhe mene a'nogo inom ambi agaikhasik he o kweangma yoma unggut enggaminogo aremnogo higithogo lili'lagwi ari o,” iluk yaganete.#Why. 7:1 6Kereta weim yafu mene kuda esi sinduk mene nen li'luk laga-laga mene a'nogo re o Babel abel utara fikhit andoma lagunem higi. Nen, kuda mola mene a'nogo re elokhe waganogo o abel barat fikhit laga-laga. Nen kuda ambigit waganek mene a'nogo re o selatan fikhit andoma lagunem higi.
7A'nogo higimo nen he, kuda esi ambigit waganek mene a'nogo wulifunem aremnogo re, iren o kweang yoma mondogat ineil kogolik louwogeluk he weak-weakhogo nek set kwalhunem isigi. A'nogo hilingitunem he at malaikat a'nogo nen he o kweangma mondogat hineil kogolik lani o!” iluk yagaisugunem, it a'nogo laga lagaikha. 8Andi nen at malaikat a'nogo nen an noba yaganeti logolik he, ”Kuda o Babel laga mene andi nen he Tuhan a'mage werek mene a'nogo sebelogo fikhe o,” ugunem higi.
Yosua unggul oba kware-kware puget fouwageluk yagatikhe wene
9 Tuhan nen an noba yi'nogo hilingi'no iluk yaganete. 10Aren ikhi logolik he, ”It ap o Babel en yogondagat sugulogo wagaikha mene, hun Heldai inom, Tobia inom, Yedaya inom, inomen An nobaget faga mene andoma wanin o. Wanimbik he faga mene andoma re weak-weak o hun Zefanya amlogo Yosua aiba andoma waluk lan o. 11Iren faga mene emas inom perak inom andoma mene re makhota misik ekhe hilingisimbik he hun Yozadak amlogo Imam Agung andi ungguloba puget feino. 12A'nogo hilingfembik he at yagati logolik, An Tuhan Nomame Mondok Hokho welagirek mene a'nogo nen ikhi logolik, ’Ap enu Asimit ikhi logogun mene andi nen he at ebe logogin huli andoma yi'nogo ti'nogo hilingiti logogin mene ambisangma fanorogo nek hilinglaga logogin o, nen aren he o Tuhan Awi a'nogo nekhengge wusigin.#Yer. 23:5, 33:15; Za. 3:8 13Aren athe An Nawi andi wusimbik ap raja legeisogo fisagarek hakhogo at a'nogo legeisogo foumo re, aren afuni at againafuri mene melalinafu logogin o. Nen, ap imam misik ekhe re at inom lebet-lebet hilingiti logolik, it inebe re emberek seberogo nek yabu hilingitu logogun,’ iluk yaganete. 14Mahkota andi An nailoba andoma fembik he Heldai faget inom, Tobia faget inom, Yedaya faget inom, Yosia faget inom inobaget ebeti logogun. 15Afuni re inebe o yat-patkwe nen we'luk An nawi andi wutunem leberisa waga logogun. Nen, o andi mondogat wusugun halok he, An Tuhan Nomame welagirek mene a'nogo nen hat it inoba lakhobagai wagi mene andi inelu asugun. Andoma mondogat he, iren An ineisena Tuhan Allah nawene melalek andoma fi-furogo futfuluk hilingitu halok enek he a'nogo hilinglasigin o,” iluk yaganetunem higi.
Currently Selected:
ZAKHARIA 6: inohap
Highlight
Share
Copy
Want to have your highlights saved across all your devices? Sign up or sign in
