MATIUS 8

At Yesus nen ap ekhe oumo henanggo hangge inailo mene were'ma fano higitikhe wene

(Mrk. 1:40-45; Luk. 5:12-16)

1At Yesus tom oba nen pi wagaikhemo re, afuni esa hokhorogoat at ombo'ne lagaukwa. 2Lagunem he, ap ekhe oumo henanggo hangge inailo mene oba welagaikhe mene a'nogo Yesus oba wagaikhesik he, eindep awi yakfesikhesik, mel yagatikhe: ”Yesus noe. Haren fano higitnabigin anggegen halok he, elok fano higitnabin aro,” iluk yagatikhe. 3A'nogo yagatikhemo re, at Yesus nen ap a'nogo enggi fakfesikhesik he, ”An nen fano higithabigeluk ikhi lagi. Halok he, hoba fano ame o,” iluk yagatu kwelek aremnogoat oumo henanggo hangge inailo mene a'nogo mondok legagaikhesik ebe fano agaikhe. 4Fano agaikhemo at Yesus nen he, mel yagatikhe: ”Haren he, Yesus nen yi'nogo higitnafe, iluk, afuni ekhe mondok yagaisagun o. We, ap Allah eisewerek mene nen eilenggen heowagen oba lambik yi'nogo hilingi'no. At Musa nen ikhi logolik he,

Afuni inoba fano a'luk, Allah faget yi'nogo feino, iluk isikhe higithogoat fisugunem futhobagauwagen he, ekhe fisa lano o,” iluk yagatikhe.#Im. 14:1-32

Yesus nen ap tentara mene inoe amingmingengge ekhe ou higitikhe wene

(Luk. 7:1-10; Yoh. 4:43-54)

5A'nogo yaga'luk he, o Kapernaum kugunem he, ap tentara mene inoe kain ekhe Yesus oba wagaikhesik he, ane elagaik ane mel yagatikhe: 6”Noe! An namingmingengge ekhe enggi eisok wut warek mene oloba wengik mondok logolik he, heinet hokhorogo wari'logo,” iluk yagatikhemo, 7at Yesus nen he, ”An nen fano higisi wesigin o,” iluk yagatikhemo re, at ap tentara mene inoe kain a'nogo nen he, 8”Eige! Noe. An ap yenggeregatma, hat an naiba kwi lagain elo'lego. Halok he, hebe ya nen hane nek healumo re, an namingmingengge mene andi fano asigin o. 9An ogo re, nogogwi kaindek inawe a'ma logolik inane holhik, nen, an nagoromi tentara menere nawe a'ma logolik nane holhik, hilingiti lagoma re, an nen at ekhe ”Lan o,” iluk yagati halok he, lili'lago aro. Nen at ekheba, hat eme o, iluk yagati halok he, weri'lago aro. Nen, namingmingengge ekheba, yi mene hilingisin iluk yagati halok he, nane higithogoat hilingiteregaro,” iluk yagatikhemo 10at Yesus esanggo holhikhesik he, afuni at ombo'ne lagaukwa mene omanogo mel yagaisasikhe: ”Eige! Ap yi endawinggen noba eberogoat himbiret fikhe andi hak, it afuni Israel mene ekhe inendawinggen a'nogo himbiret fugunem isigirek lek mene nailo e, iluk eberogoat yagahisigi o.

11Nen, ekhe yi yagahisak. Afuni inebe hokhorogo po'lima nen, ma'lima nen, Allah awe a'ma kwimbik he, Abraham inom, Ishak inom, Yakub inom, seni isago nouwogeluk andogosi kugun.#Luk. 13:29 12Mene re, it afuni Israel mene andi re, o andoma irat eisewerek asugun meneat he, enda'ma o mum hikhakse'ma andoma lakfisamo re, inaik himbirogo li ago le ago mondok logogun o,” iluk yagaisasikhe.#Mat. 22:13, 25:30; Luk. 13:28 13A'nogo yagaisasikhesik he, ap tentara mene inoe kain a'nogo mel yagatikhe: ”Hebe lan o. Hat hendawinggen noba himbiret fuluk, hendawimo nen he,

Yi'nogo fano higitnesigin iluk anggegen andi hagat hilinglasuago,” iluk yagatu kwelek aremnogoat he, amingmingengge mene a'nogo oba fano asi lagaikhe.

Petrus eamalhe inom, afuni fena inom, Yesus nen ou higirinafikhe wene

(Mrk. 1:29-34; Luk. 4:38-41)

14A'nogo hilingitikhesik he, at Yesus Petrus aiba lagaikhesik yethasikhe hak he, he Petrus eamalhe oba aganhan hokhorogo weregen he, wengik were'ma eilenggen hasikhe. 15Hasikhesik he, enggi at he andi enggiba fakhasikhemo re, oba aganhan hokhorogo welagaikhe a'nogo legagaikhe. Legagaikhemo, he a'nogo menlagaikhesik he, at Yesus lebethikhi lagaikhe.

16A'nogo hilingitu kwelek, o arat hubagaikhemo re, afuni munggwarengge inobabut weak mene inendawimo kwisukwasik welagaukwa mene woginarek Yesus oba wagaukwama re, at ane misigamat isikhemo munggwarengge inobabut weak mene inendawimo nen henegeisogo wulakfisigik, ou weak mene ekhe higirinafik, isikhe. 17A'nogo hilingitikhe andi re, at Yesaya Allah ane yagaisikhi lagaikhe mene a'nogo nen lisu palhi logolik he:

”Nit yi ou ti ou wanhorek mene andi aren waganogo legetfisigik,

ninomame li'-lek a'luk weak agorek mene andi higitninafik, ikhe o,” iluk isikhe andi higit asuageluk hilingitikhe.#Yes. 53:4

Afuni Yesus ombo'ne lagaikharek wene

(Luk. 9:57-62)

18Afuni hokhorogoat Yesus eilhanem wagaukwama eilenggen yerisasikhesik he, at agoromi ane wanhi lagaukwa mene omanogo mel yagaisasikhe: ”Nit e so warogo i aik elikwe wulibi louwogo,” iluk yagaisasikhe. 19A'nogo yagaisasikhesik were'ma, it ap Allah ane lisu palek eisewerek mene ekhe Yesus oba wagaikhesik he, mel yagatikhe: ”Noe. An he, hat koma kwe lagen halok he, hombo'ne mondok nikhi logogin o,” iluk yagatikhe. 20A'nogo yagatikhemo, at Yesus nen he, ”Olo mene andi re, awi wuri'mo welagarek. Nen, sue tarogo nikherek mene andi, awi wurik welagaregat. Mene re, an abat ta'lasi wagagi andi nek he, nogo ikhi logogin oba nawi wurik he, mondok lego,” iluk yagatikhe.

21A'nogo yagatikhemo re, ap at agoromi inom nikhi lagaukwa mene agot ekhe nen he, mel yagatikhe: ”Yesus noe. An neisena wa'lagasik werek yinaga tak kweangma sali lagen he, haren, Lan iluk, yaganom o,” iluk yagatikhe. 22A'nogo yagatikhemo, at Yesus nen he, mel yagatikhe: ”Herakfisaluk he, an nombo'ne eme o. Warek mene halok he, it afuni inebe warek mene hangge werek mene andoma nenat salinafi logouwago,” iluk yagatikhe.

Yesus nen i ha'labu hokho mene hambuget fesikhe wene

(Mrk. 4:35-41; Luk. 8:22-25)

23A'nogo iluk he, at Yesus ebe e so elema kwisikhemo re, at agoromi ane wanhi lagaukwa mene omanogo inomat kwisukwa. 24Kwisukwasik e so elema lagunem he, sogoi aninirogo funha wagaikhemo i ha'labu nen e so a'nogo wati logolik elema yenggeli kugu kwelek, at Yesus he, nogo ikhi lagaikhe. 25Nogo ugunem, agoromi era'lu wagaukwasik eluget hikhi logolik he, mel yagatukwa: ”Yesus. Nit ima pugun yi, telninabino,” iluk yagatukwa. 26A'nogo yagatukwama at Yesus nen he, ”Nenahalok hinailo aga lagep? Hinendawinggen an noba himbirik welagep lek yi ri!” iluk ane ilik-ilik menlagaikhesik he, sogoi a'nogo inom, i ha'labu a'nogo inom, ”Habolok,” iluk wenagetikhemo, abolok mondok legagaikhe.

27A'nogo hilingitikhemo re, it agoromi ane wanhi lagaukwa mene omanogo nen fogerati logolik he, mel isukwa: ”Egi! Ap yi sa anggegep. Sogoi inom, i ha'labu inom, at ane hologo legaga andi ninailo e!” iluk fogeratukwa.

Ap inebe pire inendawimo munggwarengge inobabut weak mene kwisukwasik were'ma Yesus nen henegeisogo wulakfisasikhe wene

(Mrk. 5:1-20; Luk. 8:26-39)

28Hobuk, i aik eliba afuni o Gadara mene inaiba wulifukwa hak he, it ap inebe pire mene inendawimo munggwarengge inobabut weak mene kwisikhemo welagaukwa mene, afuni warek fisagarek oba andoma nen Yesus oba wagaukwa. It ap andi inobabut mondok weagen afuni it inailo nen andi kwe mondok laga lagaukwa lek meneat he, Yesus wagaikhemo re, oba wulibi wagaukwasik he, 29inane hokhorogoat mel yagatukwa: ”Allah amlogo yi. Haren he, nit ninggi'nogo hilingninabigeluk wagen. Nit ninoasigin oba oan werek kwelegat he, hat tak ninoasigiluk wagen yoma ri!” iluk yagatukwa.

30Andi sambul o andoma era'lu horogat wam mondok hokhorogo inamisang wanhi lagaukwa. 31Wanhu were'ma, munggwarengge inobabut weak mene it ap inebe pire aremnogo inendawimo logolik he, mel yagatukwa: ”Yesus. Hat he, nit ninebe wulakninobagaigeluk halok he, wam hokhorogo inamisang wili'lagwi a'lima inendawimo kwalasi logoin nen he, lakninobagain o,” iluk inane liokhogo yagatukwa.

32A'nogo yagatukwama re, at Yesus nen he, ”Halok he, lani o,” iluk yagaisasikhe. Yagaisasikhemo, it munggwarengge inobabut weak mene ap aremnogo inendawimo nen henegeisogo wulibi lagaukwasik he, wam hokhorogo inamisang wanhi lagaukwa omanogo inendawimo kwalasi lagaukwama, wam omanogo mondok felelenghogo i kat oba nen lurogo i yenggele'ma kwisukwasik i mondok lagaukwa.

33A'nogo lagaukwama re, it afuni wam kwalogo welagaukwa mene omanogo inailo agaukwasik, ”Yi'nogo hilinglaga o,” iluk yonggo o sili hokhoma fungusek lagaukwasik he, it ap inebe pire aremnogo inabok inomat pilingisogo yagaisasukwa. 34A'nogo yagaisa lagaukwama re, it afuni o andoma welagaukwa mene Yesus ha wagaukwasik he, ”Hat hebe, o yoma logogin lek. Lan o,” iluk inane liokhogo yagatukwa.

Currently Selected:

MATIUS 8: inohap

Highlight

Copy