MATIUS 7

”Hiren wene it ekhe inoba fogoin lek,” iluk yagaisasikhe wene

(Luk. 6:37-38,41-42)

1A'nogo yagaisasikhesik he ekhe mel yagaisasikhe, ”At Allah nen wene hinoba fuluk weagethinabinogo iluk he, hiren afuni ekhe wene inoba fuluk weagerinafubo. 2Hiren wene it ekhe inoba fikhi lagep andi hak, at Allah nen a'nogoat wene hinoba fagain aro. Nen, hiren ilirengge walfuluk it ekhe wogisikhi lagep andi hak, at Allah nen ilirengge andibaat walhaluk wokhisagain aro.#Mrk. 4:24 3Hit hinonggwarek hineilenggenma e hokho obakhe palek mene werek andi kwelakhigi'lek logoligat he, it hinerugwi hinagaila'lak ekhe ineilenggenma ilingal endep mene kuluk were'ma wogisuogeluk kwelagisikhi lagep andi nenahalok. 4Hinonggwarek hineilenggenma e hokho mene palek walurek logoligat he, hinerugwi hinagaila'lak andi yagaisikhi logolik: Heilenggenma ilingal kwikhe mene andi wokheak, iluk ugun nogo? 5Hinagap oba nek fano hangge logolik hinendawinggen pire yi ri! Hinonggwarek hineilenggenma e palek hokho mene andi tak wokhambigen, hineilenggen arat selek aga halok he, hobuk hinerugwi hinagaila'lak ineilenggenma ilingal werek mene andi elok wogisogoin o,” iluk yagaisasikhe.

6A'nogo yagaisasikhesik he, ekhe mel yagaisasikhe: ”Allah faget fisagarek mene andi mene wogetunem hobuk lagakhogo aigen libilhinabinogo iluk, wogetubo. Nen, hinalilingge fano onggo hokho mene andi, wam wogetunem eisogen wolelenggen tagalogo lakfisanogo iluk, wogetubaro,” iluk yagaisasikhe.

Allah kino yagatunem esanggo holherek wene

(Luk. 11:9-13)

7-8A'nogo yagaisasikhesik ekhe mel yagaisasikhe: ”It afuni inebe lombogen Allah kino yagatunem he, aren inebe lombok wogisikherek enek andi. Nen, it ekhe inebe lombogen yi mene ti mene at oba heratunem he, inebe lombok herakhagarek enek andi. Nen, it ekhe inebe lombogen kwe ane papaget hugunem he, aren inebe lombok kwe hurisikherek enek andi. Andi nen he, hit he, Allah kino yagati logoino. Yagati logoumo, wokhisagain aro. Fano mene at oba herati logoino. Herati logoumo herasugun aro. Nen, kwe ane papaget hikhi logoino. Papaget hikhi logoumo re, aren kwe huthisagain aro. 9Hit ekhe hinagainafuri nen sumburu roti mene nele, ugu halok, ineisenalagen he, helep mene wogisikhi lagep nogo? 10I a, athe, Ikan nele, ugu halok, kisu mene wogisikhi lagep nogo a? Legaro. 11Hit hinobabut weak hilingiti lagep meneat he, hinagainafuri fano mene wogisagarek andi hinelumo re, fano mene wogisikhi lagep andi. Andi hak he, hineisena Allah pogoroba mene andi re, kino yagasugun mene halok mondok fano meneat wogisagain lek nogo? Wogisagain aro.

12Hit hinendawimo nen, it ekhe nen yi'nogo fano hilingninabilebe, iluk anggikhi lagep andi hagat, hiren it andi a'nogoat hilinginafi logoino o. Wene Allah nen Musa ayonggo fesikhesik komotninafikhe wene andi inom, it Allah nen inayonggo fugunem ane yagaisikhi lagaukwa wene andi inom, lambukhogo esin he, andi aro,” iluk yagaisasikhe.#Luk. 6:31

”Kwe endep kwe kwini,” iluk yagaisasikhe wene

(Luk. 13:24)

13A'nogo yagaisasikhesik, ekhe mel yagaisasikhe: ”Wea'ma nong akha lagaikharek andi, kwe ambe palek andi hokhoat. Nen, kwe ebe yagoba lagaikharek andi esanggo langsegatma re, afuni hokhorogoat kwili'lagwi. Andi nen he, hit kwe endebat kelokhogo yago andiba kwi lani. 14Kwe fanoma lagaikharekwe andi re, ambe palek andi endebat. Nen ebe lagaikharek andi mondok kilik-kelokse'ma afuni hokhorogo kwi la elo'lek andi nen he, inebe endebat enek kwili'lagwi andi o,” iluk yagaisasikhe.

Ineranenat lalinafarek wene

(Luk. 6:43-44)

15A'nogo yagaisasikhesik, ekhe mel yagaisasikhe: ”It ekhe ineranen Allah ane yagaisagarek mene hak hinoba wesimbik hinendawimo kagalinogo iluk he, hinebe hebelogo logoino o. It andi inelokhonggen wam domba wam ena mene hangge hilingisogo nen wesugun meneat he, inendawinggen elonggoma re, mene olo mene aik anini weak mene hangge wesugun o. 16Yi e ti e enggen iterek andiba, ero enegat hilinglagarek andi hak, iren hilinghinabugun andiba, inobabut enegat hilinglasigin andi. E panggi alok weak meneat he, enggen he, hele anggur fano mene enggen hangge itunem palharek nogo? I a, athe, hele mul alok weak meneat he, enggen he, e ara fano mene enggen hangge itunem palharek nogo? Mondok lego. 17E ero fano mene halok he, enggen he, fano meneat iterek. Nen, e ero weak mene halok he, enggen he weak meneat iterego. 18E ero fano mene nen he, enggen he, weak mene enggen isigin lek. Nen, andi hak he, e ero weak mene andi, enggen he, fano mene enggen isigin legat. 19Yi e ti e enggen fano iterek lek mene andi re, ero mugusogo endumo mondok lakfisagarego.#Mat. 3:10; Luk. 3:9 20Andi hak he, it afuni lalinafarek mene andi inobabut a'nogo hilingisugun andiba, enegat agunem futfisogoin o,” iluk yagaisasikhe.#Mat. 12:33

”Higithogo hilingiti'lek inambeba nek umo fanoma kugun lek,” iluk yagaisasikhe wene

(Luk. 13:25-27)

21A'nogo yagaisasikhesik, ekhe mel yagaisasikhe: ”Hit afuni nen, an yaganeti logolik he, Ninoe, ninoe, iluk ikhi lagep andiba hinebe mondogat, an Neisena Allah pogoroba mene awe a'ma fisikhere'ma andoma kugun lego. We, it ekhe, neisena Allah endawimo anggikherek mene higithogo hilingiri'lagwi mene andi nek kwi logoin o. 22O wurep oba hilinglasigin andi sambul he, afuni hokhorogo noba wesimbik yi'nogo yaganesugun: Ninoe. Nit he, hat henubaat wene fano wene yagaisigik, munggwarengge obabut weak mene afuni inendawimo kuluk were'ma henegeisogo wulakfisigik, hilingisu lek mene elalin mene hokhorogoat hilingitik, hilingirik nikhi lago omanogo lek nogo? iluk ugun meneat he, 23an nen fakhogo yi'nogo yagaisagain: Hit hinebe an nonggoro. Weak mondok hilingirik nikhi lagep mene andi nera'lu ya logogubo. Pugulakhani, iluk yagaisagain o,” iluk yagaisasikhe.#Mzm. 6:9

”Ap inebe pire nen o wutukwa,” iluk oba lirogo yagaisasikhe wene

(Luk. 6:47-49)

24A'nogo yagaisasikhesik ekhe mel yagaisasikhe: ”Halok he, sa nen, an nane andi esanggo hologo higithogo hilingite halok, aren yi higit hilingisigin o. Ap ekhe endawinggen werek mene nen o helep oba loukhogo wutikhemo, 25meiso hokho pi wagik, i fu hokho wagik, sogoi hokho funha wagik, isikhe meneat he, o a'nogo helep oba loukhogo wutikhemo andi nen he, sanokhogo lagi'lek kamo isikhe andi hagat hilingisigin. 26Mene re, sa nen an nane andi esanggo holhi logoligat he, higithogo hilingiri'logo lek halok, yi higit hilingisigin. Ap ekhe endawinggen lek mene nen o ial oba loukhogo wutfesikhemo 27meiso hokho pi wagik, i fu hokho wagik, sogoi hokho funha wagik, ikhi logolik, o a'nogo wathasikhemo, sanokhogo waluk laga logolik mondok meisak lambukhogo weaget fesikhe andi hagaro,” iluk yagaisasikhe.

Inesanggo holhukwasik he, fogeratukwa wene

(Mrk. 1:22; Luk. 4:32)

28-29Yesus nen wene a'nogo ilik waga lagaikhesik wene wurep kofokhogo isikhemo re, it afuni hokhorogo omanogo nen he, ”Egi! Wene ikhe andi, it ap Allah ane lisu palek eisewerek mene nen yaganisagarek hangge ili'logo lego. We, aren he, wene ebe eisewerek mene nen u hak ikhe andi, nailo e!” iluk fogeratukwa.#Mrk. 1:22; Luk. 4:32

Currently Selected:

MATIUS 7: inohap

Highlight

Copy