YOHANES 5

Yesus nen, ap ekhe oba ou mene i Betesda yenggele'ma nen higitikhe wene

1A'nogo hilingi'luk he, it Yahudi mene seni ekhe isati lagaukwa mene isatunem Yesus hobuk o Yerusalem pisikhe. 2O Yerusalem andoma re, leget paleget ambe palek ekhe enu domba anggwe agarek mene era'lu i mogo ekhe it afuni Ibrani mene inaneba enu Betesda agarek mene yenggelek welagaikhe. I mogo andi era'lukwe yiling-waling andoma re, o sabu 5 nen fano wurik were'ma. 3-4afuni hokhorogoat inoba ou mene inom, ineilenggen mum mene inom, ineindep holu mene inom, inawe wutwarek mene inom, andoma wengik logolik, [i mogo a'nogo hundik-hundik abolok ugunem nenangorogo welagaukwa. A'nogo nenangorogo were'ma, malaikat Allah nen yonggo pelakfisa wagarek mene pi we'luk, i a'nogo abologet hugunem he, it afuni inoba ou mene omanogo ekhe sa tak i mogoma a'nogo pugu halok, yi ou ti ou inoba enggin mene se mene mondogat fano aga lagaukwa andi nen nenangorogo welagaukwa andi,] 5-6A'nogo nenangorogo welagaukwa mene ap ekhe re, ou warek werek kwelek 38 tahun hilinglagaikhe mene inom inebe andoma wengik were'ma, Yesus eilenggen hasikhesik he, ”Ap yi endamat en yi'nogo welagare'ma higi,” iluk eilenggen enegat hasikhesik he, mel yagatikhe: ”Neisena. hat fano hilinghasigin hamolo a? Habira?” iluk yagatikhemo, 7ap a'nogo nen he, mel yagatikhe: ”Nagore. I mogwe yenggelek yi abolok ugunem, an nebe hambogoisogo ima pelaknobagau mene an nagoromi yoma le'ma andi nen he, nerabisak orok-orok pigeluk walhugu kwelek, it ekhe tak pili'lagwi o,” iluk yagatikhemo, 8at Yesus nen he, mel yagatikhe: ”Neisena. Hebe menlasimbik he, halit talek mene ari helaluk lan o,” iluk 9yagatu kwelek aremnogoat ap a'nogo ou fano agaikhesik he, alit talek a'nogo helaluk lagaikhe.

At Yesus nen ap ou higitikhe andi re, it afuni Yahudi mene inenggi sabit oba Allah faget weat welagaikharek a'nogoba higitikhe. 10A'nogo weat werek kwelek higitikhemo lagunem he, it ap kaindek Yahudi mene nen ineilenggen hasukwasik he, ap ou kerat fano aga mene a'nogo mel yagatukwa: ”Nagot yi. O yogondak he, ninenggi sabit oba Allah faget weat logolik, hat halit andi waluk la lek mene waluk laga lagen o,” iluk yagatukwa.#Neh. 13:19; Yer. 17:21 11At ap a'nogo nen he mel yagaisasikhe: ”Lego. An ap ou higitnafe mene andi nen, halit helaluk lan, iluk yaganetemo nen helaluk waga lagi o,” iluk yagaisasikhemo. 12iren heinok oba wokhikhi logolik he, ”Ap andi sa nen, halit helaluk lan, iluk yagahete,” iluk oba heinok wokhasukwa meneat he, 13at Yesus inebe hokhorogo welagaukwa mene omanogo inanggele'ma longgosikhemo re, ap oba ou fano higitikhe mene a'nogo nen he, ”Sa nen higitnafesik yaganete heat,” iluk obakhe palagaikhesik welagaikhe. 14A'nogo hilingitukwasik oba nen, hobuk at Yesus Allah awi wuri'mo ap a'nogo emberek ambi agaukwasik he, mel yagatikhe: ”Neisena. Yogondak hat hoba arat fano agen andi re, hobuk weak hokho mene ekhe hoba asinogo nen he, weak mene ekhe hilingitun o,” iluk yagatikhe. 15A'nogo yagatikhemo, at ap a'nogo it ap kaindek Yahudi mene inoba lagaikhesik he, wene mel yagaisasikhe: ”Ap an ou higitnafe igi a'nogo re, Yesus nenat higitnafemo o,” iluk yagaisasikhe. 16A'nogo yagaisasikhemo re, it afuni Yahudi mene inenggi sabit oba Allah faget weat werek kwelek, Yesus nen ap a'nogo ou fano higitikhe andi nen, at Yesus ebe weaget fouwogeluk isukwa. 17A'nogo isukwa meneat he, at Yesus nen wene mel yagaisasikhe: ”An neisena enggi ekhe kamo igi'lek, o yogondak yi inomat hilingnafu mondok welagarek hak, an a'nogoat higirinafu welagi o,” iluk yagaisasikhemo, 18it ap kaindek Yahudi mene omanogo nen inenggi sabit oba Allah faget weat logolik, Yesus nen ou higisu lek mene higitikhe andiba nek ebe wasuogeluk isukwa fuk. Athe, aren, ”An nebe Allah nemberek higit,” u hak he, ”An neisena ebe Allah aro,” iluk isikhe andi nen ebe wasuogeluk ebenagai'mo weim abok isukwa.

Allah nen he, amlogo Yesus nen afuni oak lolinabuageluk enggiba fesikhe wene

19Weim abok a'nogo isukwama, at Yesus nen he, ap omanogo wene yi'nogo yagaisasikhe: ”Yi mene ti mene an neisena nen hilingitunem neilenggen higi'lek, we, an nendawimo nen kagalogo hilingisu elo'lek andi nen he, an neisena hilingiterek meneat higithogo hilingiti lagi o, iluk eberogoat yagahisigi. 20An neisena nen he, amlogo ap endawinggen hundik mondok logolik, at ebe nenat yi mene ti mene hilingiterek mene mondogat yaganetunem yogondak hilingitunem hineilenggen neegep andi re, endebat hak meneat he, hobuk hit fogerasuageluk yaganetunem hokho mene hilingitunem hit hineilenggen neogoin oba weregaro. 21Nen, an neisena nen afuni warek mene inelugerinaferek andi hak, amlogo an nen afuni warek mene a'nogoat inelugerinabigin, iluk nendawimo anggigirik mene nek inebe lombok inelugerinafirek. 22-23Afuni mondogaren an neisena fogeratarek andi hak, an amlogo a'nogoat fogetnafi logouwageluk, aren afuni oak logogo wene inoba figik, kotik, ikherek lek. We, amlogo an nenat oak lologo wene inoba figik, kotik, uageluk nenggiba fesikhe o. Halok he, it afuni ekhe nen an fogetnabi'lagwi lek halok he, an neisena laknobagai wagaikhe mene andi, fogerari'lagwi legaro,” iluk, yagaisasikhesik wene hobuk ekhe mel yagaisasikhe: 24”It afuni ekhe nen an nane inesanggo holfuluk, inendawinggen an lak nobagai wagaikhe mene a'nogo noba eberogoat himbiret fogoin halok, afuni wa'la'luk lagaikharek ero herakfisaluk, ineluk mondok logogun mene eroba arat wagaikhesik werego. Ineluk mondok logogun mene eise agaikhasik werek andi nen he, hobuk wene inoba fagain lego, iluk eberogoat yagahisigi. 25Nen, afuni warek mene nen, an Allah amlogo nane inesanggo holugun oba oan werek meneat he, arat asi wagasik werego. It nane inesanggo holugun mene halok, ineluk a'luk mondok logogun o, iluk, eberogoat yagahisigi. 26Ineluk mondok welagaikharek mene ero an neisena onggwarek eise welagarek andi hak, an amlogo nenggiba fikhemo eisewerek welagi o. 27An nebe abat ta'lasi wagagi andi nen, afuni oak lologo wene inoba figik, kotik, uageluk, neisena nen anat nenggiba fesikhemo welagi.

28-29Nen, hobuk he, afuni mondogat wa'lagaukwa mene inoak ebene lombogen, an nane inesanggo holiluk ineluk asugun sambul werego. It andi ekhe inobabut fano hilingiti lagaukwa mene halok, ineluk mondok logouwageluk menfisigik, nen, it ekhe inobabut weak hilingiti lagaukwa mene halok, wene inoba feigeluk menfisigik, igin iluk yagahisigi andi nen, Wene andi nailo e iluk, fogeratubo,” iluk yagaisasikhe.#Dan. 12:2 30A'nogo yagaisasikhesik he, wene ekhe mel yagaisasikhe: ”An nalegat nendawimo nen kagalogo yi mene ti mene hilingisu elo'lek andi nen he, an nen nendawimo anggaluk hilingiti lagi lego. We, at an laknobagai wagaikhe mene endawimo anggikherek mene hilingisigeluk ikhi lagi andi nen, neisena ane murogat, afuni oak lologo wene inoba figik, kotik, ikhi lagi andi, higithogoat ikhi lagi o,” iluk yagaisasikhe.

At Yesus abok pilingisogo yagaisagarek wene

31A'nogo yagaisasikhesik ekhe yagaisikhi logolik he, ”An nebe futnobagauwageluk nonggwarek nabok pilingisogo yagahiselema, eberogoat iluk hinendawimo anggelep lego. 32A'nogo meneat he, an nebe futnobagauwageluk, neisena nen nabok pilingisogo yagahisili'logo andi, eberogoat yagahisili'logo iluk an nelu o. 33Hiren Yohanes oba an faget heinok wanuageluk hinagoromi yonggo lak fisasigipmo re, aren he, ebe wene faget nabok fakhogo yagahisasikhe anggigi.#Yoh. 1:19-27, 3:27-30 34An nebe futnobagauwageluk afuni nen nabok pilingisogo yagaisagarek andi hinamolo nen yagahisikhi lagi fuk. We, Allah nen hit telhinabuageluk yagahisikhi lagi o. 35At Yohanes andi ebe re, esage ibilogo fugunem yararet hikherek hak were'ma, hiren he, esage omba'-bak ninoba fikhi logouwak, iluk, elama fagerat hinendawimo hinagaiyek anggikhi lagagip andi, 36an nebe futnobagauwageluk, aren nabok pilingisogo yagahisikhi lagaikhe meneat he, elo'lek hak. Athe, an neisena nen, neabu ando ekhe figi'lek felelenghogo hilingi'no, iluk, nayonggo fesikhemo hilingiti lagi andiba nek he, afuni nen, At ebe eisena nen lakfei wagaikhemo iluk nabok ugunem inesanggo holfuluk nebe futnobagau hagat futnobagagun o. 37An nebe futnobagauwageluk, neisena nen lak nobagai wagaikhe mene andi nen, nabok fakhogoat yagahisasikhe meneat he, hiren neisena ane hinesanggo holhi'legat, elokhonggen hineilenggen higi'legat logolik he,#Mat. 3:17; Mrk. 1:11; Luk. 3:22 38aren nayonggo fuluk lak nobagai wagaikhe meneat he, hinendawinggen noba eberogoat himbiret fikhi lagep lek andi nen he, at ane hinendawimo werek mondok lego. 39Hiren anggikhi logolik, nineluk mondok logogun he, Allah ane lisu palek fisogo welago yibaat logogun o, iluk lisu palek andi fanorogo futfikhi lagep meneat he, lisu palek andi, an nebe fut nobagauwageluk palhukwama werek kwelegat he, 40hinebe hineluget hinabuageluk an noba wesu re, hinabiro.

41A'nogo hilingiti lagep meneat he, an enek he, afuni nen fogetnabuageluk hilingiti lagi lek. 42Hit enek he, Allah hinendawirogo welagep mondok lek andi, an hinobabut nelu o. 43An neisena nen lak nobagai wagaikhemo wagagi meneat he, hiren an nebe wo'nafi lagep lek. A'nogo meneat he, at ekhe onggwarek endawimo anggaluk waga halok enek he, ebe wanugun hinobabut hisikhi lagi o. 44Allah alegat etok mondok welagarek andi nen fogerasuogeluk hilingiti'lek logolik he, hit-hirat hat ekhe nen fogeratik, hat ekhe nen fogeratik fogerakhikhi lagep andi nen, hinendawinggen an noba ninggi'nogo himbiret fogoin anggegep? Mondok elo'lego. 45Mene re, an nen Allah eilhanem wene hinoba fagain iluk hinendawimo anggagubo. Athe, Musa ane andiba at fanotninabigin iluk hinendawimo hinagaiyek hikhi lagep meneat he, arenat wene hinoba fagain o. 46An nabok hinelu asuageluk, at Musa nen lisu palogo fesikhe andi nen he, aren lisu palhikhe mene andi eberogoat iluk futfikhi logoilepma re, Yesus eberogoat, iluk fut nobagailebaro. 47Menere, wene Musa nen lisu palogo fesikhe mene andi, hiren eberogoat iluk futfigi'lek welagep halok, an nane andi ninggi'nogo futfuluk eberogoat iluk anggogoin nogo. Elo'lego,” iluk yagaisasikhe.

Currently Selected:

YOHANES 5: inohap

Highlight

Copy