KEJADIAN 45

At Yusuf en, ”An nebe eberogoat he Yusuf,” iluk agaila'lak inelurogo yagaisasikhe wene

1A'nogo yagaisasikhemo at Yusuf a'nogo agoromi it pemerintah inobaget yabu hilingiri'lagwi mene omanogo ineilhanem endawinggen mondok sebel ha elo'lek hilingitu nen he, at agaila'lak inoba an nebe yi eberogo Yusuf aro, iluk yagaisagain anggasikhesik he, it agoromi yabu hilingiti lagaukwa mene omanogo inoba o elonggoma a'nogo nen herak fisaluk wulibi loageluk yagaisasikhe.#Kis. 7:13 2It pegawai pemerintah inobaget yabu hilingitu mene omanogo o elonggoma nen mondogat wulibi lagaukwama at Yusuf a'nogo le hokhorogo ane hokhoba agaikhe. A'nogo le agunem, it ap o Mesir mene enda'ma welagaukwa mene omanogo inom inesanggo holhukwasik, at Yusuf le agaikhe mene a'nogo faget abok o raja were'ma ogo kwi lagaikhe. 3A'nogo hilingitikhesik at Yusuf a'nogo nen ori yagaisikhi logolik, ”An yire, nebe Yusuf a'nogo, neisena re ebe eluk werega?” iluk a'nogo ugunem at agaila'lagen enek fut fesukwasik it mondogat inailo nen he, wene onggo u elo'lek agaikhe.

4A'nogo isikhesik at Yusuf en it yagaisikhi logolik, ”Horok-horok ya we'ni,” iluk yagaisasikhemo it era'lu horogat asi lagaukwama ekhe inom yagaisikhi logolik, ”An he Yusuf, hiren o Mesir mene inoba onggo palnafigip mene a'nogo o. 5Afuni hokhorogo inagap telinabuageluk at Allah nen hit wagi'le'ma attak wo'narek o yoma wagaikhemo re, hiren an onggo palnafigip mene andi faget hinailo agik, ninambigen hilingito ago igik, hilingisu fugo. 6Tahun obare afuni sumburu ouwak logolik yabu wanhik, enggen palhik ikhi logogun lek, andi nen he, yogondak tahun pirenek mene welago yi. 7Hit hineluk logogun mene faget inom, hinerembulmo mene ta'lasimbik logogun mene faget inom, an attak At Allah nen elalinhogo wo'narek o yoma telhinabuageluk nobagai wagaikhemo welagi andi. 8Andi halok he, ibi eberogo nen he, hiren hilingisugun oba an yoma welagire fugo, athe Allah nen hilingiteba. At Allah nenat raja Mesir mene obaget hilingitu mene faget pegawai mondok lego mene mennobagaikhesik, at eisok erokwe faget inom, o Mesir oba mondogat faget inom, an nen melalinafi logouwageluk wo'nete. 9Yogondak he, nekhengge hun neisena ambit lambik he, at yagati logolik Yusuf en yi'nogo ikhe yaga'no, ”At Allah nen o Mesir yoma fisogo logouwageluk mennobagaikhemo welaginggere weak-weak wesuago. 10Wesimbik he, hunai hebe inom, hamlogomi hombawi inom, domba, kambing, sapi inom, yi mene ti mene hunai hangge mondogat inom he, an horokhogo o Gosyen oba yoma logogun o. 11Sumburu ouwak arire, 5 tahun logogin hilingi'more hunai hat hebe inom, hat heisok erokwe mene inom, wam tati lagep mene andoma inom, ekhe mene lek kwelek welagep hanogoluk an nen lebethisikhi logogin o. Nen, hat hunai o Gosyen yoma werek halok he, an nen lebethiikhi logogin, ikhe iluk hunai yaga'no,” isikhe.#Kis. 7:14

12Andi isikhesik at Yusuf en ekhe ikhi logolik, ”Yogondak he, hat Benyamin en ogo, hit fena nen ogore, an Yusuf eberogo iluk neegep andi. 13Hunai obare yi aple ti aple hineil hegep mene inom, an o Mesir yoma mendek logolik nalong hokho welagi aple inom, at oba tindelimbik he, at ebe weak-weak waluk yoma we'no.” iluk yagaisasikhe. 14A'nogo hilingitukwasik, at agot Benyamin a'nogo inom hai magaisogo puksek logolik le agaukwama at Benyamin nen ogo, Yusuf hai magaisogo puksek logolik inom le agaukwaat. 15Le agaukwasik, nginuk le yak-yak at agaila'lak fena omanogo inom inobakhe felik-felik aga logolik, inelokhe kwe top-top agaukwasik hobuk enek he iren at inom inane ma'mak agaukwa.

16At Yusuf agaila'lak wagaukwa aple a'nogo at raja aiba were'ma, aremnogoat inesanggo holhukwasik, at raja inom agoromi obaget yabu hilingiri'lagwi mene inom omanogo inagaiyegetukwa. 17Inagoriegekwa-sik at raja nen Yusuf yagati logolik, ”Hat hagaila'lak andire wam keledai ambol oba gandum oma ogo inomat liakfembik, inaiba o Kanaan loakhogo yagaisan. 18Lambik he, ineisena inom it inagagwi inagainafuri hondok inabi lambik, o yoma wesuagen lakfisano. Wesumo re, an nen o Mesir oba yoma kweang fanoma it wogisamo, kweang andomaba nen ekhe mene legengge mondogat were'ma logogun. 19It ineisena hondosi laga logolik he, it inagagwi inom inomalik fou mene inom faget wam keledai, kereta oba lisogo waluk wesugun mene, yoma nen miren hakhogo waluk loagen yagaisano. 20O Mesir yoma oba yi mene ti mene mondok fano mene it inangge asigin enggere, inangge faget inendawimo ebesugun mondok lego yagaisano.” iluk yagaisasikhe.

21A'nogo isikhemo, at Yakub againafuri omanogo nen hun enupogoren yagaisasikhe aple omanogo higithogo hilingitikhesik, at Yusuf en raja ane isikhe higithogo kereta miren hakhogo wogisasikhesik he sumburu kwemangge nunggu mene iluk inom wogisasikhe. 22Inasu itu mene ket menere ineisok su inom wuret higik it omanogo wogisikhi logolik he, at Benyamin enek he uang perak mene 300 nen inom su itu mene re 5 nen wuret higik inom wogotikhe. 23Wogetikhesik eisena faget ogo wam keledai 10 nen amboloba roti inom gandum inom sumburu ebekhalem en nunggu mene iluk faget inom, yi mene ti mene o Mesir en mondok fano mene inom amboloba liak fesikhesik lakfisasikhe. 24A'nogo hilingitukwasik aren agaila'lak omanogo lakfisikhi logolik he, mel isikhe, ”Ebekhe kwe yele yabik la fuk.” iluk yagaisasikhesik lakfisasikhe.

25Lakfisasikhemo, it o Mesir herakfisaluk o Kanaan ineisena Yakub ambit lagaukwa. 26Ambit asi lagaukwasik iren ineisena yagati logolik he, ”Yusuf he eluk werego” nen, ”At ebere o Mesir oba at he ebe kainat mendek werek,” iluk yagatukwama holhikhesik he, at Yakub ane igik lek oba fok agaikhesik, iren isukwa mene a'nogo faget eberogo ili'lagwi iluk anggasikhe lek. 27A'nogo isikheba nen, at Yusuf en kereta at o Mesir hondo'luk wesuageluk lakfisasikhe mene omanogo inom eilenggen higik, nen iren tindelhukwa mene omanogo esanggo holhik, isikhesik enek he, at oba fokhogo welagaikhe mene a'nogo hobuk eberogo anggasikhe. 28A'nogo anggasikhesik aren ikhi logolik, ”An namlogo Yusuf he eluk werek andi, enggere an nebe oan wa'lagi'le'ma yaat lambik neilenggen ha lagain.” iluk anggasikhe.

Currently Selected:

KEJADIAN 45: inohap

Highlight

Copy