KEJADIAN 44

Hun raja agai hinago ninggerek mene a'nogo longgo isikhemo heratukwa wene

1It a'nogo nunggu kwelek at Yusuf a'nogo nen at aiba elonggoma halhu mene inoe a'nogo yagati logolik, ”Ap ari inasu karung elema gandum iren waluk logoin mene nek kwalfuluk he, it inauang andoma ogo inasuba lombok gandum amboloba andoma kwalfisano. 2Kwalfikhi logolik he, an nen nagai ninggi lagi mene piala perak mene hilingik mene a'nogo. it inagot elabo mene a'nogo asu karung a'nogoba kwalfikhi logolik he, uang gandum onggo palugun iluk waluk waga mene a'nogo inom kwalfeino,” iluk yagatukwama at yabu hilingiri'logo mene a'nogo nen yagatikhe aple aremnogo higithogo hilingitikhe.

3Ohealekwe o weirogo hubet-habet he, at Yusuf agaila'lak inom it louwogeluk lagunem, it inanggo keledai omanogo inom lakfisasukwa. 4Lagaukwasik, it o kota a'nogo nen yatma asi lagi'le'ma, at Yusuf en hun at aiba halhi lagaikhe mene a'nogoba yagati logolik, ”Weak-weak ap a'nogo mugisa lano. Lambik yagaisikhi logolik, ”Hit fanot hinafu kwelek he, nenahalok weak mene inom wuret fegep?” 5Hit weak mondok hokho mene hilingitebo! Iwak piala andi re an noe agai hinago nunggu mene faget inom, nen ekhe heinogengge hilingitu mene faget inom, werek mene iwak ebe no perak meneba hilingik engge a'naga, nenahalok hiren hina'luk wagep?” iluk yagaisano.

6Isikhemo, at Yusuf amingmingengge a'nogo it at Yusuf agaila'lak omanogo inambit wagaikhesik he at Yusuf en, ”A'nogo ino o,” iluk komotfesikhe mene a'nogo yagaisasikhe. 7A'nogo yagaisasikhemo iren onggo ikhi logolik, ”Ninoe, haren andi ninggi'nogo faget egen? Nit he a'nogo hilingito lek, iluk hombuk palogo ikhi lago andi. 8Nit he, uang su karung oba gandum kwale'ma amboloba were'ma herato mene omanogo, ninoe hat haiba oak onggo wokheto a'nogo hat mondogat helu o. Arigini'mo re, at gubernur aiba nen perak mene a, emas mene a, niren ekhe wanhu menere mondok lego. 9Noe, iwak piala perak mene andi re, nit mene misik ekheba werek halok he, nit fena ninoe hamingmingengge ninobagambik he, at andi nek enggi ambisangma ebe pinggi wasugun o,” iluk yagatukwa.” 10A'nogo yagatukwama at yabu hilingiti lagaikhe mene a'nogo nen ikhi logolik, ”Fano egep oba nen he, hit fena hinoba selekhogo logoin meneba nen, at ekhe sa nen noe agaiwak andi at oba logogin halok he, at andi ebe an namingmingengge asigin o,” iluk yagaisasikhe. 11Yagaisasikhemo, it omanogo nen weak-weak inasungge tomok pelabi wagaukwasik inasu karung omanogo ambe hele fikhalik lagaukwa. 12Lagaukwama, at yabu hilingiti lagaikhe mene a'nogo nen, it omanogo inasu karung mene abo manggusa mene a'nogo asuba nen tak filingirik? filingirik he inagot elabo mene a'nogo asuba fanorogo pilingitunem en he, ap kain mene agaiwak a'nogo re at Benyamin asuba kwalek were'ma heratikhe. 13Kwale'ma hasikhesik it ogogwi omanogo inendawinggen heiselhikhemo re, inasu ugu welagaukwa mene omanogo tilip-talaphogo huk-hak isasukwasik nekhengge keledai amboloba liakfesukwasik inambotkwe o kota hobuk wagaukwa.

14At Yehuda inom agaila'lak inom a'nogo Yusuf aiba oloba asi wagaukwa hak he, at Yusuf ebe omanogo were'ma wagaukwasik iren ineindep awi yagaisogo hilingfuluk a'ma sebe isukwa. 15A'ma sebe isukwama at Yusuf en ikhi logolik, ”Hit he ninggi'nogo nen hilingitepma? Ap an hak mene re hiren hinagaisogo hilingitep oba nen, nelu asuageluk heinogengge nen hilingitirek a'nogo hinonggot nogo a?” iluk yagaisasikhe. 16Yagaisasikhemo, at Yehuda nen ikhi logolik, ”Niren nena mene ekhe yagahesu hak? Niren weak hilingito mene Allah nen mondogat weinamet fikhemo re, at sa oba iwak andi welaga re lek oba nen, nit abirengge hat ninoe hamingmingengge nek hilingi'mo, niren ninggi'nogo ninane serogo ninili helogoin, noe!” iluk yagatikhe. 17Yagatikhemo at Yusuf en ikhi logolik, ”Lek, an he, a'nogo hilingitu aple nabiro, we ap kain agai ninggerek mene andi ap oba aga mene andiat namingmingengge asigin, nen hit fena selekhogo hineisena ambit logoin fano,” iluk yagaisasikhe.

At Yehuda nen agot Benyamin ili wanhikhe wene

18A'nogo yagatukwama at Yehuda a'nogo Yusuf era'lu higilogo asi lagaikhesik he yagati logolik,” Eige noe, hat hebe it raja Mesir mene higit hilingik welagenma re, an hamingmingengge yi wena'nesu fugo, we noe hoba an nendawimo anggigi mene endep ekhe yagahesigin. 19Noe, haren heinok wo'nisikhi logolik, hit he hineisena ogo, nen hinagot alek mene ekhe werega? iluk heinok wo'nisegenma,

20niren ikhi logolik, Nineisena mondogat yaman agama, nen ninagot he nineisena yaman oba nen ta'laga menere, at ninagot andi it inebe pire inagaisa misik mene nen taginafikhe menere at ekhe wa'lagaikhemo re, at misik elabo mene nek eluk were'ma at nineisena nen endawinggen hundik at oba werek. 21Ninoe, haren at andi an neilenggen hayogen hondo'nesi lani iluk mimingninafenma. 22Niren ikhi logolik omalik andi re eisena nen ogo oboget hili'lago lek, nen oboget hamo nen he, nineisena wa'lasu hak, iluk yagahetugumo. 23Ninoe, haren yaganisikhi logolik hit hinagot andi waluk wesugun lek halok he, an nelokhoma arem weinam asi wesugun lek iluk yaganisasigin. 24A'nogo hat ninoe nen yaganisasigin aple andi nit nineisena were'ma lagagusik yagasi lagagu. 25Yagasi lagagumo nen at nineisena nen sumburu nekhengge onggo pali lani iluk mimingninafemo, 26Niren ikhi logolik, Nit he ninagot ninom logoin halok enek he, andoma fano lagoin oba nen, ninagot ninom logoin lek halok he, at gubernur elokhoma weinam asi logoin mondok lek, iluk yagatugu. 27Yagatugumo at nineisena nen ikhi logolik, An noe nendawinggen hundik mene Rahel a'nogo againafuri we tem pire a'nogo we hit hinelu aro, 28manggusa menere an nobagaluk lagaikhemo yogondak huli nen hikhi lagi lek menere, athe eberogo mene olomene nen senggelhe. 29An nebere mondogat yaman agagimo. Hiren namlogo elabo mene ari aren an naiba nen waluk logoin halok ebekhalem at oba enggin-fenggin agunem, hiren an noba engginet nobabagun andiba an nebe wa'lasigin andi nabit yaganisikhemo, iluk yagatikhe. 30-31At Yehuda nen Yusuf yagati logolik, A'nogo higimo re noe, nineisena ebe mondogat yaman agasik endawinggen he, amlogo ari oba himbirik were'ma, niren at endawimo weaget fogoin andi oba re ebe wa'lasigin. Nen, an nagot faget neisenaba yagati logolik, at wene oba agu halok an nen elok hilingisigin iluk neisena yaga'luk wagimo re, abo ari legengge nirenek nineisena ambit logoin halok he, nit nineisena eberogoat wa'lasigin o. 32Nen ekhe an hagoren neisena yagati logolik omalik ari nekhengge hondo'luk wesigin lek halok he, an neluk logogin huli andi wene an noba mondok-mondok logogin, nen abo ari faget hendawi lirengge iluk wene sikhiphogo yagatigi. 33Arigini'mo re noe, nit ninagot Benyamin ari re ogogwi inom inaiba lagu kwelek, at obali'mo re, an noe hamingmingengge asimbik yoma logogin yaganesinogen iluk kino yagaheti lagi. 34An hagot neisena oba enggin-fenggin hugu were'ma, an nen kwalogo werek aple nabit enggere, an nen ninggi'nogo abo ari legengge neisenaba lagain anggegen?” iluk yagatikhe.

Currently Selected:

KEJADIAN 44: inohap

Highlight

Copy