KEJADIAN 35
35
Hun Yakub agoromi inom o Betel lagaukwa wene
1Linggene misik oba at Allah nen Yakub yagati logolik, ”Weak-weak hat o Betel lan o. Andoma lambik logolik he, an Allah hat Esau hailo nen heise lagunem helokhoma weinam agagwi mene Allah a'nogo nobaget fogetnafuba mezbah misik ekhe wu'no,” iluk yagatikhe.#Kej. 28:11-17
2-3A'nogo yagatikhemo at Yakub agagwi againafuri inom afuni at inom welagaukwa mene omanogo yagaisikhi logolik he, ”Nit he, o yoma nen o Betel lambik he andoma nen he Allah an enggin-fenggin hilingnafunem lebetnafik, yi kwe ti kwe lagunem fetnarek welagik, hilingnafi laga mene a'nogo obaget fogeratuba mezbah wusugun. A'nogo hilingisugun enggere kembu dewa ap pok hinailokwe ekhe werek mene andi mondogat pugunhogo wulakfisigik, hinebe Allah eilhanem wut palogo fakhigik, hinasu weak mene nonggolo fuluk ket mene ikhigik, hilingi'no o,” iluk yagaisasikhe. 4A'nogo yagaisasikhemo iren kembu dewa ap pok mene inanggembu werek mene omanogo inom, inesanggomangge warek mene omanogo inom, at Yakub wogetukwama, aren he, yi mene ti mene omanogo waganogo e hokho mene eroma o kota Sikhem era'lu salhikhe.
5Salfuluk, at Yakub agoromi inagainafuri inom inebe mondogat wilipluk wagu kwelek, it afuni o kota andoma mene nen muginarek wesinogoluk, Allah nen inebe mondogat inailo mene hilingfisasikhemo, it inebe selek wagaukwa. 6Wagaukwasik o Kanaan nen o kota Betel attak he enu Lus ikhi lagaukwaba andoma asi wagaukwa. 7Andoma asi wagaukwasik at Yakub en he, ”O ya re, attak noe nailo nen wilipluk heise wagunem Allah nelokhoma inuk niikhe,” iluk Yakub en o andoma Allah fogeratuba obalik mezbah wutikhesik enu El-Betel iluk salhikhe. 8Nekhema andem, he Debora, Ribka yenggere'ma amingmongengge logolik halhi lagaikhe mene a'nogo, wa'lagaikhemo o kota a'nogo a'ma fikhit e patie hak mene eroma andoma salhukwa. Salhukwasik e a'nogo enu re, Le Agayo, iluk salhukwa.
Yakub o Betel were'ma Allah nen fanotfesikhe wene
9At Yakub o Mesopotamia nen wagunem Allah at elokhoma inukha wagaikhesik ebe fanot fesikhe. 10Fanot fesikhesik Allah nen ikhi logolik, ”Hat henu re Yakub ikhi logogun lego, athe, Israel ikhi logogun,” iluk Allah nen Israel salhikhe#Kej. 32:28 11Salhikhesik Allah nen ekhe inom yagati logolik, ”Hat hagainafuri hombawi inom hokhorogo taginafi logogun. Haren taginafigin mene inoba nen afuni inunggulenu hokhorogo asugun, nen, ap raja-raja inomba re hat asigin, iluk An Allah Nalong Welagirek Mene a'nogo nen yagaheti.#Kej. 17:4-8 12O kweang An nen it Abraham inom, Ishak inom wogisasigiba andoma hat inom haren tagomangge mene inom wokhisagain o,” iluk yagatikhe 13A'nogo yaga'luk Allah nen Yakub herakfuluk lagaikhe. 14A'nogo lagaikhemo at Allah nen Yakub wene yagatikheba aremnogo helep misik inendawinggen ebetikhi logouwageluk menfesikhe. Menfesikhesik helep a'nogo Allah faget fesikhesik amboloba re anggur agai inom, zaitun amusu inom kweisalhikhe.#Kej. 28:18-19 15A'nogo yagatikheba aremnogo at Yakub en enu Betel salfesikhe.
He Rahel wa'lagaikhe wene
16A'nogo hilingitukwasik at Yakub inom, agoromi inom o Betel omanogo herakfisaluk wagaukwa. Wagaukwasik it o Efrata nen oan yatmaat hilingi'mo wagaukwasik hilingitunemen he, at he Rahel a'nogo omalik arat tasu horok agaikheba nen he, tasu elo'lek agaikhe. 17A'nogo hilingitu kwelek, ambol heinet watu aple mondok hokho agaikhemo, at he omalik ta'lagunem leberisikhi lagaikhe mene a'nogo nen Rahel yagati logolik, ”Hat heak he, abengge were'ma re, hendawinggen fisu fugo,” iluk yagatikhe. 18A'nogo yagatikheba nen he, at Rahel wa'lasu hak hiling lagaikhemo set endebat werek kwelek aremnogo omalik a'nogo enu Ben-oni salhikhe. Enu andi it Ibrani inaneba re, ”Namlogo ourogo takhigi mene,” u hak mene at he, at eisena nen enu Benyamin iluk salhikhe.
19He Rahel a'nogo wa'lagaikhemo kwe o Efrata lagaikharek oba yogondak he, enu Betlehem agarek oba kwe esanggoma andoma salfesukwa. 20Salfesukwasik at Yakub en he Rahel salfesukwaba a'nogo helep misik ekhe inendawinggen ebethugu mene iluk menfesikhe mene mendek werek. 21A'nogo hilingfuluk at Yakub a'nogo pikhit lagaikhesik aben helep wutukwa mene enu Eder andi mendek were'ma andoma taganhogo asi lagaikhesik awi sabu tenda meneba wutikhe.
Hun Yakub againafuri taginafikhe wene
(1Taw. 2:1-2)
22A'nogo wutikhesik elama andem werek kwelek he, at Ruben nen he eisena agwe heihe mene he Bilha a'nogo inom orouwe lagaikhemo at Yakub en esanggo holhikhesik he, at a'mage mondok hokho mene lagasikhe.
At Yakub againafuri inebe mondogat 12 nen welagaukwa.#Kej. 49:4
23At he Lea eagwi re Ruben Yakub amlogo manggusa mene inom Zebulon inom taginafikhe. 24Rahel eagwi re Yusuf inom Benyamin inom taginafikhe. 25He Rahel amingmingengge Bilha a'nogo eagwi re Dan inom Naftali inom, 26nen he Lea amingmingengge Zilpa a'nogo eagwi re Gad inom, Asyer inom, it againafuri inebe mondogat he o Mesopotamia nen enek taginafukwa.
Hun Ishak wa'lagaikhe wene
27At Yakub a'nogo o Mamre Hebron horokhogo andoma attak he omba Abraham welagaikheba omanogo eisena Ishak were'ma ambit wagaikhe.#Kej. 13:18 28-29Hun Ishak ebe mondogat yaman agaikhesik umur 180 tahun agaikhesik wa'lagaikhemo at againafuri Esau inom Yakub inom aremnogo nen salfesukwa.
Currently Selected:
KEJADIAN 35: inohap
Highlight
Share
Copy
Want to have your highlights saved across all your devices? Sign up or sign in
