JAKARIA 14
14
Yerusalemu wau babaa-ngusawalo
1Dulahee pomutoa̒a lo Eeya malembidei. Yi Yerusalemu maa lambatolio, wau tilapulio mataya-tayadulio totalu lomatomu. 2Eeya mamongambu ngoa̒amila bangusa u moluhu Yerusalemu. Kota boito mahamaalio, bebee-leelio lambatolio, wau mongobualio polokosaalio. Ngotayadu lo ulipulio mabintao̒lio ode playahu, bo lebelio mamo tibiluloa̒ tokota boito. 3Lapatao̒ Eeya mamomaju wau mopaatea moluwali babaa-ngusawalo boito, debo odelo u pilohutu-Lio tojamani muloololio mai. 4To dulahee boito Eeya matimihula to Huludu Jaitun, to ambahu tiimuru lo Yerusalemu. Yi Huludu Jaitun mamobutao̒ sababu lumbaya u luasi, tumulalo mai monto tiimuru, demola otolopa. Ngotayadu lohuludu boito mau̒moliyoo̒ ode tilayo, wau ngotayade poli ode huliaalio. 5Timongoli matumeteo̒ molibaya lumbaya u molayade huludu boito mowali duluo. Timongoli matumeteo̒ debo odelo tinenemoyaamu tou̒ lotoduo mai liluhu to maasa pamalenta lei Ujia, olongia lo Yehuda. Lapatao̒ dungga-dunggaalo mai Eeya Allahu Taa̒alau̒, tilunuhe lo ngoa̒amila malai̒kati.
6Wonu dulahee boito meidungga, diilalo woluo dulente mohuhulo meaalo esi. 7To dulahee boito diilalo woluo u modio̒lomo. Mato lodulahu maadebo mobaango, wau olo tou̒ hui. Bo Eeya wambao̒ tamotota omolua dulahee boito meidungga.
8To dulahee boito, taluhu seehati matumolohe monto Yerusalemu; ngotayadu monto taluhee boito matumolohe ode Lau Mati wau ngotayadio poli ode Lau Tenga. Taluhee boito matumolohe ngohilayaa̒ lotaunu, mopio tosembo lodidi meaalo tosembo lo polodulahu. 9Yi Eeya mamo malenta odelo olongia to ngoilanggubu tudu lodunia; timii̒du tau mamolubo o-Lio odelo Allahu Taa̒ala wau motota o-Lio wolo tanggulo u tutuuwauwa.
10Ngoilanggubu lipu monto Geba totilayo demola Rimon to huliaalio, mamowali datahu. Bo Yerusalemu mabihe-biheela molanggato, lebe molanggato wolo huta topalitio; kota boito mamolauasi monto Huhebu Hulubangi Benyamin tunggula ode Huhebu Hulubangi Tutulio, deu̒yito-yito tambati hulubangi Bohulio wau monto Monala Hananel tunggula ode tambati pomitodelo angguru miliki li olongia. 11Tau-tauwalo mamo tibiluloa̒ wolo aamani tokota boito, diaaluo aanjamu obobinasa.
12 Eeya mamopo dungga mai ngongoto u moo̒tihela hapato ode yitaato ngoa̒amila bangusa tamaa lopaatea loluwali Yerusalemu. Mato wau dila limongolio, tumbao̒ ngangaawaa̒lo mao̒ limongolio mamo hutodu tou̒ timongolio donggo hitumula.
13To dulahee boito Eeya mamohutu mai babaa-ngusawalo boito molingu daa wau moohe tilinggula timii̒du tau mamoheu̒upa tamanilio tawoluo to ngotualilio wau moluhu olio. 14Tau-tauwalo mongo lolai to Yehuda mamopaatea u mopoduulua Yerusalemu. Odelo balangi yilambato, timongolio mamohama ngoa̒amila halata lo babaa-ngusawalo to palitio debo odelo hulawa, talaa̒ wau pakeeangi u hihuntu-huntua.
15Hitua-tuawua ngongoto u moo̒tihela hapato olo mamolemba to wadala, bagal, unta wau kolodai, boli ngoa̒amila binatangi tokema lomusu.
16Lapatao̒ ngoa̒amila taa udonggo tumu-tumulo towolota lo babaa-ngusawalo taloluhu Yerusalemu, mamonao̒ ode kota boito u molubo li Olongia, Eeya Taa Laba-labaalo kawasa, wau u moporame Potihunggu Wombohe Duungo. 17Wonubolo woluo bangusa tadiila mohuto monao̒ ode Yerusalemu u molubo li Olongia, Eeya Taa Laba-labaalo kawasa, yi tolipulio diila tamolaahei didi. 18Wau wonu tau lo Masiri diila mohuto moporame Potihunggu Wombohe Duungo, yi timongolio olo matembaa lo ngongoto u pilopo dungga lo Eeya ode timii̒du bangusa tadiila mohuto monao̒ motabia. 19Ui-uitolo hukuumani ode Masiri wau ode ngoa̒amila bangusa tadiila mohuto moporame Potihunggu Wombohe Duungo.
20To dulahee boito bebee-liyaalo to pakeyangi lowadala mapaisakalo wolo tataa-heyaalo, “Pilopo tolomodu ode Eeya”. Papaa-njiyaalo to Bele lo Eeya mahalagaalo debo odelo mamaa-nggowaalo dewo totalu lomesba. 21Ngoa̒amila panji to Yerusalemu wau to ngoilanggubu lo Yehuda mapo tolomodulo mowali miliki lo Eeya Taa Laba-labaalo kawasa. Ulipu tamopodewo bake mamomake mao̒ u molahee tapu lopodewo. Wonubolo maasa boito meidungga, diilalo woluo tamoo-dahangia to Bele lo Eeya Taa Laba-labaalo kawasa.
Currently Selected:
JAKARIA 14: LAIGOR
Highlight
Share
Copy
Want to have your highlights saved across all your devices? Sign up or sign in
