ILOOWALI 3
3
Manusia loluwali Allahu Taa̒ala
1Tulidee yito binatangi ulaba-labaalo tutu o aakali moleeto monto totoonulalo binatangi u pilopowali mai lo Eeya Allahu Taa̒ala. Tulidee boito lohintu mao̒ ode taabua boito, “Wolo Allahu Taa̒ala otu-otutuulo mao̒ modini olimongoli mongaa huhuu-ngowaalo monto totoonulalo bungo lo ayu totamani botie?”
2“Ami mowali mongaa huhuu-ngowaalo monto timii̒du bungo lo ayu todelomo tamani botie,” ualo taabua boito, 3“ngopohia monto bungo lo ayu u woluo tohuungo lo tamani. Allahu Taa̒ala modini mongaa hungo monto bungo lo ayu boito meaalo modedetao̒; wonu pohutuo lami uito, yi ami maamate.”
4Tulidee boito lolametao̒, “Uito diila otutu; timongoli diila taamate. 5Allahu Taa̒ala lotahuda mai uito kalana otaawa-Lio wonu timongoli mongaa hungo boito, pikiilangi limongoli mamohuo̒; timongoli mamowali debo odelo Allahu Taa̒ala wau mamotota wolo u mopiohe wau wolo u moleeto.”
6Taabua boito loo̒onto mao̒ deu̒ hungo lo ayu boito mopiohe, wau hungolio oontonga mopiohe aaloolo. Wau tio lomikilangi mola donggo boli piohio wonu tio mowali aaripu. Sababu uito tio malolipu hungo lo ayu boito, tulusi ililaalio, wau yilohilio mao̒ olo to dilelio, wau dilelio poli mailonga. 7Lolamemeta lapatio mao̒ yilonga hungo boito, pikilangi limongolio lohuo̒ wau timongolio malongalati deu̒ timongolio laalaala. Sababu uito timongolio malo lau̒be batanga limongolio wolo duungo lo ara u pilopo aa̒aitao̒ limongolio.
8Lolaangio boito timongolio loo̒dungohe Eeya Allahu Taa̒ala lojalena todelomo tamani, tulusi timongolio duduulota malo tituuo̒ towolota lo bubuu-ngowaalo ayu alihu diila oontonga lo Eeya. 9Bo Eeya Allahu Taa̒ala malo ngibode to talolai̒ boito, “Tou̒toonu yio̒?”
10Talolai̒ boito lolametao̒, “Watotia loo̒dungohe to Eeya to tamani; watotia moohe, oditolio watotia malo tituuo̒ kalana laalaala.”
11“Tatoonu talo poo̒taa olemu deu̒ yio̒ laalaala?” Allahu Taa̒ala lotahuda mao̒. “Wolo yio̒ malo lamelo hungo u dilini-U̒ boito?”
12Talolai̒ boito lolametao̒, “Taabua tailudu mai lo Eeya lowali sahabati lo watotia boitolo tamaa longohi mai hungo boito to watotia, tulusi matilamelo watotia.”
13Lapatao̒ Eeya Allahu Taa̒ala lotahuda mao̒ ode taabua boito, “Yilongola mapilo hutumu uito?”
Ualio mao̒, “Watotia ilaakali lo tulidee, tilinggula mai̒lo tamela lo watotia hungo boito.”
Allahu Taa̒ala lopodehu mai hukumani
14Lapatao̒ uito Eeya Allahu Taa̒ala lotahuda ode tulidee boito, “Yio̒ mahukuu-maniyo-U̒ kalana huhutuumu boito; monto totoonulalo binatangi bo yio̒ wambao̒ tamusi momanta loa̒anati botie: Tumulalo mao̒ botia yio̒ mamo tia̒lapo wolo ombongumu, wau monga peyahuo̒ ngotupa lo tutumulumu. 15Yio̒ wau taabua boito mamo loloonua̒, waliilio mola wau waliimu mola mamo mumuusua laito. Waliilio mola mamopo toyopu lunggongumu, wau yio̒ mamo dengeta pai̒ limongolio.”
16Lapatao̒ tahuda lo Eeya ode taabua boito, “Wau̒ mamo duhengai ngongotumu tou̒ yio̒ donggo banta-bantaalo wau tou̒ yio̒ motutu mai. Bo penu boli odito, yio̒ debo donggo obirahi to dilemu, bo yio̒ mataa̒luku mao̒ to olio.”
17Lapatao̒ tahuda lo Eeya ode talolai̒ boito, “Yio̒ helo dungohe loi̒ya li dilemu tulusi lolamela hungo u madilini-U̒ tamelomu. Kalana huhutuumu boito, yi huta malaa̒-laa̒anati. Yio̒ musi tio̒opatea mokalaja ngotupa lo tutumulumu alihu huta botie mowali mongohi mai tilapulo moo̒ tuheeto tou̒ aalomu. 18Diu̒to wau duhi mamowali mai tilapulo huta botie duo̒lomu, wau pilomulo u tohila-hilaalio mamowali ua̒alomu. 19Yio̒ maa mokalaja wolo tio̒opatea wau wulaatalo u mohutu huta botie mongohi mai tilapulo u hitua-tuawua, tunggula yio̒ mohualinga ode huta, sababu lonto hutaalo yio̒ pilohutu. Yio̒ pilopowali mai monto huta, wau mamuli mohualingao̒ ode huta.”
20Tei Adamu lolanggula dilelio ti Hawa, kalana taabua boito lowali tiilo ngoa̒amila umati lo manusia. 21Yi Eeya Allahu Taa̒ala lohutu mai pakeyangi lonto walito lo binatangi odelei Adamu wau dilelio, tulusi lopopake mao̒ olimongolio.
Tei Adamu wau ti Hawa pilolahi-Lio lonto tamani Eeden
22 Eeya Allahu Taa̒ala lotahuda, “Botia manusia malowali debo odelo Ito wau opongotota tomimbihu u mopiohe wau u moleeto. Oditolio palalu tangguwalo tio molamela hungo bungo lo ayu u mongohi tutumulo, alihu tio diila tatumumulo u ohiheo-hiheolo mao̒.” 23Yi Eeya Allahu Taa̒ala malo polahi mao̒ manusia lonto tamani Eeden wau lopoa̒hu olio motolopani huta u mowali asaliilio mai boito. 24Lapatao̒, to ambahu timuru lo tamani boito totalu lohuhebu potuwotalo, Eeya Allahu Taa̒ala lopo tambati mao̒ mamaa-lai̒katiyalo u opolipio̒, wau wamilo tuwau otulu u totooyonga ode totoonulalo dulungo, huna modaha dalalo ode bungo lo ayu u mongohi tutumulo boito. Lou̒ odito diaaluo penu boli ngotaa mao̒ tamoo̒ tuwotao̒ wau mohimbideo̒ bungo lo ayu boito.
Currently Selected:
ILOOWALI 3: LAIGOR
Highlight
Share
Copy
Want to have your highlights saved across all your devices? Sign up or sign in
