ILOOWALI 14
14
Tei Abram lotulungi olei Lot
1Wopatota olongia, deu̒yito-yito: Amrapel lonto Babilonia, Ariokh lonto Elasar, Kedorlaomer lonto Elam wau Tideal lonto Goyim 2helopaatea loluali limo lota olongia, deu̒yito-yito: Bera lonto Sodom, Birsya lonto Gomora, Synab lonto Adma, Semeber lonto Jeboim, wau olongia lonto Bela tai̒lunte olo Joar. 3Olongia limolota boito helo heeluma wau longambu suludadu limongolio to Lumbaya lo Sidim, u masaatia ilunte Lau mati. 4Ngotilonggadu mopulaa dulo taunu mola timongolio kiluwasa li Olongia Kedorlaomer, bo todelomo taunu u opulaa tolulio, timongolio helo mintaa̒ tingolo loluwali olio. 5To delomo taunu u opulaa pato, Olongia Kedorlaomer wau tahelo heeluma wolio lonao̒ mai wolo suludadu limongolio wau lopo olaaheo̒ taulo Repaim to Asyterot-Karnaim, taulo jujim to Ham, taulo Emim to Syawe-Kiryataim, 6wau taulo Hor to hihui̒-hui̒dee lo Edom, tulusi lohilapita olimongolio ngoilaminga El-Paran totili lohuta datahu wau luasi udelita. 7Lapatao̒ uito tahipo hilapitawa luli lobale wau lohualinga mola ode En-Mispat u masaatia ilunte Kades. Tilaa̒aluku limongolio ngoilanggubu huta lo Amalek wau lopo olaaheo̒ taulo Amori tahi biluloa̒wa to Hajejon-Tamar.
8Lapatao̒ mongo olongia lonto Sodom, Gomora, Adma, Jeboim wau Bela helo ngantulu baliisani lo suludadu limongolio to Lumbaya lo Sidim tulusi helo paatea, 9loluwali mongo olongia lonto Elam, Goyim, Babilonia, wau Elasar; oditolio, limo lota olongia loluwali wopatota olongia. 10Lumbaya boito polupolu wolo ali loteri, wau tou̒ mongo olongia lonto Sodom wau Gomora helo tolopani mopolahi batanga monto popaatea, timongolio helo dedeehu ode delomo aa̒a-liyaalo boito. Toulota olongia wewolio loa̒ahu tilumeteo̒ ode hihui̒-hui̒dee. 11Wopatota olongia taloo̒haama, helo lambata totoonulalo u to Sodom wau Gomora leituwoto balangi ua̒aloolo, lapatao̒ lonao̒. 12Tei Lot pou̒walao̒ lei Abram olo biluloa̒lio to Sodom, kalana uito tio olo dilelo lomusu pee̒-pee̒enta wolo totoonulalo halataalio.
13Bo ngotaalio lo taloa̒ahu lopoduloheo̒ ngoa̒amila u helo toduo boito tolei Abram, taulo Ibrani boito. Tei Abram bilu-biluloa̒ totili bubuu-ngowaalo ayu aulia tambati potabiyalo miliki lei Mamre, ngotaalio lo Amori. Tei Mamre wau mongo wutatio, deu̒yito-yito tei Eskol wolei Aner yito mongo sahabati wau ngoheeluma wolei Abram. 14Tou̒ tei Abram loo̒dungohe deu̒ pou̒walaa̒lio tilawaalio, mailimoi̒o ngoa̒amila taa todelomo kemalio, deu̒yito-yito tamotota mopaatea ngodaata tolo hetuto mopulaa walulota, tulusi lohilapita olongia wopatota boito demola kota Dan. 15Mota teto tei Abram malo layadeo̒ taulio dengolo polemboa̒a, tulusi heloluhu musu tou̒ hui wau lopo olaaheo̒ olimongolio. Tio lohilapita olimongolio demola Hoba to ambahu tilayo kota lo Damusiki. 16Tei Abram ilohaasili luli lohama babaa-langiyalo umaa yilahuulio, wau olo tei Lot wolo totoonulalo halataalio, wau mongobua wau tawaalo wewolio.
Tei Malkisedek lobalakati olei Abram
17Lapatao̒ lopo olaaheo̒ li Olongia Kedorlaomer wolo mongo olongia talo heeluma wolio, tei Abram luli lohualingai. Tulusi olongia lo Sodom lohunuhe mota olio to Lumbaya Syawe u ilunte olo Lumbaya Olongia. 18Tei Malkisedek, olongia lo Salem olo tadihu-dihu iimanu lo Allahu Taa̒ala Taa Laba-labaalo molanggato, lodelo mao̒ roti wau angguru odelei Abram, 19tulusi lobalakati mao̒ olei Abram, loi̒yalio mao̒, “Hinta Allahu Taa̒ala Taa Laba-labaalo molanggato, tamalo powali mai hulungo wau dunia, mobalakati olei Abram. 20Ilopujiaalo mola Allahu Taa̒ala Taa Laba-labaalo molanggato, tamalo poo̒ohama olemu lonto musumu.” Lapatao̒ uito tei Abram longohi mao̒ odelei Malkisedek ngotayade mopulu lonto totoonulalo balangi yilambato umaa luli dilelio lohualinga.
21Lapatao̒ malo loi̒ya ti olongia lo Sodom odelei Abram, “Hamaalo mao̒ balangi u yilambata boito, bo ambunguolo powalinga mai tawuu̒ ngoa̒amila ode olau̒.”
22Bo tei Abram lolametao̒, “Watia motadia mai totalu lo Eeya, Allahu Taa̒ala Taa Laba-labaalo molanggato, Talo powali mai hulungo wau dunia, 23deu̒ watia diila tamohama wolo-wolo monto milikiimu, tumbao̒ bola ngopata meaalo tali losandale penu boli ngoputu mao̒ diila. Lou̒ odito yio̒ diila moo̒loi̒ya, ‘Wawaatiyalo tahe lohutu olei Abram lowali kaya.’ 24Watia diila mohuto mohama mao̒ wolo-wolo duo̒lo batanga lowatia lohihilao. Watia bo mohuto mololimo wolo umaa pilomake lotau laatia. Bo huliyalo mao̒ mongo sahabati ngoheeluma laatia, deu̒yito-yito tei Aner, Eskol wolei Mamre, mohama tayadu limongolio.”
Currently Selected:
ILOOWALI 14: LAIGOR
Highlight
Share
Copy
Want to have your highlights saved across all your devices? Sign up or sign in
