ILOOWALI 12
12
Tei Abram tiliango Allahu Taa̒ala
1 Eeya lotahuda mai odelei Abram, “Tolailo mao̒ lipumu, kaumu ngaalaa̒mu wau bele li paapamu, lapatao̒ ponao̒lo mola ode lipu umaa pobilohu-U̒ mai olemu. 2Wau̒ mamongohi mai olemu wali u dadaata wau timongolio mamowali bangusa udaa̒. Wau̒ mamo balakati mai olemu wau mohutu tanggulumu polu-polutuo̒, tilinggula yio̒ mamowali balakati.
3Wau̒ mamo balakati mai tau-tauwalo tamobalakati olemu
wau molaa̒nati tau-tauwalo tamo laa̒nati olemu.
Wau kalana yio̒
Wau̒ mamo balakati mai ngoa̒amila bangusa to dunia.”
4-5Tei Abram o umulu pitu lopulaa limo lotaunu tou̒ tio lololaa mao̒ Haran, tutuuu̒de wolo palenta lo Eeya to olio. Tei Abram malo monggata mola ode Kanaa̒n pee̒-pee̒enta woli Sarai dilelio, wau tei Lot pou̒walaa̒lio wau ngoa̒amila halata upango wau mongo watolio talotapu limongolio to Haran.
Lapatao̒ timongolio leidungga mola to Kanaa̒n, 6yilontale lei Abram huta boito dilumutu tio leidungga mao̒ ode bungo lo ayu aulia to More, deu̒yito-yito tambati potabiyalo to Sikhem. (Tomasa boito taulo Kanaa̒n donggo hibiluloa̒wa tohuta boito.) 7Eeya lopo bilohei batanga odelei Abram wau lotahuda mao̒ olio, “Uti-utieelo lipu u mawohi-U̒ mai ode waliimu mola.” Lapatao̒ tei Abram lopotihula mesba mota teto duo̒lo Eeya tamalo pobilohei batanga to olio. 8Lapatao̒ uito tio lopotolonga mola lo nonao̒lio ode huliaalio, ode madala o huludu to ambahu tiimuru kota Betel, wau lotitikema to wolota lo Betel wau kota Ai: Betel to ambahu otolopa wau Ai to ambahu tiimuru. Mola teto olo tio lopotihula mesba wau helolubo to Eeya. 9Lapatao̒ tio luli lopo tolonga mola lo nonao̒lio lonto tambati tuwau ode tambati u wumbutio mola, lotidulunga ode wimbihu huliaalio huta lo Kanaa̒n.
Tei Abram to Masiri
10Bo to Kanaa̒n donggo woluo sembo lo polobiti ulaba-labaalo, tunggula tei Abram lonao̒ lebe lolamingao̒ ode huliaalio, ode lipu lo Masiri mola lotibiluloa̒ teto tunggula sembo lo polobiti boito lopaluto. 11Tou̒ tio ohilaa lumaodeo̒ to sipatana wau tilimuwotao̒ ode lipu lo Masiri, malo loi̒ya tio oli Sarai dilelio, “Yio̒ botie gaaga, dileu̒. 12Wonu taulo Masiri moo̒onto olemu, timongolio mamo lantobu deu̒ yio̒ dileu̒ lapatao̒ matantu wau̒ pateelio mate-mateelo mao̒ wau yio̒ hulialio mao̒ tumu-tumulo. 13Oditolio opiohelio loi̒yamulo mao̒ deu̒ yio̒ tawali yaliu̒ alihu wau̒ hulialio mao̒ tumu-tumulo wau pohutuolio lou̒ mopiohe kalana yio̒.” 14Wau otutuulo, lapatao̒ tei Abram yilumaodeo̒ to sipatana wau leidungga mola ode Masiri, taulo Masiri loo̒onto mao̒ deu̒ ti Sarai gaaga dada. 15Dengolo lota pogawee lo bele biluloa̒ saaha li olongia loo̒onto olio wau mota lopoo̒taa toli olongia donggo boli gaagalio taabua boito; sababu uito tio dilelolio ode bele biluloa̒ saaha li olongia. 16Domi ti Sarai, ti olongia helo pohutu olei Abram lou̒ mopiohe wau longohi mao̒ olio mongo wato, himbala lohimba wau batade, sapi, kolodai wau unta.
17Bo kalana ti olongia lohama oli Sarai, Eeya lopowoluo mai ngongoo-towaalo u moo̒tihela hapato toli olongia wau tau-tauwala todelomo bele biluloa̒ saaha li olongia. 18Lapatao̒ ti olongia lotiangai olei Abram wau lohintu mao̒ olio, “Wolo umaa pilohutumu to olau̒ botie? Yilongola diila pilolelemu mai deu̒ tio dilemu? 19Yilongola yiloi̒yamu deu̒ tio tawali-yalimu wau lopoluli mao̒ olau̒ lohama olio lowali dileu̒? Utie tio, ti dilemu; tolimowalo wau ponao̒lo!” 20Ti Olongia longohi mao̒ palenta ode ngoolo lota pogaweelio, wau timongolio malo polualao̒ olei Abram lonto lipu boito pee̒-pee̒enta woli dilelio wau totoonulalo hakuulio.
Currently Selected:
ILOOWALI 12: LAIGOR
Highlight
Share
Copy
Want to have your highlights saved across all your devices? Sign up or sign in