ILOOWALI 10
10
Wali mai lomongo walae̒e Noho
(Boh. Taw. 1:5-23)
1Uti-utieelo wali mai lomongo walae̒e Noho, deu̒yito-yito tei Sem, Yapet, wolei Ham. Lapatao̒ taluhee daa̒, toto-totoolulo loo̒tapu mai walao̒ mongo lolai̒.
2Mongo walae̒e Yapet yito tei Gomer, Magog, Madai, Yawan, Tubal, Mesekh, wau Tiras. 3Wali mai lei Gomer yito tuango lipu lo Askenas, Ripat, wau Togarma. 4Wali mai lei Yawan yito tuango lipu lo Elisa, Spanyol, Siprus wau Rodes. 5Timongolio nenemoya lo babaa-ngusawalo tahi biluloa̒wa to ngohilayao̒ pentadu wau to pupuu-louwaalo.
Ui-uitolo ngoa̒amila wali mai lei Yapet, timii̒du bangusa wau suku lotibiluloa̒ to lipulio ngota-ngota, wau o bahasaalio lohihilao.
6Mongo walae̒e Ham yito tei Kus, Masiri, Libia, wau Kanaa̒n. 7Wali mai lei Kus yito tuango lipu lo Seba, Hawila, Sabta, Raema wau Sabtekha. Wali lei Raema yito tuango lipu lo Syeba wau Dedan. 8Tei Kus owalao̒ talolai̒ tanggulio tei Nimrod talowali taa molotolo boli buheli wau molotolo bohulio todunia. 9Wolo polotulungi lo Eeya tio lowali tamongo-ngalupawa upolu-polutuo̒. Sababu uito tau biaasa hemoloi̒ya, “Hinta Eeya mopowali mao̒ olemu ngotaalio tamongo-ngalupawa upolu-polutuo̒ debo odelo tei Nimrod.” 10Bohu-bohulio bele biluloa̒ saaha li olongialio demola Babel, Erekh wau Akad, toto-totoolulo to Babilonia. 11Lonteto mola tio lonao̒ ode Asyur, tulusi helo potihulo kota lo Niniwe, Rehobot-Ir, Kalah, 12wau Resen u dudutuulio to wolota lo Niniwe wau Kalah. Ngoa̒amilalo boito yito kokoo-tawaalo uleidaa̒.
13Wali mai lei Masiri yito tuango lipu lo Lidia, Ananim, Lehabim, Naptuhim, 14Patrusim, Kasluhim, wau Kaptorim. Bangusa Kasluhim boito loluuhuru bangusa lo Pilistin.
15Mongo walae̒e Kanaa̒n yito tei Sidon, tamohuhula daa̒, wau Het. 16Tei Kanaa̒n olo loluuhuru bangusa lo Yebus, Amori, Girigasi, 17taulo Hewi, Arki, Sini, 18Arwadi, Semari wau Hamati. Susuu-kuwaalo bangusa lo Kanaa̒n boito loloo̒po molamingo. 19Tilinggula sipatana lipu limongolio luasilio lonto Sidon ode huliaalio dulu-dulunga ode Gerar demola membideo̒ lo Gasa, wau ode tiimuru dulu-dulunga ode Sodom, Gomora, Adma, wau Jeboim, tunggula mola membideo̒ lo Lasa.
20Ui-uitolo ngoa̒amila wali mai lei Ham. Timii̒du bangusa wau suku lotibiluloa̒ to lipulio lohihilao wau o bahasaalio lohihilao.
21Tei Sem mohuhula lei Yapet, deu̒yito-yito loluuhuru ngoa̒amila bangusa lo Ibrani. 22Mongo walae̒e Sem yito Elam, Asyur, Arpakhasad, Lud wau Aram. 23Wali mai lo Aram yito tuango lipu lo Us, Hul, Geter wau Mas. 24Tei Arpakhsad tiyamo lei Selah. Wau tei Selah tiyamo lei Eber. 25Tei Eber owalao̒ mongo lolai̒ duulota; tabohulio tai̒lunte Peleg, kalana to jamaniilio babaa-ngusawalo todunia lowali hitaya-tayaade; tao̒luolio tai̒lunte Yoktan. 26Wali mai lei Yoktan yito tuango lipu lo Almodad, Selep, Hajar-Mawet wau Yerah, 27Hadoram, Ujal, Dikla, 28Obal, Abimael, Syeba, 29Opir, Hawila wau Yobab. Ngoa̒amilalo boito wali mai lei Yoktan. 30Lipu tambati pilo tibiluloa̒ limongolio luasiilio monto Mesa demola Separ, deu̒yito-yito lipu u hihui̒-hui̒dee to ambahu tiimuru.
31Ui-uitolo ngoa̒amila wali mai lei Sem. Timii̒du bangusa wau suku hibiluloa̒wa tinggai to lipulio wau o bahasaalio lohihilao.
32Ngoa̒amilalo boito wali mai lei Noho, bangusa domi bangusa tinggai moduduo̒ pilito lowali mai limongolio. Timo-timongoliolo talo polaahei babaa-ngusawalo todunia botie lapatio mao̒ taluhe daa̒ boito.
Currently Selected:
ILOOWALI 10: LAIGOR
Highlight
Share
Copy
Want to have your highlights saved across all your devices? Sign up or sign in