Markus 3

O nyawa moi awi gia ma sononga isoneka de wisiloha

(Matius 12:9-14, Lukas 6:6-11)

1O Yesus wokahino kali o puji ma tahuno, de kagena o nyawa moi awi gia ma sononga isoneka. 2O wange magegena o Sabat ma wange, so kagena de o bi Farisika iwinanano nakoso o Yesus asa o nyawa magena wisiloha, eko hiwa. Manga edekati Una iwitailako de Awi sala yasari la iwikalaki. 3So Una wotemo o nyawa awi gia isosoneka gena, “Nahino kanena manga simaka.” So igogou una magena wahino. 4De o Yesus kagena onaka wosano, “Nakoso o Sabat ma wangeka ngini gena idodooha. To ngini nia agama ma bobita itemo o kia. Aku o loha niaaka, eko o dorou niaaka. O nyawa niasisalamati, eko o nyawa niatooma.”

Duma ona magegena imapopongoka. 5Ma ngale manga sininga datogoi gena Una Awi sininga isusa. So kagena de Una womaginano ona de Awi doosaka, de wotemo o nyawa awi gia ma sononga isosoneka gena, “Ani gia natoano.” De una awi gia watoa, de o orasi magena dabolo awi gia gena dalohaka. 6Kagena de o bi Farisika o puji ma tahuno isupu de itagi gila-gila, so de o Herodes awi nyawa yamuruo naga de imatekesikagaro de imatekefakati, la ma ngale o Yesus witooma.

O nyawa yadadala o talaga ma dateka

7Komagena dabolo o Yesus de Awi muri-muri o doku magena yodongosa de yakahika o Galilea ma talagaka, duma o nyawa yadala icarawa gena ka ituo-tuo Una wimote-mote. Ona magena o Galilea ma tonano, 8de lo o Yudea ma daerano, de o Yerusalemno, de o Idumea ma tonano, de o Yordan ma Selera ma sonongano, komagena lo o doku Tirus de o doku Sidonno. Sababu yogiise o kia Una waaaka gena, 9-10kiaka o nyawa yasisiri yadala wasilohaka. So kagena de Una wasulo Awi muri-murika, la o deru moi wisidailako, sababu o nyawa yadala poli so done wisidehelo. Sababu o nyawa yasisiri yadala so imatekekajai-jai yahika Unaka, la manga ngale hitilahi iwipada. 11So ma orasi o nyawa yadadala de manga tokaka wikelelo Una, gila-gila ibukuku de manga suba yatide de imatoore, “We! Ngona manena o Gikimoi ma Ngopa!”

12Duma Una wasibobita de wapoma, upa isingangasu Una gena naguuna.

O Yesus Awi sosulo yamogiowo de sinoto wahiri

(Matius 10:1-4, Lukas 6:12-16)

13So komagena idadika, de o Yesus o tala moiye wodola la waaso o bi nyawa nagoona Una Awi sininga yadahe. So kagena de o bi nyawa ona magena yahino Unaka, 14de Una asa wahiri manga sidongirabano yamogiowo de sinoto, ma ngale idadi to Una Awi sosulo. De wotemo onaka, “Ngohi ngini tinihiri ma ngale Ngohi todupa nidodiao, la tinisulo ngini nisihabari o habari daloloha o Gikimoino, 15de lo ngini ningoduka asa o kuasa tinihike la aku o toka niodusu.”

16So yamogiowo de sinoto to ona manena manga ronga gena:

o Simon (eko wisironga lo o Petrus);

17o Yakobus de awi nongoru o Yohanes, ena gena o Zebedeus awi ngopa (eko ona manena wasironga o Boanerges, ma ngale manga demo idala koloko o diwotu);

18o Andreas;

o Filipus;

o Bartolomeus;

o Matius;

o Tomas;

o Yakobus, o Alfeus awi ngopa;

o Tadeus;

o Simon, gena o Zelot ma nyawa;

19de o Yudas Iskariot, o nyawa una magena o Yesus wisiiija.

O bi guru agama o Yesus iwisisala itemo Awi kuasa o Iblisno

(Matius 12:22-32, Lukas 11:14-23, 12:10)

20Dabolo de o Yesus woliho o tahuka. Duma o nyawa yadadala yahino kali imatolomu, sidago Una de Awi muri-muri iodo lo idadiwa. 21Komagena awi gianongoru yogiise de itemo, “Una magena witogosaka bai!” So ona itagi iwingoso la wisigiliho.

22O guru agama yamuruo naga yahino o Yerusalemno, de itemo, “Igogou, Una magena o Beelzebul imasiuhoka! Ka cawali o Iblis magena, o bi toka wakokolano gena, wihike o buturu la ma ngale o toka wodusu.”

23So kagena de Una waaso o bi nyawa yadadala magena, la wadedemo o ade-ade ngai muruo naga, la wasango to ona manga demo magena itemo o Iblis wihike o buturu. De o Yesus wotemo, “O Iblis o toka wodusu waakuwa sababu o bolu moi. 24Nakoso o kolano moi de awi doku-doku la ona magena kanaga imakitinga, cawali o putu de o wange imatekekokangamo, de ma ngale ona manga rimoi gena asa ibiau so isisa. 25Komagena lo nakoso o tahu ma raba moi la imakitinga, cawali o wange de o putu imatekekokangamo, de ma ngale ona manga rimoi gena asa ibiau so isisa. 26De kanagali nakoso o Iblis ma pareta ma rabaka la imakitinga de imatekekokudoti, o pareta magena bilasu isisa de dalutu.

27O Iblis gena aku positero maro wipoputuru moi. De paakuwa o nyawa moi wipoputuru awi tahu ma rabaka powosa de awi arata pakoora, nakoso o tahu ma duhutu magena wipiliku waasi. So bilasu una o tahu ma duhutu wipoputuru magena powipiliku kasi, de asa potagi la awi arata pakoora. Komagena lo Ngohi, nakoso o bi toka todusu gena, ma ngale ngaroko o Iblis wipoputuru, duma Ngohi masirete wisitura daboloka.

28Ngini tinisingangasu igogou, to ngone nanga dorou paaaka dangodu de nanga demo datotorou nagoonaka bato gena, o Gikimoi aku wonasiapongu. 29Duma nakoso o demo ma dorou so posiceke o Gurumi Datetebi, de ngone magegena o apongu he pamake kawa ma bati sidutu ikakali. Potetemo gena paaka o dorou ikokakali.” 30O Yesus wotemo komagena sababu ona magena iwitemo Una o toka wingosaka, de magena imatero de o Gurumi Datetebi patemo datorou.

O nyawa o Gikimoi Awi dupa yaaaka gena ona yasitero de o Yesus Awi awa de Awi gianongoru

(Matius 12:46-50, Lukas 8:19-21)

31Magena dabolo de o Yesus ma awa de Awi gianongoru yahino. So yaado o tahu ma dudu kasi, de o nyawa moi iwisulo Una wiaso. 32O orasi magena o nyawa yadala imatamiye de o Yesus Una ma dongirabaka, so yotemo, “Tabea, Baba, Ani awa de Ani gianongoru ona inisari Ngona, ona kadoke naga ma duduka itamaha bai!”

33Kagena de Una wosango, “Nakoso to Ngohi Ai awa de to Ngohi Ai gianongoru, gena komanena.” 34Dabolo de Una womaginano o nyawa imatatamiye magena de wotemo, “Hika niakelelo ona manena to Ngohi Ai awa de Ai gianongoru. 35O nyawa nagoona o Gikimoi Awi dupa yamomanara, ona magena to Ngohi Ai gianongoru, de muna magena to Ngohi Ai awabira, de lo muna magena to Ngohi Ai awa.”

Currently Selected:

Markus 3: LAIGBI

Highlight

Copy