Matius 18
18
Nagoona ifoloi ilamo o Gikimoi Awi simaka
(Markus 9:33-37,42-48, Lukas 9:46-48, 17:1-2)
1O orasi magena de o Yesus Awi muri-muri yahino Unaka, de yotemo, “Jou, nakoso o Gikimoi Awi pareta ma rabaka, de nagoona foloi ilamo.”
2O Yesus o ngopa ma ceceke moi waaso so isigokono to ona manga simaka, 3de wotemo Awi muri-murika, “Nginika so tinisingangasu igogou, ngini gena niaaku waasi o Gikimoi Awi pareta ma rabaka niwosa, ka cawali ngini nia sininga niaaka kasi, la imadadi maro o ngopa ma ceceke manena. 4So o Gikimoi Awi pareta ma rabaka nagoona la kanaga imahadoku imatero maro o ngopa ma ceceke manena, de ona magena foloi yolamo. 5De lo o nyawa nagoona la o ngopa manenaka iwidehe daloha sababu imote Ngohi, magena imatero de ona lo Ngohi idehe daloha.
6Nagoona o sababu moi yaaka so o nyawa ma ceceke to ngini nia sidongirabaka Ngohi he ipiricaya kawa, ona magena o Gikimoi asa wafanggali de o dorou foloi ilamo. Lebelaha o teto ilalamo-lamo moi manga toloka isidopilikuka de o teoku yolutuka. 7O bodito! Kodo! O bodito asa yadahe o dunia ma bi nyawa o Gikimoi wihoholuka, sababu o bi moi-moi la kanaga ma ngale ona o dorouku yasitutura. Ma ngeko maro komagena igogou de itiai, duma ibodito nakoso o nyawa o sababu yaaka so o nyawa ma duuru o dorouku itura bai!
8Nakoso de ani gia eko ani dohu la ngona o dorouku notura, hika la nabitoguka! Lebelaha ngona nooho dede o Gikimoi de ani gia eko ani dohu ka ma sononga, upa sidago de ani gia eko ani dohu ngai sinoto de ngona o narakaku asa niumo, ena gena o uku ma sora ikokakalika. 9Nakoso ka cawali ani lako ma sononga de ngona o dorouku notura, lebelaha ani lako magena napeleu la naumoka. Foloisi daloha ngona nooho dede o Gikimoi Awi pareta ma rabaka de ani lako ka ma sononga, upa sidago de ani lako ngai sinoto de ngona o naraka ma ukuku asa niumo.
10So nimasidodiahi! Upa o ngopa ma ceceke moi lo maro o ngopa manena niasidoohawa. Sababu igogou-gogou to ona manga bi malaikat yajajaga o sorogaka, ona gena salalu kanaga Ai Baba Awi simaka. [11Sababu Ngohi o Nyawa ma Duhutu manena Ai edekati tahino o duniaka, la ma ngale o nyawa dede o Gikimoi imakitingaka ona magena tasari la manga dorouno tasisalamati.]”
O ade-ade o duba moi isisisa
(Lukas 15:3-7)
12“Tosiade-ade, kanaga o nyawa moi de awi duba o ratu moi. Nakoso o duba ma sidongirabano moi isisa, done o kia asa waaka. Ngini nia sininga ma dakolo o kia. Igogou, una asa o duba morisiwo de siwo o talaka gena wadohaka, de wotagi o duba isisisa moi wasari. 13De nakoso maena wamakeli, ngini tinisingangasu igogou, una asa ifoloi winali de o duba ngai moi isisisa magena, ifoloi de o duba ngai morisiwo de siwo kiaka isisisawa. 14Komagena lo nia Baba o sorogaka, Una magena wodupawa nakoso o ngopa ma ceceke moi maro manena dede Una imakitingaka.”
Nako nanga dodiao ipipiricaya o dorou yaaka ngoneka
15“Ngohi todoto nginika, nako ngini o nyawa moi kanaga de ani dodiao wopipiricaya moi o dorou waaka ngonaka, de notagi bato unaka de ngini ka nisinoto nimatingaka, de awi sala nosidumu la nowisitiai. De nakoso ani demo wamote de wadehe, aku nia rimoi gena daloha kali. 16Duma nako wadehe woholu, hika womatengo eko yasinotosi nangaho la unaka niwidemo. Sababu o Gikimoi Awi Jaji ma Buku ma rabaka idomaka isilelefo itemo, ‘Nakoso o nyawa moi kanaga wikalaki, de bilasu kanaga o saksi yasinoto eko yaruwange isingangasu la ma ngale o galaki unaka gena yaaku isinako itiai.’ 17De nakoso ona manga demo gena wamotewa de wadehewa, ma ngale una gena nisingangasu o dodiao ipipiricaya manga dolomu yangoduka. De lo nakoso o dodiao ipipiricaya yangodu lo manga demo gena una wamotewa de wadehewa, bilasu niwisidapano de ka niwidohaka, ngini niwisieto una ka o nyawa o Gikimoi wipipiricayawa de lo maro o balastengi itotolomu de o nyawa ma dorou ma binukali.”
18“Ngini tinisingangasu igogou, o kia ngini o dunia ma dokuka nisitatapuka, imatero de o sorogaka lo o Gikimoi wositatapu idomaka. De lo o kia o dunia ma dokuka niatemo isimahaka, imatero de o sorogaka lo o Gikimoi wotemo isimaha idomaka. 19De lo ngini tinisingangasu igogouli, nako ngini nia sidongirabaka nisinoto bato o kia o dunia manenaka nimafakati de nigolo o Gikimoika, Ai Baba o sorogaka, gena ma ngale nia gogolo igogou Una asa womanara. 20Sababu o nyawa nakoso kekiaka bato ma ngale Ngohi so imatolomu, ngaroko ka yasinoto eko yaruwange gena, Ngohi kanaga dede onaka.”
O ade-ade o nyawa yoholu yosiapongu manga dodiao
21Dabolo de o Petrus wahino o Yesusno de lo wotemo, “Jou, nakoso ai dodiao wopipiricaya moi o dorou waaka ngohika, de bilasu ngohi una towisiapongu sidago tosipara ma muruo. Nagala sidago ma para tumudingi?”
22De o Yesus wotemo, “Hiwa! Upa ka ma para tumudingi. Ngaroko una o dorou waaka ngonaka wosipara de ma ratu-ratu, duma una gena ngona bilasu nowisiapongu. 23Sababu o Gikimoi wisitero maro o ade-ade o kolano moi la wodupa awi gilalo manga nagi watailako. 24Ma nonomaka o gilalo moi awi nagi o pipi gena idala icarawa#18:24 o pipi gena idala icarawa: eko “o talenta cala mogiowo.” O pipi o talenta manena ma dala o nyawa moi awi gaji o taungu mogiowo de motoha gena ifoloi. una magena wisirisima ma kolanoka. 25Igogou waakuwa o nagi magena wafangu. So ma kolano gena wosipareta wotemo, ‘O gilalo magena wisiija ka ma moi de awi pedeka, de awi ngopa, de lo awi arata dangodu la awi nagi isifangu.’
26Kagena de o gilalo una magena womabukuku wosuba ma kolano awi simaka wibaja, ‘Ya tuangi, kodo! Noisisabari ngohi. Igogou ngohi asa ai nagi dangodu tafangu.’ 27So ma kolano awi galusiri asa ibaoka, wamalo o gilalo una magena wigalusiri sidago lo wipalako, de wotemo unaka, ‘Ani nagi gena dangodu ngohi tapikika.’
28Daboloka, de o gilalo magena wosupu de una imakamake de awi dodiao moi ka wogogilaloli, awi nagi unaka cawali o pipi o cala muruo naga.#18:28 o pipi o cala muruo naga: eko ‘o dinar ratu moi’. O pipi o dinar manena ma dala o nyawa moi awi gaji o ngoosa saange. De una awi dodiao gena witago de wigohore, de lo witemo, ‘Ce! Ani nagi dangodu bilasu nofangu!’
29De awi dodiao gena to una awi simaka wobukuku, wibaja de wotemo, ‘Ya ai dodiao, kodo! Noisisabarisi. Igogou, ngohi asa ai nagi tafangu.’ 30Duma o gilalo una magena wisidoohawa. Sidago una awi dodiao asa wisingosa o buika, sidago done to una awi nagi dangodu lo wofangu.
31Ma orasi o kia imaakaka gena o gilalo ma somoa yokelelo, de ona manga sininga isusa. De o gilalo awi manara maro komagena ona itagi isingangasu ma kolanoka. 32So ma kolano woise, de una asa witoosa. So o nyawa wasulo itagi o gilalo ma dorou magena wiaso la una wahino de wisitemo unaka, ‘Gilalo ma dorou! Ngona ani nagi dangodu tapikika, sababu ngona noibajaka. 33Asitagala! Igogou, ngona bilasu ani dodiao wogogilalo una magena nowigalusiri la imatero de ngohi tonigalusiri ngonaka.’ 34Ma kolano gena foloi wingamo. So o gilalo ma dorou gena iwisingosa o buika, sidago una wofangu awi nagi dangodu-ngodu. Sidago kagena.” 35O Yesus o ade-ade gena wosiboloka, de wotemo, “So komagena lo Ai Baba o sorogaka asa waaka ngini moi-moika, ka cawali ngini lo nia dodiao niasiapongu igogou de itiai.”
Currently Selected:
Matius 18: LAIGBI
Highlight
Share
Copy
Want to have your highlights saved across all your devices? Sign up or sign in
