Matius 13

O ade-ade o gisisi wosihahaja imatero maro o Gikimoi Awi pareta

(Markus 4:1-9, Lukas 8:4-8)

1O wange magena dabolo de o Yesus o tahu magenano wosupu wotagi kagena o talaga Galilea ma dalateka wogogeku. 2Sababu o nyawa yahino yadala poli de o deru moi kagena o akeka, so Una wopane de womatamiye. De o nyawa yadadala magena imaooko o talaga ma dateka. 3Kagena Una wobicara de to Una Awi ade-ade ma ngale o dodoto idala gena wadoto. So komagena de Una o ade-ade moi wasibicara onaka, “Kanaga wototoro moi wotagi awi gisisi wosihaja. 4So de una wosihaja gena ma sononga itura o ngekoku, so o namo yahino de yaodoka. 5Ma sonongali itura o tona datetetoku de ma tona ka ma cunu. So o gisisi magena ma goho isupu datai, sababu ma tona ilamowa so imasingutu datai. 6Duma ma ngutu ka ma cunu, so de o wange yodisiwa de o goho magena damalai so isoneka. 7De ma sonongali itura o tona datototopoku. La o gisisi magena ioho imatekekangaho de o totopo so o totopo magena yalalo so isoneka. 8O gisisi ma sonongali asa itura o tona dalolohaku. So ioho ma goho ifero daloha de ma hutu ilamo so isopo. Ma sopo kanaga daloha sidago ma para ratu moi, de ma binuka daloha sidago ma para moributanga, de ma binukali daloha sidago lo ma para moruwange.

9He! Ngini de nia ngauka tanu niise la nianako. Sidago kanena.”

Dadoohaso o Yesus wobicara de to Una Awi ade-ade

(Markus 4:10-12, Lukas 8:9-10)

10O Yesus wodoto dabolo de Awi muri-muri yahino de imasano Unaka, “Baba, nakoso o nyawa yadadalaka nabicara gena, dadoohaso bilasu de to Ngona Ani ade-ade.”

11So Una wotemo onaka, “O kia ngini niananakowa sidago o orasi manena upa o nyawa yadadalaka, duma ka ngini manena o Gikimoi winihiri la winihike o ade-ade ma ngale, so dangodu aku nianako ma ngale idodooha Una wokolano de wopareta. 12Sababu nagoona o Gikimoi Awi demo yoise la manga siningaka imadiahi, done Awi demo magena de ma boloika ifoloi asa wasidogo manga siningaka la yosihoda itiai. Duma nagoona Awi demo gena yoholu, ngaroko Awi demo kanaga manga siningaka la ka ma cunu, done asa ka wadehe kali. 13Komagena so nako yadadala gena Ngohi tabicara de Ai ade-ade, sababu ona magena kanaga de manga lakoka, duma o ade-ade ma ngale gena yasahewa de lo cawali de manga ngauka, duma imasigisewa eko isidodoguwa. 14-15Komagena idadi de imaaka la isiganapuka, imatero maro o kia idomaka o Gikimoi Awi demo ma nabi Yesaya wosilefo daboloka, ena gena,

‘Nakoso o nyawa ona magena de manga lakoka tanu imasigelelo,

de nakoso de manga ngauka tanu imasigise,

la manga sininga ipelenga de tanu isihoda,

de asa manga dorou yodongosa de imatoba,

de Ngohi manga Jou asa tasisalamati manga dorou ma rabano.

Duma ona manga sininga datogoi so

de manga lakoka duma imasigelelowa

de manga ngauka duma imasigisewa.

So ona asa ka iise, duma moiwa yanako,

de asa ka yakelelo, duma moiwa yanako ma diai.’ ”

16La o Yesus wotemoli onaka, “Igogou, ngini asa nisanangi, sababu ngini gena o kia naga taaaka magena niakeleloka, de lo to Ngohi Ai dodoto gena nioiseka. 17Ngini tinisingangasu igogou, kanaga idodomaka o bi nabi yadala de lo o nyawa de manga sininga itotiai la yodupa yokelelo o kia o orasi manena ngini niakokelelo, duma ona yakelelowa. Ona lo yodupa yoise o kia o orasi manena ngini nioiise, duma ona yoisewa.”

O ade-ade o gisisi wosihahaja ma ngale gena o Yesus wodoto

(Markus 4:13-20, Lukas 8:11-15)

18“O ade-ade o nyawa moi o gisisi wosihahaja ma ngale gena komanena, so niise la nianako. 19O gisisi ma binuka o ngekoka o namo yaodo gena, imatero bato o nyawa yoiseka o Gikimoi Awi habari, duma yosihodawa, so o Iblis wahino de wakoora to ona manga sininga ma rabano so isisaka.

20O gisisi ma binuka itutura o tona datetetoka ioho duma damalaika, gena imatero bato o nyawa yoise o habari daloloha de gila-gila yadehe de manga sininga isosanangi. 21Duma koloko ma ngutu ilukukuwa, so ona yopiricaya itekawa. So de o susa yamake de ma ngale o habari daloloha so yasisangisara, de gila-gila ona ma Jou wipalako so imakiliho de ikafirika.

22O gisisi ma binuka itutura o tona datototopoku so o totopo yalalo so isoneka, gena imatero bato o nyawa o habari daloloha magena yoiseka. Duma ona magena isihawateri ma ngale manga oho, de lo yodupa yokaya. Komagena o Gikimoi Awi demo yosingou kawa, de o manara daloloha lo yodupa kawa. 23De o gisisi itutura o tona dalolohaku ioho daloha, gena imatero bato o nyawa o Gikimoi Awi demo magena yoiseka, de yosihoda de manga sininga ma rabaka imadiahi, so igogou o manara daloloha yaaka. Kanaga manga manara daloha sidago ma sopo ma para ratu moi, kanaga manga manara daloloha sidago ma sopo ma para moributanga, de kanaga lo manga manara daloloha sidago ma sopo ma para moruwange. Sidago kanena.”

O ade-ade o nguusu o doro ma dongirabaka

24O Yesus wosijaritali o ade-ade moi o nyawa yadadalaka wotemo, “O Gikimoi wopareta gena, posiade-ade imatero maro o nyawa wototoro moi o gisisi o tamo daloloha wosihaja awi doroka. 25O putu moiku o nyawa yangodu imaiduka, de una awi saturu gena wahino de o doro ma dongirabaka o nguusu ma gisisi wosihaja de womajoboka. 26So awi doroka gena ma tamo ma goho isupu sidago ifero, duma o nguusu lo ioho imarimote. 27O nyawa wasesewa ona magena yahino wototoroka itemo, ‘Baba, igogou o gisisi daloloha posihahajaka gena, dadoohaso sidago o nguusu lo kagena ioho.’

28Una wosango wotemo, ‘Magena ai saturu awi manara.’

Kagena de ona itemoli, ‘Nako nomode, de o nguusu gena ngomi mitagi miarapuka.’

29Magena de wotemo, ‘Ngaroko upa. Sababu nako o nguusu magena niarapu, de tamo o doro ma goho lo imasidarapu. 30Hika niodamaha kasi o nguusu magena lo ioho sidago o gugutu ma orasi yaado. Kagena de ngohi asa youutu tasulo la o nguusu gena yarapu idoma kasi, la yatolomu de yapiliku, la yatupuka. Dabolo de asa o tamo yautu de yatolomu, la yadiahi o polaka.’ ”

O ade-ade ma ngale o Gikimoi Awi pareta ingoha sidago o dunia ma sigilolika

(Markus 4:30-34, Lukas 13:18-21)

31Dabolo de o Yesus o ade-ade moi wosijaritali o nyawa yadadalaka wotemo, “O Gikimoi wopareta maro o kolano moi gena, posiade-ade koloko o sasawi ma sopo ngai moi gena o nyawa moi awi doroku wodato. 32Ngaroko o sasawi ma sopo magena ifoloi daceke de o sopo ma somoa o dunia manena ma dokuka, duma nako o sopo magena ioho, ma goho asa ilamo ifoloi de o ngangaru ma somoa, de imadadi maro o gota iuuma-uma, so kagena ma umaka o bi namo asa yahino imaigu.”

33Kanaga o ade-ade moili Una wosijarita onaka wotemo, “O Gikimoi wopareta gena, posiade-ade koloko o ragi ka ma cunu o ngopedeka moi mongado mosicapu de o terigu sutu ilamo. So kagena de o ragi magena o terigu dangodu isidola so ifero de idadi foloisi ilamo.”

34Ka cawali o ade-ade maro komanena o Yesus wadoto o nyawa ona magenaka. 35Komagena waaka sidago idadi de isiganapu o kia maro idomaka o Gikimoi Awi demo o nabi moi wosilefo daboloka, ena gena,

“Ngohi ona tadoto tapake o ade-ade.

Ma dongoho o dunia isidadi kusi de o dodoto,

kiaka isimamane waasi,

gena Ngohi asa tosingangasu onaka.”

O ade-ade o nguusu o doro ma dongirabaka ma ngale gena o Yesus wasidoto

36Dabolo de o Yesus yadadala ona magena wadongosa de wowosa o tahuka. So Awi muri-muri yahino de yotemo, “Baba, tanu o ade-ade o nguusu o doro ma dongirabaka ma ngale gena nomisingangasu nositotiai ngomika.”

37Una wotemo, “O nyawa o gisisi daloloha wosihahaja gena, positero de Ngohi, o Nyawa ma Duhutu. 38O doro gena positero de o dunia manena. O gisisi daloloha gena, positero de o bi nyawa la idadi o Gikimoi Awi pareta ma rabaka. De o nguusu gena positero de o bi nyawa la kanaga o Iblis wimomote. 39Ai saturu o nguusu wodadato gena, positero de o Iblis. O gugutu gena positero de o dunia ma dodogu. De youutu gena, positero de o bi malaikat. 40Maro o nguusu gena yarapu de lo yatupu o ukuka, komagena lo imadadi ma orasi o dunia ma dodoguka. 41Ngohi o Nyawa ma Duhutu manena asa Ai malaikat tasulo, la yatolomu nagoona bato o nyawa o dorouku yasitutura ona yangodu de lo o bi nyawa ma dorou yangodu. 42Ona yangodu asa yaumo o uku isosora-sora ma rabaku, kiaka ona asa yoari de lo yosangisara. 43Duma o orasi magena o nyawa la kanaga o moi-moi o kia itotiai yaaaka, igogou ona manga mulia o Gikimoi manga Baba to Una Awi pareta ma rabaka asa foloi wosimane, maro o wange ma lako isora. He! Ngini de nia ngauka tanu niise la nianako.”

O bi ade-ade: Bilasu posilamo la ngone podadi o Gikimoi Awi nyawa Awi pareta ma rabaka

44O Yesus wotemo, “Nakoso ngini nidadi o Gikimoi Awi nyawa Awi pareta ma rabaka, magena foloisi daloha. Magena idadi de imatero maro o ade-ade manena: O nyawa moi kanaga wamake o guraci o tona ma rabaka, maena gena foloi ihali, de gila-gila watalake kali. Kagena de una awi sininga ma nali, so una asa wotagi awi tahuka, de awi arata dangodu wosiija de womakiliho so o tona, kiaka o guraci wamamake gena, waija.

45Komagena lo nakoso ngone podadi o Gikimoi Awi nyawa Awi pareta ma rabaka, magena imadadi imatero maro o ade-ade manena: Kanaga woiija moi o mutiara ma ija ihahali gena wosari. 46Ma orasi una o mutiara moi ihahali wamakeka, de una wotagi awi arata dangodu wosiija, de asa wotagi o mutiara magena waija.”

O ade-ade o soma

47“Ma orasi idadi o Gikimoi wopareta o duniaka, magena imadadi imatero maro o ade-ade manena: O soma ilalamo moi yaumo o talagaku, de yamake o bi nao daloloha de lo o bi nao datotorou. 48Ma orasi o soma magena iwedoka, de yososoma manga soma magena yalia de yatide o dowongisa. Dabolo de ona igogeku, de o bi nao gena yahiri-hirika. O bi nao daloloha o karajaku yongado de lo o bi nao ma dorou gena yaumoka. 49Komagena lo o dunia ma dodoguka o bi malaikat asa yotagi, la o bi nyawa kiaka kanaga o moi-moi itotiai yodupa yaaka de lo o bi nyawa ma dorou gena asa ona yahiri. 50Dabolo de o bi nyawa ma dorou ona magena yaumo o uku isosora-sora ma rabaku, kiaka ona asa yoari de lo yosangisara.”

O ade-ade ma ngale o dodoto idodoma de lo o Yesus Awi dodoto damomuane

51Dabolo de o Yesus Awi muri-muri wasano wotemo, “Idodooha Ai ade-ade dangodu magena ngini nisihodaka.”

Ona itemo, “Miosihodaka bolo.”

52Kagena de Una lo wotemo onaka, “Nako komagena, de kanaga o ade-ade moili komanena: Nakoso o guru agama moi kanaga wogolo la o dodoto ma ngale o Gikimoi Awi pareta gena widoto, de o guru agama magena aku wisitero maro o tahu ma duhutu moi, ena gena awi kaya eko awi arata magena ma ngihino wosisupu de wasikelelo awi arata damomuane de lo awi arata idodoma.”

O Nazaretka iholu o Yesus wipiricaya

(Markus 6:1-6, Lukas 4:16-30)

53O Yesus o ade-ade magena wosijarita daboloka, de womajobo 54so wotagi to Una Awi soa de Awi dokuka. Kagena de Una wotagi wodoto o puji ma tahuka, de o Nazaret ma nyawa magena yohairani so itemo, “Nagoona widoto so to Una Awi pade de Awi cawaro maro komagena. De to Una Awi kuasa kiano wamake, so aku waaka o nonako ihahairani. 55Igogou! Una manena cawali o tahu woaaka moi awi ngopa, ma awa gena ongo Maria, de Awi nongoru o Yakobus, o Yusuf, o Simon de o Yudas. 56De Awi bira lo kanena igoge so pomasihie moi. Kiano Una o kuasa wamake la o bi moi-moi magena aku waaka.” 57So ona yodupa kawa yoise maro o kia Una wotetemo gena.

Kagena de Una wotemo onaka, “O nabi moi asa iwisihoromati gena o bi doku de o bi soa ma somoaka, duma ka cawali awi doku de awi soaka de awi gianongoru de awi awabira gena iwihoromatiwa.” 58Komagena so o riho magenaka o nonako ihahairani idalawa waaka sababu ona manga piricaya ihiwa.

Currently Selected:

Matius 13: LAIGBI

Highlight

Copy