Yohanes 2

O Yesus o nonako ihahairani waaka o kawi ma rarameka

1O Yesus womasidiado o Kana ma dokuka o Galilea ma tonaka, de ma goginitano kanaga o kawi ma rarame moi yaaka, so Una ma awa lo kagena naga. 2Mutuwade Una de Awi muri-muri lo yakoro so yotagi o rarame magenaka. 3De kagena o anggur yaudo duma pasa de damataka. So o Yesus ma awa motagi mowisingangasu Unaka, “Kodo! Manga anggur gena damataka.”

4De Una wotemo, “Ai awa, nako ngona eko Ngohi gena, upasi pocapu, sababu to Ngohi Ai orasi gena yaado waasi.”

5Ngaroko komagena, duma ma awa motemo o rarame ma bi leleanika, “O kia bato Una wosulo nginika, magena ngini bilasu niaaka.”

6Kagena naga o ake ma rube ngai butanga. O rube ilalamo so ma raba gena nagala o ake o liter ratu moiku de iwedo, de magena isidailako ma ngale o Yahudika ma nyawa bilasu imatiodo, mote to ona manga adati de manga galepu. 7Kagena de asa Una wotemo ileleleanika, “O ake ma bi rube dangodu magena hika ngini o ake nioguse sidago iwedo.” Gila-gila ileleleani ona magena o bi rube magenaku o ake yoguse sidago dangodu iwedoka.

8Yoguse daboloka, de Una onaka wotemo kali, “O bi rube iwewedo-wedoka magena ma ake niaui de niwihike o rame ma duhutuka.” De maro o kia Una wosulo onaka, magena ona yaaka.

9Duma o rube ma ake yatotota magena Una waaka so o ake de imadadi o anggurka. So o rarame ma duhutu una magena asa wadahake, de una awi siningaka wotemo, “We! O anggur magena kiano ikahino.” Ngaroko wanakowa, duma igogou ona ileleleani magena yanako itiai. So una wadahakeka, de wokakawi una magena wiaso 10de wotemo unaka, “We! O nyawa manga biasa gena manga anggur damomonge magena yasiudo idoma sidago manga nyawa yakokoro ona yaduga. Dabolo de ona manga anggur damamali gena yasiudo ituuru. Duma ngona ani anggur ma nonoma damomonge gena nadiahi sidago o orasi manena de asa nosisupu so nasiudo ituuru.”

11O nonako ihahairani manena o Yesus waaka o Kana ma dokuka o Galilea ma tonaka. O riho magenaka de asa to Una Awi nonako-nonako ihahairani gena wosolano waaka. Komagena Una Awi kuasa masirete asa wasimane onaka. So Awi muri-muri magena manga piricaya Unaka gena foloi idogo.

12So daboloka, de Una wotagi wokahoko o Kapernaum ma dokuko. Ona itagi imakangaho gena ma awa, de Awi nonongoru, de lo Awi muri-muri. So o wange muruo naga ona igoge o doku magenaka.

O Gikimoi Awi Tahuka imasiiija o Yesus wadusu

(Matius 21:12-13, Markus 11:15-17, Lukas 19:45-46)

13So kagena o Yesus wogoge wodamaha sidago o Paskah ma Wange ma Rarame ma orasi he idumuka, de Una wotagi wokahie o Yerusalemye. 14Kagena womasidiadoka, de Una wotagi de wowosa o Gikimoi Awi Tahu ma lolohaka. De kagena asa Una wasitodadaheno o nyawa yadadala o riho magegenaka imasiiija de imatekekokiija. Ma binuka o sapi, o duba, de lo o namo dara imasiiija gena yaaka manga suba ma gaso, de ma binukali o nyawa o doku ma somoano manga pipi imatekesitagali. 15Magena wakeleloka, de Una asa o ngangapo moi waaka o iwino la idadi maro o cambuk moi. De Awi cambuk magena, Una gila-gila o Gikimoi Awi Tahu ma lolohaka o nyawa ona magena wadusu de wasisupu. Wadusu ona maro o bolumoi-bolumoi, ona de manga sapi de lo manga duba. De lo ma binuka o pipi imatekesitagali ona manga meja waeha sidago lo manga pipi gena ihaja imakokitingaka. 16De ma binukali o namo dara imasiiijaka Una wotemo, “Asitagala! Ngini gena nia namo niaaho de nisupu. Awadede! Upa lo Ai Baba Awi Tahuka de niaaka o riho imasiiija.” 17Komagena imaakaka, de Awi muri-muri magena asa yosiningali kanaga idodoma o Gikimoi Awi Jaji ma Buku ma rabaka isilefo itemo, “Ai Baba, Ngohi Ai sininga ma dupa foloisi ilamo gena Ani Tahu bilasu o nyawa yahoromati sidago he dangade tosone.”

18Daboloka, de kanaga o Yahudika manga roriri ona magena yahino Unaka, de itemo, “Ce! Idodooha so Ngona naaka komagena. Ngomi mitemo Ngonaka bilasu o nonako moi nomisimane ngomika. La ma ngale ngomi aku mininako, igogou Ngona gena Ani kuasa ma sihino o Gikimoino.”

19De Una wosango wotemo, “Nakoso ngini o Gikimoi Awi Tahu manena niaruba, de ma deka ka o wange saangeka de Ngohi asa tosigoko kali.”

20De ona itemo, “Ilaha! Kanaga ma deka o taungu moruha de butanga o nyawa imanara asa o Gikimoi Awi Tahu manena isigoko. De Ngona gena nobicara de notemo, ngaroko o tahu magena yabiauka, duma ma deka ka cawali o wange saange de Ngona aku nosigoko kali.”

21Duma Una Awi ngale gena Awi rohe masirete wositero maro o Gikimoi Awi Tahu. 22Cawali ma orasika done Una o sone ma rabano wisioho kali, de asa Awi muri-muri yosininga kiaka idomaka to Una Awi demo komagena gena wotemo, o Gikimoi Awi Tahu wositero de Awi rohe. Yosiningaka, de asa ona yopiricaya igogou o Gikimoi Awi demo ma ngale o Yesus o sone ma rabano wisioho kali de lo o bi moi-moi dangodu magena Una wasingangasu dabolo onaka.

23Ma orasi Una kanaga o Paskah ma Wange ma Rarame o Yerusalemka, de o nyawa yadadala asa ipiricaya igogou Una o Salamati ma Kolano gena, ka cawali o nonako ihahairani waaka. 24Duma Una woholu wapiricaya onaka, sababu o nyawa yangodu manga sininga ipepelu gena ka wanako. 25Komagena lo ma ngale o nyawa manga sininga gena upa he o nyawa asa iwisingangasu, sababu igogou Una wanako daboloka.

Currently Selected:

Yohanes 2: LAIGBI

Highlight

Copy