MATIUS 3
3
Baptis Tei Tita Me Jahja Kidi
1Okai kou gaa kodaa baptis tei tita me Jahja kidi Judea ka gei tapa mana pitokeete mei.
2Eteete mana, „Ikii tedemiwei; epaawado ka jakimakita makiida kapa keega no,” etii.
3Okai kii kidi maida make tikauwa ka gokobaki tijawiidaiga wegai tita me Jesaja jawegata me kidi, wegaate mana:
Gei tapa mana emeeme tina;
Tuhanja ita epeepi jawadijawii,
Kago-pagooja maija doodoo jaawii.
4Jahjaja kagaba ko unta ijo, daana piti ko kado ka. Okaija naija agijo kobeepa ma, buguwa ka dokone odijo ma.
5Tijake Jerusalim ma, Judea ma, Jarden onee watija ka maki utoma podomijake Jahja edou uwii.
6Okai Jarden oneiga baptis etai, okeija ka peu awitaido odajake.
7Kodeja Parisi bagee ma Saduki bagee ma me wedaba baptis taine meetigo edojake eteete mana, „Kowaa kei, jina tuma, kumi dimi putu duwadoke taita kodoopa make okii mana kodo meija kitipi?
8Ikii tedemai mana ma utuutu ka uta gojawii,
9daana ikii kede kegepa duba ’Iniitai Ibrahim kidi’ mana kodo dimi te gai. Ani kitii kouja, Ugatame kei mogoudo kei Ibrahim jokaane eewii ko bida jago kidi.
10Ito kou maija pija epaapa jika makijake topi. Okai kouja pija gakita enaa uta gojawii beu daniija kobimakijake bodija jookogai.
11Ani ki uwo ka baptis kitai, tedemai mana maida make. Kodeja ani nemouga meitagi me kidi ani ma ko okai ki bida jago me. Okaija bado awii ani jadokii ko nadou peu. Okai kidi Rohulkudus ma bodija ma ka baptis kitaitagi.
12Jimu mapagi te-tai agijo kodo okaija ganeida topi, daana gandum uta epaida deekumijake uta awimakijaida awimakaitagi. Kodeja kopu jato ko te madinimake bodija duba jookogaitagi,” etii.
Tuhan Jesus Baptis Etita
13Tijake Jesus Galilea make Jarden oneepa mei, Jahjaja baptis ete-tijake.
14Jahja ekonijake eteete mana, „Akija baptis natai naako enaa; magijo ka aki aneepa meege?” etii.
15Kodeja Jesus wo eteete mana, „Dá ko beu no, inii kou kei tai to. Kou danite inii kei tija agijo dijo domakai to,” etii. Tijake kei tita.
16Jesus baptis etijake okai kou gaa kodo uwo duba make wadouwe kai. Epa damo kebadoke tijake Ugatameja Roh wonou dani mijouwe kijake okai wado animakai dou.
17Tijake epa duba make ka mana wuu tijake eteete mana, „Kii ke ani Joka didé, ani juma dege-dege etita me kidi,” etii.
Currently Selected:
MATIUS 3: EKG
Highlight
Share
Copy
Want to have your highlights saved across all your devices? Sign up or sign in
