MATIUS 22
22
Buka Nai Ena Dani Awe-tai Mana
1Kigeena ma Jesus ena dani awe-tai manaidaiga oowegai, eteete mana,
2„Epaawado ka jakimakita makiida kou ko tonawi me idaana ka jokame waka bukeeteida buka nai ewaa awii dani bukaa.
3Buka no-taida manaa-tita bageido ebuke-tijake jakei te-tai bagee ebadikumii, kodeja okei mei beu.
4Kigeena ma joko ka jakei te-tai bagee ebadikumii, eteete mana, ’Maana-tita bageepa naaetii, Gadodowei, anija buka naine epeepi timakeega; sapi ma daka jago sapi joka ma duwaaga, daana utoma epeepi timakai. Buka nooteida mewei, kiteegi, naaetii,’ etii.
5Kodeja okei aadaba tijawijake uwii. Me idaana taidaapa, me idaana munaa uwii.
6Joko ka kedaa jakei te-tai bagee ejakimakijake peepu etijawijake wagimakai.
7Tonawi me kidi emoge egajake jape make-tai ebadikumijake kei me wage-tai kede peepu tijawijake okeija maki okogo bodija kijumai.
8Tijake jakei te-tai bageepa eteete mana, ’Buka naida kodo epeepi tijawii na kojoka, kodeja manaa-tita bagee mei ko edou peu.
9Okai kouja itaija akaweida uwijake edoupiga bageido utoma buka naidaapa naaebukai,’ etii.
10Jakei te-tai bagee kede ita maida uwijake edota bagee utoma kotuu etimakai, peu ma enaa ma. Tijake buka naida ebukita bagee ka tipi tipi timakai.
11Tonawi kidi ebukita bageido edoune tijake jokoujo kijake, me idaana waka bukii maida make buka nai kagaba makii beu ti-toojogo edou.
12Tijake eteete mana, ’Kowaa ke, kawe dani tijake waka bukii maida make buka nai kagaba te makijake wadoujo keege ko?’ Etijake okai mana tagu.
13Tijake tonawi kidi ooto-tai bageepa eteete mana, Gane ma bado ma buda egadimijake juwouda ka bunita duba eemigimakei. Okai kouda kodaa jege ma egaagede ma to touda.
14Me wedaba manaa-tijake wija to ewitoki-motita kouja.
Kaisar Mege Eedai
15Tijake Parisi bagee uwijake okaija mana maida ejakimakaine tijake amo wegai joko wegai.
16Okeija etope-tai Herodes eepe-tai bagee ma enaimo okaapa ebadikumijake, eteete mana, „Ei, Kuduu, inii epi aki maakidi me, daana Ugatameja takaa doodoudaiga nitopeige; aki me idaana ma ibo ejaikai beu, aki me ebepeka te witokai kouja.
17Okai kouja niti-niimai, akija gai ko kawe dani, Kaisar mege menii pijo, mee? dá,” etii.
18Kodeja Jesus okeija peu dimi jadojake eteete mana, „Kowaa kei, matabe bagee, magijo ka ikii nagaado tai?
19Eedai mege ko namuwakiwei,” etijake okei mege jadokemei.
20Tijake Jesus eteete mana, „Meija ajá ma ebijamakita mana ma topi?”
21Etijake „Kaisar ipuwe” etii. Tijake Jesus wo eteete mana, „Keetigo ko Kaisar ipuwe agijo Kaisar wo menii, daana Ugatame ipuwe agijo Ugatame wo menii,” etii.
22Okei kou mana juwijake ego takuu-takuu. Okei ejaikidokijake uwii.
Bokata Bagee Anigou Mana Egaado Tita
23Okai kou naago kodo Saduki bagee okaapa mei; bokata bagee taanigou mana wega-tai bagee kede. Okei egaado
24teete mana, „Ei, Kuduu, Musaja enita: Kou danite me idaana joka makii beu tijake bokapi, kenekame mijáá kodo wo bukijake kenekame maida make me ijoo jakebajawii.
25Inii jupi keneka pituwo toojogo. Iboutome kidi waka bukijake bokai. Joka makii beu tijake wenekame maida jagamo kodo jajaikai.
26Kou dani maija, ipougame ma, mabiime ma, pituwaago kidiipa to.
27Okei wadouto jagamo kodo bokai.
28Keetigo ko bokata bagee anigou naago okei pituwo kede jagamo kodo meija waka kaita? Okei utoma ebukita kou no,” etii.
29Tijake Jesus wo eteete mana, „Ikii uneune, kapogeije ma Ugatameja bida agijo ma ewo kouja.
30Anigou naago okei waka bukii na beu, waka eumai na beu kouja; kodeja epaawado ka jaetigo-tai bagee dani bukaa.
31Kodeja bokata bagee anigou mana muto ko, ikii Ugatameja kitita mana kodo ebatai beu, mee? kou ko:
32Ani ki Ibrahimja Ugatame, daana Isakja Ugatame, daana Jakubja Ugatame kidi. Ugatame kidi bokata bagee ipuwe ko beu, kodeja ija bagee ipuwe.”
33Me wedaba kou mana kodo juwijake okaija etopita mana muto ego takuu-takuu umina tai.
Ibo Nitimakita Mana
34Okai Saduki bagee mana tagu etijawita mana kodo Parisi bagee juwijake okei kotuu timakai.
35Okei jupi ka me idaana, kii ke kapogeije epi me kidi egaado taine tijake eteete mana,
36„Ei, Kuduu, Musaja dijo douja mana duba kawi ka nitimakita mana ki ibo?” etii.
37Tijake Jesus eteete mana, „Akija Tuhan Ugatame kidi kegepa puki ka ei egai, daana dimi mana puki ka ma, daana dimi puki ka ma.
38Kou ko ibo dijo douja mana kodo, daana epauto.
39Wijaago ka maija, okai kii dani, aki watija ka bagee aki akaato danite ipa egai.
40Kei mana wija kei ke Musaja dijo douja mana ma, gokobaki tijawiidaiga wegai tita bageeja ka mana ma epauto ka kodo,” etii.
Daud Jokame Maida Make Egaado Tita Mana
41Parisi bagee kotuu timaki-toojogo gaa Jesusja okeepa egaado tai.
42Eteete mana, „Keristus kidi mana ikii kawe dani gai? Okai meija Joka?” etii. Okeija wo eteete mana, „Daud Joka kidi ki.”
43Etijake wo eteete mana, „Keetigo kawe dani tijake Roh ka gokobaki etijawijake Daud ka Tuhan eebatai? eteete mana.
44Tuhan kidaa anija Tuhan kidiipa etita mana,
Anija etikaato gebo animakai,
Be kagata bagee akija bado mijo
Tagi kaatiitaida to.
45Kou danite Daudja Tuhan eebatipi, kawe dani tijake okai Jokame kai?” etii.
46Tijake me idaana ma mana kato ma wo etii beu, daana okai kou naago make wado maija me idaana ma egaado tai uu beu.
Currently Selected:
MATIUS 22: EKG
Highlight
Share
Copy
Want to have your highlights saved across all your devices? Sign up or sign in
