LUKAS 6

Sabbat Naago Gandum Uta Duwai

1Sabbat naago kigeena gandum taidaiga wokaato kai. Etope-taido gandum jukuuno kodo duwa-motijake nai, gane duba widigi tijake.

2Kodeja Parisi bagee wija wido ka eteete mana, „Magijo ka ikii Sabbat naago dijo beebu teete?” etii.

3Tijake Jesus wo eteete mana, „Ikii Daudja kei tita agijo kapogeije ebatai beu, mee? Okai ma, okai ma enaimo bagee ma naidi tijake

4okai Ugatameja owaa duba wadoujo kijake makita goti kodo motijake nai; daana okai ma enaimo bagee maija menita; nai ko dá kodeja; imam to pijo,” etii.

5Daana eteete mana, „Me Joka kidaa Sabbat naago boko duwajawita me kidi,” etii.

Enakaato Gane Bokata Me Beu Jaawii

6Joko ka Sabbat naago Jesus sembahjang owaa duba woujo kijake meido etopai. Kouda kodaa etikaato gane bokata me idaana toojogo.

7Kapogeije epi bagee ma, Parisi bagee ma edoutou, Sabbat naago kodo me kidi beu jaawiipagi, mee? ijeije etaine takaa ubaate tijake.

8Kodeja okeija ka dimi kodo Jesus epi, tijake enakaato gane bokata me kidiipa eteete mana, „Me jupiida joonidoke tai,” etijake okai me jupiida joonidoke tai.

9Tijake Jesus eteete mana, „Ani kigaadou taine: Sabbat naago enaa agijo kei tai pijo, mee? peu agijo kei tai pijo. Daana ija eewii, mee? wagimakai,” etii.

10Jesus meido kede edoumigijake me kidiipa eteete mana, „Akija gane mapido ti.” Etijake okai kou kei tijake gane bida kidoke tai.

11Kodeja okei emoge umina gajake Jesus maida magijo kei tai mana amo wegai joko wegai tai.

Etope-tai Wija ma Gaati Ewitokita

12Okai kou naagoudo kodo Jesus sembahjang taine dimiida uwii. Ugatameepa sembahjang teete awijawii.

13Abata digii okaija etope-taido manaa-tijake okei jupi make me ida wija ma gaati ewitoki-motii, okai eti-awita bagee eebatita bagee kede.

14Simon kidi, kii ke okai Peterus eebatita kidi ma, kenekame Andereas ma, Jakub ma, Jahja ma, Pilipus ma, Bartolomius ma,

15Matius ma, Tomas ma, Alpius jokame Jakub ma, Simon Zelotis eebatita kidi ma,

16Jakub jokame Judas kidi ma, Judas Iskariot ma, Jesus eekegajawita me kidi.

Tadiida Make Mana Wudita

17Okei ma enaimo okai mijo mejake tadiida joonidoke tai; etope-tai bagee me wedaba, daana Judea ma Jerusalim ma me wedaba, daana maikai watija Sur ma Sidon ma me wedaba

18ejuwaine mei, daana didi agijo beu jaawe-tijake. Daana enija jago bagee maija beu jaawita.

19Kotuu timakita bageido utoma ewinikidoune, okai duba make bida agijo podomijake me utoma beu jaawii kouja.

20Okai etope-taido edoumigijake eteete mana:

„Ideide no, ikii daba bagee; Ugatameja jakimakita makiida ikii ipuwe kouja.

21Ideide no, ikii ito kou naidi bagee; ikii mobu kaita kouja.

Ideide no, ikii ito kou jege bagee; ikii kijai taita kouja.

22Ikii ideide no, me ka be kigai gaa, daana ikiiniinii kitijawii gaa, daana kiwidogijake ikiija ka eka ko peu kodo kijaikai gaa, me Joka maida make!

23Okai kou naago kodo ikii ideide ma dogipogi tina tai. Epaawado ikiija ka petege ibo kouja. Okai kou dani maija okeija aijaane kedaa tikauwa ka gokobaki tijawiidaiga wegai tita bagee jakei tei tita kouja.

24Kodeja peu kidaa no, ikii tonawi bagee, ikiija ka mobu agijo go-moteetega kouja.

25Peu kojoka no, ikii ito kou mobu bagee; ikii naidi taita kouja. Peu kojoka no, ikii ito kou kijai teete bagee; ikii dimi gaduwajake jege taita kouja.

26Peu kojoka no, me utoma muta kituwai gaa kodo; okai kou dani maija okeija aijaane kede puja mana wude-tai bagee maida jakei tei tita kouja.

27Kodeja ikii juweete bageepa ani kitii: Ikii ma jape bagee ipa egai. Be kigai bageepa enaa agijo jakei tai.

28Peu keewii bagee kojáá mana amo etii. Daana kiwidogai bagee sembahjang jatai.

29Amaimu tabee kitai bagee enakaato maija emuwakai. Daana ikiija egaupe-tai kagaba kijamotii bagee ikiija badju kagaba maija kijamote-tita ejaikai.

30Kidiimai bagee utoma menii to, daana ikiija ka edepede kijamotii bageepa make joko te ediimai.

31Me ka kijakei tai ikii ide gai danite, ikii na jakei tai.

32Kou danite ikii ipa kigata bagee ipa egapa ko, ikii má epaago? Peu bagee maija ipa egata bagee ipa egai kouja.

33Daana enaa agijo kijakei tai bageepa enaa agijo jakei tipa, má petege gouta? Peu bagee maija kou kei te-tai kouja.

34Joko naimaipagi dimi gajake kedaa gaa menipa, má petege gouta? Peu bagee maija peu bageepa kedaa gaa menii, kou dani kodo joko motiine tijake.

35Kodeja ikii ma jape bagee ipa egai, daana enaa agijo jakei tai. Daana joko motiine dimi te gajake menii. Ikiija ka petege ibo kaita kojoka, daana ikii Monika Me ka jokaane kaita. Nagajaweege wegai beu bagee ma, peu bagee ma maida okai bunu enaa kouja.

36Ikii ke ipa gai, Ikiitai na ipa ga-tai danite.

37Ikii me ijeije te etai, daana ikii na ijeije ti kitai. Peu taawii, tijake ikii na peu te keewii Ipa ejaikai, tijake ikii na ipa kijaikija.

38Menii, tijake ikeepa maija kinija. Epeebijado tijake, mijo tagi tita, daana enaida wo bego joko bego tijake, tuumidaa ma, me ka ikiija mutaida kijatuumaitai. Ikii jaebijadojake menii kodo danite, kijaebijadojake amo kiniitai kouja.”

39Okai ena dani awe-tai mana maija oowegai: „peka wanee me ka peka wanee me idaana migougu oomakija, mee? Beu mee? okejai wija komo duba aajagii tija?

40Etope-tai me idaana okaija kuduu ma ko ibo ko beu, kodeja me gakita topii agijo tiki tijake okaija kuduu ma ena dani kaitagi.

41Magijo ka aki keneka ka peka duba jimu puugee jadomakai, kodeja aki kidaa peka duba ka kemoma dou beu?

42Juwa, kawe dani tijake aki kenekaapa eteete mana, ’Kowaa ke, ani keneka, aki peka duba jimu puugee kaadijawiine’, daana aki kidaa peka duba kemoma kodo dou beu kodo? Kowaa ke, matabe bagee! Akija peka duba kemoma badijawii tiga tijake ewaida dojake aki keneka peka duba ka jimu puugee kodo jaadijawii.

43Enaa uti ena ma peu uta te goja kouja. Daana peu uti ena ma enaa uta te goja.

44Pija gakita akiuta uta gojake gaja. Ijó pija maida ara uta te duwaja kouja, daana edu maida po te duwaja.

45Enaa me okaija kegepa duba ka enaa awiida make enaa agijo podomijawe-tai, daana peu me okaija peu awiida make peu agijo podomijawe-tai. Kegepa duba bokouto kodo ebeiga godajake kojoka.

46Magijo ka ikii ’Tuhan, Tuhan,’ naabatai? kodeja anija kitii mana kodo kei tai beu.

47Meija aneepa mejake anija mana najuwijake dijo dopi, okai má tuma dani bukaa keemuwakaipiga:

48Okai me idaana owaa migita dani bukaa. Komo mijo umina utijake mogo maida kabo makii. Tijake uwo ejajake owaa tapa degidaa tai, kodeja owaa pigi beu, bida bida tijawita kouja.

49Kodeja meija juwijake dijo te dopi, me idaana kabo beuda maki maida owaa migita dani bukaa. Uwo kou maida degijake bogomidoke tai, tijake kou owaa umina peu kidoke tai.”

Currently Selected:

LUKAS 6: EKG

Highlight

Copy