LUKAS 4
4
Tuhan Jesus Egaado Tita
1Jesus Rohulkudus ka ebetume tijake Jarden make wo uwii. Roh ka me beuda
2naago mepiija ouwijake Teege ka egaado tigoo tai. Kei naagoudo kei okai ena ma nai beu. Okai kou wagi muumai tijake okai naidi gai.
3Tijake Teege kidaa eteete mana, „Kou danite aki ki Ugatame Joka keetigo ko, kii mogo ki goti kidoke ti etii.”
4Etijake Jesus wo eteete mana, „Kapogeije ebijamakita no: Goti ka to me tuma umi-tou te tija,” etii.
5Tijake Teege kidaa wado ouwijake uwoje makije ka jakimakita makiido okai kou gaa kodo to emuwakai.
6Tijake Teege kidaa eteete mana, „Akeepa to bida agijo kodo ma, ajiipi ma kaniita, aneepa naaekegajawita kouja, daana ani ide gata meepa menii to.
7Okai kouja aki migaakobe natipe ko, kou utoma aki ipuwe to,” etii.
8Tijake Jesus wo eteete mana, „Kapogeije ebijamakita:
Akija Tuhan Ugatame migaakobe etai,
Daana okai to dijo jadou,” etii.
9Tijake Jerusalim ouwijake Ugatameja owaa ka wado tà titaida kodaa emakijawii, eteete mana, „Kou danite aki Ugatame Joka keetigo ko, mijo gootidodou.
10Kapogeije ebijamakita kouja:
Okai jaetigo-tai bagee kaaetiipagi, kamune-tita tijake.
11Daana:
Gane wado kakatagi-toupigai,
Bado mogouto tokoo tidoke na kojoka.”
12Tijake Jesus wo eteete mana, „Kii dani mana wegata: Akija Tuhan Ugatame egaado te etai,” etii.
13Egaado tai manaido Teege muumai tijawijake okai kou gaa kodo wo godoke tai.
Jesus Meido Etopai Go-motii
14Wadoutouga Roh bidaidaiga Galilea wo uwijake, okai maida make mana kou maki dokoo ugo uwidoke tai.
15Tijake okeija ka sembahjang owaa utoma duba okai etopina, daana me utoma muta etuwai to.
Jesus Nazaret Makiida Ekonita
16Okai Nazaret dakii, ejataida kodo. Okai kei teigi danite Sabbat naago sembahjang owaapa woujo kai. Ebataine tijake joonidoke tai.
17Jesajaja kapogeije okei menii. Kapogeije kebajake kii mana ebijamakitaida dou:
18Tuhanja Roh ani maida topi
Jeboo natuumita kouja,
Daba bageepa ajii mana japitoke-tita,
Daana egadimita bagee epipikajawii mana ete-tita,
Daana peka wanee bagee domake-tita,
Daana tagi atita bagee epipikajawe-tita.
19Daana Tuhanja enaa wagi mana wegakume-tita tijake.
20Okai kapogeije munijawijake douto-tai meepa amo menijake animakai. Sembahjang owaapa tota bagee okai maida to peka wagimakai.
21Okai mana go-motijake eteete mana, „Ito kii naago kidi kapogeije duba ka ikii juweega mana kodo kobadoke teega,” etii.
22Meido utoma okai maa kou wegajake okai ebeida ka jikoo manaido apai umina, wegaate mana, „Beu mee? kii ke Jusuf joka kidi no?” wegai.
23Tijake Jesus eteete mana, „Beu ma ko beu, ikiija ka eniipiga mana ko: Kowaa ke, doktoda, akaato tiga ojawii. Aki Kapernaum kei tei tita agijo inii juweetege kodo jakai maija aki kidaa makiida kei tai.”
24Daana eteete mana, „Beu maa kou ani kitii, gokobaki tijawiidaiga wega-tai me idaana ma beu okai kidaa makiida ibo ejaikai.
25Kodeja ani maa kou kitii, Elias tota gaa Israil makiida mijáá jagamo wedaba tou tita; epa kodo taun ebeebe ka wii munidoke tijake kou maki dokoo utoma naidi uwa potu tita gaa.
26Kodeja Elias kidi me idaanaapa ebadikumii beu, kodeja Sarepta ka makijo Sidon dokoo ka mijáá jagamo kodoopa to.
27Daana Elisa mana wudei tita gaa Israil bagee wedaba tomo jago dani tou tita; daana meena ma jaojawii beu, kodeja Naaman, Sjam makijo ka me kidi to,” etii.
28Kou mana juwijake sembahjang owaa duba tota bagee utoma emoge umina egai.
29Okei joonidaa tijake makiida make eebakai. Dimiida okeija ka makijo ka migitaida kodo jagaida ouwijake mijo eemigaine dani tai.
30Kodeja okei jupiiga wokaato kijake uwii.
Enija Jago Me
31Okai Galilea ka dokoo ka makijoona eka ko Kapernaum mijo uwii. Okai kouda kodaa Sabbat naago meido etopai.
32Okaija etopita mana okei ego takuu-takuu umina, okaija mana kodo bida kouja.
33Sembahjang owaa duba enija jago me idaana tojake, kuutakaa emeeme teete mana,
34„Ei, Jesus, Nazaret ka me, aki ma inii ma má imee? Aki peu neewiine meege, mee? Aki ki ani epi no, Jimubeu kidi Ugatameepa make meta,” etii.
35Tijake Jesus ewidogeete mana, „Gabo! Me kidi duba make podomidou,” etii. Tijake enija kodaa me kidi meido jupi juma duwajawijake podomai, peu te jatijake.
36Meido utoma ego takuu-takuu umina timakijake okei kede wegaate mana, „Jee! Má mana kou ko? Okai mana bida peu etimakijake enija podomeegai kou ko,” wegai.
37Tijake kou maki dokoo utoma okai maida make mana wudigi tidoke tai.
Peterus Baakame Beu Jaawita
38Sembahjang owaapa make podomijake Simon owaapa woujo kai. Simon baakame gobi umina ka pakuti-toojogo. Tijake eedade-tijake okei Jesus ediimai.
39Okai watija joonijake gobi kodo, „Beu ki” etijake gobi kodo beu kidoke tai. Okai kou gaa kodo maija okai anigojake eedadai.
40Meuka wakoujo kijake meido kede didi tuma tumaija ejakita bagee Jesuspa oomei. Me gakita maida gane jamakijake beu jaawii.
41Enija maija me wedaba duba make podomijake emeeme teete mana, „Aki ki Ugatame Joka!” Kodeja okai enijaido kodo ewidogijake mana te wegai etii. Okai ki Keristus kidi okei epi kouja.
42Abata digii okai podomijake me beuda uwii. Meido kodaa eubaate okaapa mejake ejakimakaine, okai te ejaike-tita tijake.
43Kodeja Jesus eteete mana, „Joko ka makiida maija Ugatameja jakimakita makiida ka ajii mana kodo ani jawudii beu kai peu. Okai kouja ani nabadikumita,” etii.
44Okai Galilea ka sembahjang owaido duba mana wudina.
Currently Selected:
LUKAS 4: EKG
Highlight
Share
Copy
Want to have your highlights saved across all your devices? Sign up or sign in
