LUKAS 2
2
Tuhan Jesus Keristus Pata Mana
1Okai kou gaa kodo Kaisar Augustus bida mana podomijawii, jakimakita makiida maki utoma egakaine tijake.
2Kii ke edoga ka me egakita mana kodo, Kirenius kidi Sjam dokoo Gubernur toojogo gaa.
3Utoma bagee akija makijo makijo uwijake tai egakaine tijake.
4Kou danite Jusuf maija Galilea dokoo Nazaret makiida make podomijake, Daud ka makijo Baitlahim uwii, Judea dokoo kodo. Okai Daud epaidaiga ekebata kouja.
5Marjam wii ete-tai kodo ma enaimo eka aabijaine tijake. Marjam modaago kodo.
6Okejai kouda aatoojogo gaa Marjam pai agouda kai.
7Tijake jame joka idaana pai, ibouto kidi. Joka etonija kagaba ka etonijake munija agijo no-taida epiitimakai, duwa jawe owaa ko tipi kouja.
Domba Ooto-tai Bagee Kede Jaetigo-tai Bagee Edou
8Okai kou dokoo kodo domba ooto-tai bagee gei tapa to-jake wanee jato okeija ka domba imo ootoojogo.
9Tijake okai kou gaa kodo Tuhan jaetigo-tai me okeepa joonidoke tijake, Tuhanja ajiipi kodo eganimakai. Tijake okei weda umina.
10Tijake jaetigo-tai me eteete mana, „Weda te gai, juwidowei, ideide mana peijo kitiine meega, utoma bagee ipuwe.
11Ito kii naago kidi ajii bokouto kijaduwa-tai me paagi kouja, Daud makiida; kii ke Keristus, e boko te boko duwa-tai me kidi.
12Kii ke ikii tegee doupiga agijo: Ajejoka etonija kagaba ka etonijake munija agijo no-taida epiitimaki-toupiga ikii edoupiga,” etii.
13Okai kou gaa kodo jaetigo-tai me kidi ma enaimo epaawado ka imouto ewaa kidaa tai, Ugatame muta etuwaate mana,
14„Utoma ajiipi Ugatame ipuwe
Kii waiko Monika makijo;
Daana muka-muka makiida kiija
Juma dege-dege etai bageepa.”
15Jaetigo-tai bagee ejaikijake waiko epaawado uwijake, domba ooto-tai bagee kede wegaate mana, „Mewei, inii Baitlahim uwijake kei tidoke tipa mana dou no, Tuhanja eneegi kodo,” wegai.
16Tijake okei tibigi uwijake Marjam ma Jusuf ma edomakai, daana ajejoka kidi munija agijo no-taida epiitimaki-toojogo.
17Okei edojake joka kidi maida make etipai mana kodo ugo uwikumii.
18Juwita bagee utoma domba ooto-tai bagee ka mana kodo ego takuu-takuu umina.
19Kodeja Marjam kei manaido utoma dimi dubaiga to gaawe tai.
20Domba ooto-tai bagee amo uwii. Ugatame muta etuwai ma ibo ejaikai ma to tigoo, juwii ma dou ma tipai mana maida make, etita kidi danite.
Tuhan Jesus Ugatame Owaapa Ouwita
21Uno waguwo umijake okeitodo duwai gaa, eka Jesus eebatijawii, jaetigo-tai me ka etita kidi danite, modo ma beu to.
22Musaja dijo douja mana dijo dojake Joka kidi Jerusalim makiida ouwii, Tuhan maida wado eekegajawiine tijake.
23Tuhanja dijo douja mana ebijamakita kouja: Ibouto ibouto daniija edoga pajake kidi Tuhanpa eekegajawii.
24Tijake jo-menii agijo jo-meniine, Tuhanja dijo douja manaida ebijamakita kouja: Wonou tumaana bugaija juwa, wonou tokooboga ida wija juwa.
25Jerusalim makiida me idaana eka Simeon toojogo. Kii ke enaa me kidi, daana Ugatame umina dijo dou to. Israil bagee ideide eewii mana okai douto-tai, daana Rohulkudus okai maida tou.
26Rohulkudus ka ewaida etijake Tuhanja Keristus edou beu gaa okai te bokaitagi etita mana.
27Roh ka gokobaki tijawijake Ugatameja owaa woujo kai. Joka Jesus kidi nakame ukame ka oomejake, dijo do-tijake ebijamakita mana jakei taine tijake.
28Simeon Joka kidi ejupugijake Ugatame muta etuwai, eteete mana,
29„Ei, Tuhan, ito kou kakei te-tai me kidi
Kojáá peu wado uwiine tijake-najaikai,
Aki mana eneetege danite.
30Akaa ajii bokouto mana ani peka edomakeega kouja.
31Utoma bagee jumaapa kei tijaweetege kodo,
32Ojaa bagee aweida jaganimakaine tijake,
Daana akija uguupuguu Israil ka ajiipi kodo.”
33Okai maida make wegata mana kodo nakame ukame ego takuu-takuu.
34Simeon kidi muta etuwai, ukame Marjampa eteete mana, „Juwidou, kii Joka kiija
Israil bagee wedaba egootijawii ma, eenigojawii ma;
Daana okaija tegee dojake akaije to tigoo.
35Kataana akija kegepa nokogi-motiita maija, –
Tijake me wedaba ka kegepa duba ka gabo dimi ewaida awe-tita.”
36Gokobaki tijawiidaiga wega-tai jagamo idaana maija toojogo, eka Hanna, Panuil joka, Asjir ka me. Okai adama umina. Api tota make wado waka uwijake jameme ma enaimo taun pituwo aumai.
37Tijake mijáá kijake taun mutoona wado wii ma mepiina umii. Okai Ugatameja owaa jaikai beu, kodeja migaakobe teete te nai dijo dou ma, sembahjang ma to tigoo wanee agapi.
38Okai kou gaa kodo maija okai mejake Ugatame muta etuwai, daana Jerusalim pipikajawii mana doutoote bagee utoma kii Joka kidi maida make mana oowegagoo.
39Tuhanja dijo douja manaida ka mana utoma dijo dojawijake, okei Galilea jamo uwii, okeija ka makiida Nazaret kodaa.
40Joka kidi ejajake bida kai. Okai dimi bokouto jago, daana Ugatameja jikoo bokouto okai maida tou.
Tuhan Jesus Jokaida Gaa
41Ukame nakame taun gakita Jerusalim auwigou te-tai, wadouga etigajake petii tita ga-tou naagouda kodo.
42Okai taun wija ma gaati umijake, kei teigai danite dijo doune tijake wado uwii.
43Ibo naago dijo domakijake okejai jamo auweetigo gaa, Jokame Jesus kidi Jerusalim tou; nakame ukame ewoudaiga.
44Kodeja me jupi megigaa gajake agapeena uwii, tijake okei ma bagee jupi ma, edota bagee jupi ma eubai.
45Aadomakai beu tijake Jerusalim aubaine wado auwai.
46Uno wido umijake Ugatameja owaa duba aadomakai, me etope-tai bagee jupi animakijake ejuwai ma egaado tai ma teetigo.
47Ejuwita bagee utoma okaija dimi epi mana ma, amo etii mana ma ego takuu-takuu tai.
48Nakame ukame aadojake ego takuu-takuu umina tijake ukame eteete mana, „Ei, ani Joka, magijo ka kou dani niteege? Dodou, akaitai ma ani ma gaagaa umina kaubaage,” etii.
49Tijake amo eteete mana, „Magijo ka aanaubaaga? Ikai ewo, mee? ani Naitaija owaa duba tou beu kai peu,” etii.
50Kodeja okejai aagamakai beu, okaija etita mana kodo.
51Okejai ma enaimo uwijake Nazaret dakii tai, daana okejaija ka mana ejuwidoke tai. Ukame kodo kei manaido utoma dimi dubaiga to gaawe tai.
52Jesus kidi dimi bokouto kodo ma, má ma ejajake Ugatame ma, me ma ka juma dege-dege etai.
Currently Selected:
LUKAS 2: EKG
Highlight
Share
Copy
Want to have your highlights saved across all your devices? Sign up or sign in
