LUKAS 15
15
Igata Domba
1Mege kotuu te-tai bagee ma, peu bagee ma Jesuspa mei, mana ejuwaine tijake.
2Parisi bagee ma, kapogeije epi bagee ma kitigi motigi eteete mana, „Kii me kidi peu bagee ebukijake okei wa enaimo noteigi,” wegai.
3Tijake Jesus ena dani awe-tai mana oowegai, eteete mana,
4„Meime ikii jupi domba mutoona#15:4 Seratus munijake idaana igadoke ti-toojogo ijee gaatibeu me beuda te jaikija, igata kidi euba-uwiine tijake edomakaida to?
5Daana edomakipi ko kodeida ideide ma edokijawii.
6Okai owaapa dakii tijake ogaane ma okaija makijo ka bagee ma manaa-tijake eteete mana, ’Ani ma ideide neetiwei. Anija igata domba edomakeega kouja,’ etii.
7Ani kitii: Kou danite maija te tedemija enaa bagee ijéé gaatibeu kede maida ma ko, peu me idaana tedemijake epaawado ideide wo etige.
Igata Mege
8Juwa, kawo ka jagamo kodo mege gaati makijake ena igatoojogo lampu te ewakija, tijake owaa jimu deete epeepite ubai, domakaida to?
9Domakijake ogaane ma okaija makijo ka bagee ma manaa-tijake eteete mana, ’Ani ma ideide neetiwei. Anija igata mege domakeega kojoka,’ etii.
10Ani kitii: Kou dani maija Ugatame jaetigo-tai bagee jumaapa ideide umina, tedemita me idaana maida make.”
Igata Joka
11Tijake Jesus eteete mana, „Me idaana jame joka wija makijawii.
12Tijake amoje me kidaa nakameepa eteete mana, ’Ei, naitai, ani jato ka daniido naimi,’ etii. Tijake okaija aagijo taagijo kodo okejaapa jawudijawii.
13Iboopo umii beu gaa amojeme utoma agijo kotuu timakijake poto makijo uwii. Kouda kodaa peu kei teete aagijo taagijo utoopa mapugajawii.
14Utoma mapugamakijake kou makiida naidi uwa potu tidoke, tijake okai agijo beu kai.
15Tijake kou makiida ka me idaanaapa tawadoke tijake me kidaa gei tapa ekina naooto-tijake ebadikumii.
16Ekina ka noote kopu kodo okai naine kibigi gai, kodeja me idaana ka ma menii beu.
17Tijake okai wado gadoke tijake kei teete mana, Naitai jakei te-tai bagee me ida magoo naija agijo tiki tiki, kodeja ani ki jakai naidi bokaate! gai.
18Ani joonidoke tijake naitaipa uwiita, tijake kii dani etiita, Ei, naitai, ani peu me akeepa ma epaawadoopa ma.
19Ito kou ani joka naabatai ko nadou peu. Akija kakei te-tai me najaikai, etiita, gai.
20Tijake okai anigodoke tijake nakameepa uwii. Kodeja okai poto make meetigo gaa nakame edojake ipa egai. Okai tibigi tijake ejupugimakijake unu ejumigoo.
21Tijake jokame eteete mana, ’Ei, naitai, ani peu me akeepa ma epaawadoopa ma. Ani joka naabatai nadou peu,’ etii.
22Kodeja nakame kidaa jakei te-tai bageepa eteete mana, ’Egaa diiti kagaba jadoke-mewei. Jamakijawijake kagane ganeida jamakijawii, dedaana bado awii maija.
23Daana epoo enaa sapi joka oomewei. Ogo duwajake inii ideide ma buka neenowei.
24Ani joka bokajake ija keegi kouja. Daana igajake joko meegi,’ etii. Tijake okei ideide teete go-motii.
25Iboutome taida toojogo. Okai meetigo owaa kapauto kijake nii nogee juwii.
26Kei te-tai me idaana manaa-tijake magijo ewaa keega egaado tai.
27Tijake wo eteete mana, ’Aki weneka wado meegi, daana akaitai epoo enaa sapi joka ogo duwaagi, kojáá na ka wado meegi kouja,’ etii.
28Kodeja okai emoge gajake woujo te kai. Tijake nakame podomijake woujo ookaine jeu jeu etai.
29Kodeja nakameepa wo eteete mana, ’Juwidou, ani taun inoudo kakei tigoo to tijake akaa mana kaekagumai beu. Kodeja aki kigeena ma kamigi joka naimai beu, noogeima buka oonotijake ko.
30Kodeja aki joka wado mejake, akija edepedeido mogai jago jagamo ma mapugajawijake, epoo enaa sapi joka ogo jaduwaage!’ etii.
31Tijake wo eteete mana, ’Ei, ani joka, aki ani ma enaimo to tou, daana anija agijo utoma aki ipuwe to.
32Inii ideide ma buka nai enaa, aki weneka bokajake ija keegi kouja. Okai igadoke tijake joko meegi,’ etii.”
Currently Selected:
LUKAS 15: EKG
Highlight
Share
Copy
Want to have your highlights saved across all your devices? Sign up or sign in
