JAHJA 9

Peka Wanee Me Beu Jaawita

1Okai jaweetigo me idaana epamakitaida make peka wanee me edou.

2Tijake etope-taido egaado teete mana, „Ei, Kuduu, meija peu kei tita? Kii me ki, mee? nakame ukame ka kei tijake okai epamakitaida make peka wanee kiija,” etii.

3Tijake Jesus wo eteete mana, „Kii me ki peu kei tai ko beu, daana nakame ukame ko beu, kodeja Ugatameja kei tai agijo okai maida emuwake-tijake.

4Aweida toja gaa nabadikumita meja kei tija agijo inii kei tai beu kai peu. Wanee kaita, tijake me idaana ma te kei timakija kodaa.

5Ani makiida toja gaa, ani makiida ka aweida kodo,” etii.

6Okai kou mana wegajawijake maki maida epoge tuwajawii, tijake kou maki kodo epoge kodaa debee awijake, debee maki ki peka wanee meja peka maida widii jatai.

7Tijake eteete mana, „Siloam uwo komo duba witoge-uwii.” (Me manaida awi-toojogo ko Ebadikumita.) Tijake okai witogeuwijake okaija peka kodo enaa kijake joko mei.

8Tijake okai ma ena makijo ka bagee ma, me ino ka ma okai ediime-diime teetigo edota bagee kedaa edojake kei teete mana, „Beu, mee? kii ke animakijake diime-diime tei-teetegi kidi ki,” wegai.

9Tijake me ino ka wegai ko, „Kii ke okai kidi.” Daana me ino ka wegai ko, „Beu, okai dani ka me idaana,” wegai. Tijake okai kidaa eteete mana, „Ani ki okai kii kidi,” etii.

10Tijake okei eteete mana, „Aki kawe dani tijake peka domake?” etii.

11Tijake okai joko eteete mana, „Me idaana eka ki Jesus kidaa maki debee awijake anija peka maida widii natijake eneete mana, ’Siloam komo duba witoge-uwii’ enipi. Daana ani kouda kodaa witoge-uwijake ito ko domake,” etii.

12Tijake okei egaado teete mana, „Kii me kidi ki kaija?” etii. Tijake okaija „Ani ewo,” etii.

13Tijake jukumaato peka wanee me kidi ki okei Parisi bagee jumaapa ouwii.

14Okai kou naago kodo Jesus maki debee awijake peka domake tijake kei tita kou ko Sabbat naago kodaa.

15Tijake Parisi bagee kigeena ma etidou, okai kawe dani tijake peka enaa jawipi mana. Tijake okai wo eteete mana, „Okai debee maki peka maida widii natijake daana ani witogijake domakipa,” etii.

16Tijake Parisi bagee me ino ka eteete ko, „Kii me kii ke Ugatameepa make ko beu, Sabbat naago dijo dou beu kouja,” wegai. Daana me ino ka wegai ko, „Kawe dani tijake peu me idaana kou dani ka dou beu agijo kei tija?” wegai. Tijake okei kede akaije tai.

17Okai kouja jukumaato peka wanee me kidiipa eteete mana, „Kii me kidi maida make aki kawe no eniipage, akija peka enaa kaawipi kouja?” Etijake okai joko eteete mana, „Okai ki Ugatameja gokobaki tijawiidaiga wega-tai me kidi ki,” etii.

18Okai jukumaato peka wanee daana ito ko peka domake Jahudi bagee maakodo gai beu tijake nakame ukame manaa-tai.

19Tijake okei egaado teete mana, „Kii ke ikai joka, epamakitaida make peka wanee aeneega kidi, mee? Kawe dani tijake ito ko okai domake?” etii.

20Tijake nakame ukame ka aeteete mana, „Inai epi, kii ke inai joka, daana epamakitaida make peka wanee,

21kodeja kawe dani tijake ito ko domake inai ewo. Daana meija peka enaa jawipi inai ewo. Okai kidi egaado, okai ibo kijoka, okai kidaa mana kitiipagi,” aetai.

22Nakame ukame kou dani mana aawegai kou ko Jahudi bagee weda aagajake. Jahudi bagee ena dimi kepajawii kouja, meija kii ke Keristus kidi wegapi ko, okai Jahudi ka sembahjang owaa duba make eemigimakaine tijake.

23Okai kouja nakame ukame ka aawegaate mana, „Okai ibo kijoka okai kidi egaado tai,” aetita.

24Tijake kigeena ma jukumaato peka wanee me kidi okei manaa-tijake eteete mana, „Ugatame to muta etuwai. Inii epi me kii ke peu me kijoka,” etii.

25Tijake okai wo eteete mana, „Okai peu me juwa ani ki ewo. Kodeja mana kato to ani epi. Jukumaato ani peka wanee, kodeja ito ani domake,” etii.

26Tijake okei eteete mana, „Magijo kakei tipi? Kawe dani tijake okai peka enaa kaawipi?” etii.

27Tijake okai joko eteete mana, „Ani kiteega kodo ko, kodeja ikii juwii beu. Magijo taine kigeena ma juwiine? Ikii maija okaija etope-tai kaine, mee?” etii.

28Tijake okei ewidogijake eteete mana, „Aki ki okaija katopetai me, kodeja inii ke Musaja nitope-tai bagee.

29Inii epi Ugatameja Musaapa mana etita. Kodeja kii me kii ke kaijaiga meta juwa inii ewo,” etii.

30Tijake okai wo eteete mana, „Kowaa kei, ani gai kana, okai metaida ikii ewo eneega, okai ki anija peka enaa naawipi kodaa.

31Inii epi Ugatame kidaa peu kei te-tai me ka mana te jajuwija. Kodeja Ugatame migaakobe ete-tai ma, daana okaija dimi kei te-tai bagee ma to jajuwija.

32Maki ewaa awitaida make kii dani mana inii juwii beu tope, epamakitaida make peka wanee me kidi peka enaa jaawii mana kou no te.

33Okai Ugatameepa make beu naako, tumaana agijo ma te kei timakija kodaa,” etii.

34Tijake okei wo eteete mana, „Aki maakidi peu duba kapajawita. Aki ki inii nitopaine, mee?” etii. Tijake okei eemigimakai.

35Kii me kidi eemigimakita mana kodo Jesus juwijake, okai ma akado tijake eteete mana, „Aki Ugatame Jokame kidi maakidi egai, mee?” etii.

36Tijake okai eteete mana, „Kii kidi ki meime? Kuduu, ani maakidi egaine no,” etii.

37Tijake Jesus wo eteete mana, „Aki edooge ki, daana aki ma mana kaawegaate me, okai kii,” etii.

38Tijake okai wo eteete mana, „Ei, Tuhan, ani maakodo kagai,” etijake okai migaakobe etai.

39Tijake Jesus eteete mana, „Boko duwajawiine tijake makiida meta. Te domake bagee domake-tijake, daana domake bagee kede peka wanee ke-tijake,” etii.

40Tijake Parisi bagee wija wido Jesus ma enaimo kou mana kodo juwijake eteete mana, „Inii maija peka wanee bagee, mee?” etii.

41Tijake Jesus wo eteete mana, „Kou danite ikii peka wanee naako ikii peu beu, kodeja ikiija ka ko ’Inii domake’ wegai kouja, ikiija ka peu kodo tou to,” etii.

Currently Selected:

JAHJA 9: EKG

Highlight

Copy