JAHJA 7
7
Jerusalim Make Owaajokaa Migita Ga-tou Naago
1Wadoutouga kidi Jesus Galilea dokoo uwina. Okai Judea dokoo uwina beu, Jahudi bagee wagiine tijake dimi ubai kouja.
2Jahudi ka ibo naago kodo kapauto kai, kou ko owaajokaa migita naago kodo.
3Tijake okaija kenekaane ka eteete mana, „Jakai make podomijake Judea dokoo uwii, akija etope-taido maija akija kei tijaido kado-tita kojoka.
4Me idaana tumaana agijo gabo dubaiga te kei tija kouja, okai ugo uwikumiine ga-toojogo ko. Aki kei agijoudo kei tipe ko, makiida maki utomaapa aki akaato emuwakai,” etii.
5Kenekaaneido maija maakodo egai beu kouja.
6Jesus eteete mana, „Anija putu tiki beu topa, kodeja ikiija putu duwadoke tijake tou to.
7Makiida maki utoma ka ikii ke be ti kigai, kodeja ani be nagai, okeija kei te-taido peu kodo ani mana jawegai kouja.
8Ikii uwijake ibo naago kodo dijo dou. Ani ito gaa ibo naagoopa te uwiine kojoka, anija putu beu topa kouja,” etii.
9Kou mana wegajake okai Galilea dokoo tou.
10Kodeja okaija kenekaaneido ibo naago kodo dijo doune uwijake wadoutouga okai maija okai kidi to uwii. Ewaa tapaiga uwii ko beu, kodeja gabouga to uwii.
11Jahudi bagee kou ibo naago kodo eubana teete mana, „Kii kidi ki kaija?” wegana tita.
12Me wedaba jupi kodaa mana wedaba okai maida make kitigi motigi etai. Me ino ka etii ko, „Okai enaa me.” Daana me ino etii ko, „Beu, kodeja okai me wedaba uneune etijake-teete,” wegai.
13Kodeja me idaana ma okai maida make mana jawegai uu beu, Jahudi bagee weda egai kouja.
14Ibo naago kodo jupiida kijake Jesus Ugatameja owaa duba etopaine wadoujo kai.
15Tijake Jahudi bagee ego takuu-takuu umina teete mana, „Kawe dani tijake me kidi kapogeije epi no? okai topii beu tijake ko,” etii.
16Tijake Jesus wo eteete mana, „Anija etope-tai mana kodo ani kidiipa make ko beu, kodeja nabadikumita me kidiipa make.
17Kou danite me idaana Ugatameja dimi ekowaine ga-toojogo, Ugatameepa make enita juwa, anija mana godajaweega juwa ko, gaitagi.
18Meija mana kumijawipi, akaato ibo ejaike-tijake; kodeja meija ebadikumita me kidi ibo ejaike-tijake wo kei tipi, okai kii ke maakidi me, daana peu agijo okai maida beu.
19Musaja dijo douja mana kodo kinii beu, mee? Kodeja ikii me idaana ma dijo douja mana kodo dijo dou beu. Má takaa maida nagiine dimi gaaga?” etii.
20Tijake meido wo eteete mana, „Aki enija jago. Meime kagiine keegi?” etii.
21Tijake Jesus wo eteete mana, „Tumaana to ani kei tijaweetega; okai kou ikii utoma ego takuu takuu teetega.
22Musaja ikiitodo duwai mana kinita, Musaapa make ko beu kodeja, ikiija aijaane muumaaneepa make, daana ikii Sabbat naago kodaa ikiitodo me jaduwaiga.
23Kou danite ikii Sabbat naago me idaana ikiitodo jaduwatoojogo, Musaja mana dijo beebu te te-tijake, ikii emoge nagai, mee? me idaana Sabbat naago má jato jaojaweega kouja.
24Utoopa to dojake te kei tai, kodeja epeepite boko petajawii,” etii.
25Okai kouja Jerusalim makijo ka bagee wija wido wegaate mana, „Beu, mee? kii ke wagiine eubaate me kidi ki?
26Kodeja okai mana ewaa tapa wegaate, tijake okei mana mutoona ma okaapa etii beu. Kii me ki Keristus kipi gaa iboudo kede egai, mee?
27Maakidi, inii epi kii me ki metaida ko. Kodeja Keristus meitagiida ko me idaana ma epi beu okaija podomaitagiida,” wegai.
28Tijake Jesus Ugatameja owaa duba mana etopeetigo gaa kuutaka pitokeete mana, „Ani kii ke ikii utoma epi, daana anija metaida maija ikii epi. Daana anija dimiidaiga mei ko beu, kodeja nabadikumita me kidi maakidi me, ikii ke ewo me kidi.
29Okai ki ani epi, okaapa make meta kouja, daana okai kidaa nabadikumii,” etii.
30Tijake okei ejakimakaine dimi ubai, kodeja me idaana ma gane ewinikidou uu beu, okaija putu tiki beu kouja.
31Kodeja meido jupi make me wedaba maakodo egajake kei teete mana, „Keristus mepi ko, kii kei teetegi me kidi ma ko dou beu agijoudo euga wedaba kei taitagi, mee?” wegai.
32Meido kodo okai maida make wegata mana kodo Parisi bagee juwijake imam iboudo ma Parisi bagee ma ebadikumii, ejakimakaine tijake.
33Tijake Jesus eteete mana, „Mijo gaa to ani ikii ma enaimo touta, tijake nabadikumita me kidiipa uwiita.
34Ikii naubajake te nadouta, daana anija toutaida ikii te jawimake,” etii.
35Tijake Jahudi bagee kede wegaate mana, „Kii me kii ke kaija uwiine? inii te edojaida na ko. Okai Gerika bagee jupiida ka akawude tita Jahudi bageepa uwijake Gerika bagee etopaine, mee?
36Okai ma mana eneegi? ’Ikii naubaita kodeja te nadouta’, daana ’Anija toutaida ikii te jawimake’ eneegi kou ko,” wegai.
37Muumai jago naago ibo naago kodaa, Jesus joonijake japitokeete mana, „Meija uwo naidi tipi, aneepa mejake nowei.
38Meija maakodo nagapi, kapogeije ebijamakita danite, okai duba make gei tai uwo oneido waino taitai,” etii.
39Okai kou mana wegata kou ko Roh maida make, maakodo egai bagee ka ego-motija kodo. Roh kodo menii beu gaa, Jesus ajiipi etijawii beu gaa kouja.
40Kou manaido juwijake me wedaba wegaate mana, „Beu maa kou, kii ke gokobaki tijawiidaiga wega-tai me kidi ki,” etii.
41Daana me ino ka wegaate mana, „Kii ke Keristus kidi.” Kodeja ino ka wegaate mana, „Keristus Galilea dokoo make ewaa kija, mee?
42Beu, mee? kapogeije duba enita, Keristus kidi Daudja epaidaiga, daana Baitlahim makijo make, Daudja makijo kodo no te,” etii.
43Tijake meido kodo Jesus maida make akawidoge tai.
44Okei me ino ko ejakimakaine kodeja me idaana ma gane ewinikidou uu beu.
45Tijake ebadikumita bagee kede imam iboudo ma Parisi bageepa ma wo uwijake, uwii etipai bagee kedaa eteete mana, „Magijo ka ikii oomei beu keega?” etii.
46Tijake ebadikumita bagee wo eteete mana, „Okaija wegaigi danite ko me idaana ma wegai beu,” etii.
47Tijake Parisi bagee eteete mana, „Ikii maija uneune teete, mee?
48Me iboudo ma Parisi bagee ma ka me idaana maakodo egai, mee?
49Jee! Meido na ko dijo dou mana kodo ewo bagee kede peu kugouto okei maida dokeenii.”
50Tijake Nikodemus (okei jupi ka me idaana tika kodaa Jesuspa meta kidaa) etido teete mana,
51„Dijo douja mana kodaa me idaana peu eewija, mee? okaija wegata mana juwii beu tijake, daana okaija kei tita agijo gai beudaiga,” etii.
52Tijake okei wo eteete mana, „Aki maija Galilea dokoopa make, mee? Gadodou, Galilea dokoo duba make gokobaki tijawiidaiga wega-tai me idaana ma podomai beu,” etii.
53Tijake okei utoma akija owaapa-owaapa uwijake tai.
Currently Selected:
JAHJA 7: EKG
Highlight
Share
Copy
Want to have your highlights saved across all your devices? Sign up or sign in
