JAHJA 5
5
Baitesda Uwo Komoopa
1Kou wadoutouga Jahudi ka ibo naago kodo kijake Jesus Jerusalim makijo uwii.
2Jerusalim makijo Domba Damo kapauto kodaa uwo komo toojo. Iberani tuma ka manaidaiga Baitesda ebate-tai, akagau idibi jago.
3Kou akagauda kodaa didi bagee wedaba toojogo; peka wanee bagee ma, bado kotiidogo bagee ma, bado ekogadaa tita bagee ma, okei utoma komo duba ka uwo kodo begoo-begoo tai doutou.
4Ugatame jaetigo-tai me idaana uwo komo duba uwo begoo-begoo tijawiine megoo te-tai kouja. Tijake meija okai tiga uwo komo duba kodaa mijouwe ki-toojogo ko, uwo begoo-begoo tijake ko, okaija didi kodo beu kai.
5Kouda kodaa me idaana taun waguwo ma jokagaati didi teete me toojogo.
6Jesus edojake, daana didi teete umii wedaba tita epi kouja, eteete mana, „Aki beu kai ide, mee?” etii.
7Tijake didi me kidaa eteete mana, „Tuani, kou uwo komo duba kouja uwo begoo-begoo tijawi-toojogo ko, mijo naawii bagee beu. Kodeja ani uweetigo gaa me ino tiga kei ti-tougai,” etii.
8Tijake Jesus eteete mana, „Anigododou, akija eba dokijake uwii,” etii.
9Kou gaa kodo maija me kidi beu kai, tijake okaija eba dokijake uwii. Okai kou naago kodo Sabbat naago.
10Okai kouja Jahudi bagee kedaa didi beu kipi me kidiipa eteete mana, „Ito naago ko Sabbat naago. Akija uno umii eba dokii kou ko dá kojoka,” etii.
11Tijake okai wo eteete mana, „Didi beu naawipi me kidaa aneepa eneete mana ko, ’Akija uno umii eba dokijake uwii’, enipi kodaa,” etii.
12Tijake okei egaado teete mana, „Meija katipi, ’Akija uno umii eba dokijake uwii’ katipi me kidi ki?” etii.
13Kodeja didi beu kipi me kidi ewo, Jesus igadoke tipi kouja. Kouda kodaa ko me wedaba kodaa.
14Wadoutouga Ugatameja owaapa Jesus me kidi ma akado tijake eteete mana, „Dimi epeepite gai, aki didi beu keege. Peu agijo wo te kei tai, wo ka umina peu agijo aki maida kidoke tai na kojoka,” etii.
15Tijake me kidi uwijake Jesus kidaa didi beu naawipi mana kodo Jahudi bageepa eti-menii.
16Okai kou maida make Jahudi bagee ka Jesus ewidogai, kou agijo kodo Sabbat naago kei tijawii kouja.
17Tijake Jesus eteete mana, „Naitai kidi ito ki maija kei te-tai to, daana ani maija kei te-tai to,” etii.
18Okai kou maida make Jahudi bagee kedaa Jesus umina wagiine dimi gai. Sabbat naago dijo beebu tita maida make to ko beu, kodeja Ugatame kidi Naitai eebatijake akaato kidi Ugatame ma ena dani awita kouja.
Jesus Akaato Mana Wegai
19Tijake Jesus eteete mana, „Beu maa kou ani kitiine, Jokame kidi okai kidaa dimiidaiga to tumaana agijo te kei tija, kodeja Nakame ka kei tita agijo jadojake to. Nakame ka kei tija agijo kodo Jokame maija kei tai.
20Nakame ka Jokame kidi juma dege-dege etai kouja. Okaija kei te-taido emuwakai, daana wo ka ibo peijo kei tijaido emuwakaitagi, ikii ego takuu-takuu te-tita.
21Nakame kidaa bokata bageido eenigojawijake ija eeweigi danite, Jokame maija okaija dimi egaja bageido ija eewii.
22Nakame kidaa me idaana ma boko petai beu kouja, kodeja boko petai mana muto kodo Jokame kidiipa menijawita;
23me utoma Jokame kidi ibo ejaike-tita, okei Nakame ibo ejaikeigai danite. Meija Jokame kidi ibo te ejaikipi, ebadikumita Nakame maija ibo ejaikai beu.
24Beu maa kou ani kitiine, meija anija mana najuwijake nabadikumita me maakodo egapi, ajii tai imo to togoo. Okai boko petaida te kai, kodeja bokawouda make ajii tai maida wadouwe kidoke.
25Beu maa kou ani kitiine, putu naago kaita, daana ito ko maija putuuda keega, bokata bageido kodaa Ugatame Jokaja mana ejuwaitai, daana ejuwaitaido kodo ija kaitai.
26Nakame kidi ija bokouto okai duba tota danite, Jokame duba maija ija bokouto to-tijake boko jaduwajawita.
27Boko petai mana muto boko jaduwajawii, okai ki Me Joka kouja.
28Ikii kou mana kodo ego takuu-takuu te tai. Putu naago kaita kojoka, me oka duba ka bageido kodaa okaija mana ejuwaitai putu kodo.
29Tijake okei podomaitai; kou ko enaa kei tita bagee ajii tai imo to togoo taine anigoutai, daana peu kei tita bagee peu tapa imo to togoo taine anigoutai.
30Tumaana agijo ma anija dimiidaiga te kei tija, kodeja ani juwita danite boko duwajawii. Anija boko duwajawii kou ko boko petajawijake, anija ide gataidaiga to kei tai ko beu kouja, kodeja nabadikumita me ka dimiidaiga to.
31Kou danite ani akaato mana wegapa ko, anija wegata mana kodo maakodo ko beu.
32Me ino ka mana naawegai, daana ani epi ani maida make naawegata mana kodo maakodo.
33Ikii Jahjaapa meido ebadikumeetega, daana okai maakodo mana maida make wegai teetegi.
34Kodeja ani ki me jato ka mana motii beu, kodeja kii mana ani kiteega ikii ajii te-tita no tijake.
35Jahja kidi etakimakita pito kidi ganimakita, daana ikii ke mijo gaa to ide gai okaija ganimakitaida kodaa.
36Kodeja Jahjaja wegata mana ma ko euga ibo mana topa. Anija kei tijaido kodo boko duwajawe-tijake Naitaija naimita; anija kei tijaido utoma kodaa mana naawegai, Naitaija nabadikumita mana kodo.
37Daana nabadikumita Naitai kidaa mana naawega-tai. Ikii okaija mana wuu ejuwai beu. Okaija ebepeka maija ikii edou beu.
38Okaija mana muto maija ikiija kegepa duba ejakimakai beu; okaija ebadikumita me kidi ikii maakodo egai beu kouja.
39Ikii kapogeije epeepite igi jakeiga; kapogeije duba ajii tai imo to togoo go-motija gajake; daana kapogeije kou maija mana naawegai.
40Kodeja ikii aneepa mei beu, ajii taine tijake ko.
41Me ka ibo najaike-tijake ani jakimakai beu.
42Kodeja ikii duba Ugatame ei egai dimi kodo beu topa ani kigaaga.
43Ani Naitai eka dubaiga meta kodeja ikii najakimakai beu. Kou danite me idaana okai akaato eka dubaiga mepi ko, ikii ejakimakaita.
44Kawe danite ikii maakidi gaja, ikii muta akatuwa-tuwa dimi gai gaa ko, kodeja ikii Enato kidi Ugatameepa make muta kituwai agijo ubai beu ti-toojogo ko?
45Ani Naitai jumaapa mana kijaeti-meniita dimi ko te nagai. Maakidi, me idaana kijaeti-meneete, kii ke Musa kidi, ikiija dimi ekotopijawita me kidi.
46Kou danite ikii Musa maakodo egai naako, ani maija maakodo nagaja kodaa. Musaja ani maida make kapogeije ebijamakita kouja.
47Kodeja kou danite Musaja ebijamakita kapogeije ikii maakodo te gapa ko, kawe dani tijake ikii anija mana kodo maakodo nagaja?” etii.
Currently Selected:
JAHJA 5: EKG
Highlight
Share
Copy
Want to have your highlights saved across all your devices? Sign up or sign in
