JAHJA 20

Jesus Anigota

1Kou dá putu ka edoga naago kodo, abata didee awidoke beu gaa kodaa, Marjam Magdalena kodo me okaapa mejake damo takimijawita mogo kodo begokidoke ti-toojogo dou.

2Tijake okai tibigi Simon Peterus ma joko ka etope-tai me kidi, Jesusja ei egata me kidiipa uwijake eteete mana, „Me oka duba make me ka Tuhan kidi ouwi-toogai; kaija emakipai juwa inii ewo,” etii.

3Tijake Peterus ma joko ka etope-tai me kidi ma aapodomijake me okaapa auwai.

4Okejai wija enaimo tibigi, kodeja joko ka etope-tai kidaa eetigajake okai tiga me okaapa dakii tai.

5Okai me oka duba mijo ogoo tijake doodoo kagaba kodo toojogo dou, kodeja okai ki woujo kai beu.

6Nemouga Peterus maija eepeete mejake me oka duba woujo kijake doodoo kagaba kodo toojogo dou,

7daana dagi tonita kagaba kidi, doodoo kagaba ma enaimo ko beu, kodeja wo dani okaakai donidoke ti-toojogo.

8Tijake joko ka etope-tai me kidi edoga dakii tita me kidaa me oka duba woujo kijake daana dojake maakodo gai.

9Ugata kapogeije kodo okejai ewo gaa kouja, okai bokata bagee jupi make anigou beu kai peu mana kodo.

10Tijake okejai owaapa wo auwai.

Jesus Marjam Magdalenaapa Ewaa Kai

11Kodeja Marjam kodo me oka watijauto joonidoke tijake jege tai. Okai jege teetigo gaa tudumijake me oka duba dou.

12Tijake jaetigo-tai bagee wija pokade kagaba aamakijawita Jesus emakitaida kodaa me idaana dageepa, me idaana badoopa, aatoojogo edou.

13Tijake jaetigo-tai bagee kedaa Marjampa aeteete mana, „Ei, jagamo, magijo ka aki jege teete?” aetai. Tijake Marjam wo eteete mana, „Anija Tuhan kidi me ka emotipai kouja, daana kaija emakipai juwa ani ewo,” etii.

14Marjam kou dani etijake wouga wakouga tijake Jesus joonidoke ti-toojogo edou, kodeja Jesus kidi ki okai ewo.

15Tijake Jesus eteete mana, „Ei, jagamo, magijo ka aki jege teete? Meime eubaate?” etijake táí douto-tai me kidi Marjam egajake eteete mana, „Ei, Tuani, aki kiija make edoke-uwipe keetigo ko akaa emakipeida kodo enii, ani emotigoune kojoka,” etii.

16Tijake Jesus kidaa „Marjam” etii. Daana Marjam wouga wakouga tijake Iberani manaidaiga eteete mana, „Rabbuni,” me manaida awi-toojogo ko Kuduu.

17Tijake Jesus eteete mana, „Aki te najakimakai, ani Naitaipa wado uwii beu gaa kouja. Kodeja ani kenekaaneepa uwijake kii dani naaetii, ’Ani Naitaipa Ikiitaipa wado uwii, daana anija Tuhan kidi ma, ikiija Tuhan kidi ma, kiteegi,’ naaetii,” etii.

18Tijake Marjam Magdalena uwijake etope-taidoopa eteete mana, „Ani Tuhan kidi edopa,” etii. Daana Jesusja etipi mana kodo eti-menii.

Etope-tai Ena ma Gaati Kedeepa Ewaa Kita

19Okai kou naago kodaa uwaataa kijake, kou dá putu ka edoga naago kodaa etope-taido to-taida kodaa damo jekamitoojogo, Jahudi bagee weda egai kouja. Jesus kou gaa kodo mejake okei jupi joonidoke tijake eteete mana, „Kojáá towei,” etii.

20Kou etijake okaija gane ma gebo ma emuwakai. Tijake etope-taido kedaa Tuhan kidi edojake ideide umina tai.

21Tijake kigeena ma Jesus eteete mana, „Kojáá towei. Naitaija nabadikumita danite ani ikii maija kibadikumii.”

22Okai kou etijawijake okei maida puu etijake eteete mana, „Rohulkudus kodo ego-motiwei.

23Me idaana ka peu kodo ikii ipa ejaikipa, ipa ejaikidokita. Daana me idaana maida peu jadokijawipa okai maida peu dokidoke.

Tomaspa Ewaa Kita

24Etope-taido wija ma gaati jupi ka me idaana Tomas kidi, kii ke Didimus eebatijawita me kidi Jesus meta gaa kodo okei wa enaimo beu toojogo.

25Tijake joko ka etope-taido kedaa Tomaspa eteete mana, „Inii Tuhan kidi edope,” etii. Kodeja Tomas eteete mana, „Okaija gane maida ka puteti komo kodo ani dou beu gaa, daana ani kipo amoujo awii beu gaa, daana okaija gebo jato ka komo duba gane amo awii beu gaa ko ani maakodo te gaipiga,” etii.

26Uno waguwo umijake wadouto Jesusja etope-taido kede owaapa kotuu timakai, Tomas maija okei wa enaimo. Damo jekamimaki-toojogo gaa kodaa Jesus okei jupi joonidoke tijake eteete mana, „Kojáá towei,” etii.

27Tijake okai Tomas kidiipa eteete mana, „Akija kipo mapido tijake anija gane nadodou. Daana akija gane mapido tijawijake anaa gebo maida wini natidou. Daana maakodo te gaipiga te gajake maakodo gai,” etii.

28Tijake Tomas wo eteete mana, „Ei, anija Tuhan kidi, anija Ugatame kidi!” etii.

29Tijake Jesus wo eteete mana, „Aki nadomakeege kouja aki maakodo nagaage, mee? Ideide no! nadou beudaiga maakodo nagai bagee kede,” etii.

30Beu maa kou, joko ka dou beu agijoudo wedaba Jesus etope-taido pekaida kei tita, kii kapogeije duba ebijamakai beu daniido;

31kodeja kei dou beu agijoudo kede kapogeije ebijamakita, Jesus ki Keristus, Ugatame Joka kidi ikii maakodo ga-tijake; daana ikii maakodo egajake okaaka duba ajii tai pugaije gomote-tijake.

Currently Selected:

JAHJA 20: EKG

Highlight

Copy