JAHJA 2
2
Waka Bukitaida, Kana Makijo
1Widaago naago Kana makijo Galilea dokoo kodaa me idaana waka bukijake buka nai. Jesus ukame kouda kodaa toojogo.
2Jesus ma etope-taido ma buka naida kodaa mei etita.
3Utaadijo beu kijake Jesus ukameja eteete mana, „Okei utaadijo beu keegai,” etii.
4Tijake Jesusja eteete mana, „Ei, jagamo, aki ma ani ma jupi mana kato topa, mee? Anija wagi ko dakii beu topa no,” etii.
5Tijake ukame kodaa kei te-tai bagee kedeepa eteete mana, „Okaija kitiipagi danite kei tai to tai,” etii.
6Kouda kodaa mogo uwaawe benumi makijawi-toojogo, Jahudi bagee ka okeitodo witoge-tai maida make, uwo nogou te-tai uwaawe ka kigi mepiina juwa, jokagaati juwa, nowaawe te-tai.
7Tijake Jesus eteete mana, „Kei mogo uwaawe duba keija uwo wagaawe-tai,” etii. Tijake okei kei uwaawe kede ebetume tijake tai.
8Tijake okai eteete mana, „Ito ko no-mote-tei, daana buka noote ibo kidiipa jadoke-uwei,” etii. Tijake okei doke-uwii.
9Buka noote ibo kidi uwo utaadijo keega kodo igo wagidojake kaijaiga meega ko gai beu. (Kodeja jakei te-tai bageido uwo no-mote-titaido kede epi.) Tijake buka noote ibo kidaa waka bukipi me kidi manaa-tai.
10Tijake okai eteete mana, „Me ka kei teigai ko, enaa utaadijo tiga wudeigai, tijake meido mobu kidaa tijake wadoutouga ko peu utaadijo. Kodeja aki ki enaa utaadijo ito to makipe,” etii.
11Kii ke edoga kidi Jesusja dou beu agijoudo ookajawii, Kana makijo Galilea dokouda kodaa, daana okaija ajiipi agijo emuwakai. Tijake etope-taido kede maakodo egai.
Ugatameja Owaa Edoga Witogai
12Wadoutouga okai Kapernaum makijo mijo uwii, ukame ma kenekaane ma, etope-taido ma enaimo. Kouda kodaa uno wija wido umii.
13Jahudi bagee ka wadouga etigajake petii tita ga-tou naago kapa kijake Jesus Jerusalim makijo wado uwii.
14Ugatameja owaa duba sapi ma, domba ma, wonou ma, kaa te-tai bageido edomakai, daana mege akapaka te-tai bageido kede animaki-toojogo maija.
15Tijake buda godijai kato kei tijake Ugatameja owaa duba make ebakikumii, okeija domba ma sapi maija. Mege akapaka te-tai bagee ka megeido wegedege jatikumii. Okeija ka pejageido maija wadouga mijouga jatijake tai.
16Wonou kaa te-tai bageepa Jesus eteete mana, „Kei agijoudo kouja make doke-uwei. Naitaija owaa kii ko juwo owaa te naajaikai,” etii.
17Tijake kapogeije ebijamakita mana kodo etope-taido kede wado gai:
Akaa owaa ani dimi ga-ga tijake kegepa umina didi gai.
18Tijake Jahudi bagee eteete mana, „Má dou beu agijo nimuwakaipage? aki kou dani kei tai kouja,” etii.
19Tijake Jesus wo eteete mana, „Kii Ugatameja owaa ki bogomijawidowei, tijake ani naago wido to migijawiita,” etii.
20Tijake Jahudi bagee eteete mana, „Taun benumi ma mepiija duba kii Ugatameja owaa ki migita. Daana aki ki naago wido to migijawija, mee?” etii.
21Kodeja Ugatameja owaa etita kou ko, okaija má jato kodo gaagoo.
22Okai bokata bagee jupi make anigojake etope-taido okaija etita mana kodo gai. Okei kapogeije maida ka mana ma, Jesusja wegata mana ma maakodo gai.
23Okai Jerusalim toojogo gaa, wadouga etigajake petii tita ga-tou naago kodaa me wedaba okaaka maakodo egai, okaija dou beu ka kei titaido kodo jadojake.
24Okai akaato okeepa eekegajawii beu, me utoma okai epi kouja.
25Me maida make mana jawega-tijake okai me gai peu ko beu, me ka tugo jato kodo okai epi kouja.
Currently Selected:
JAHJA 2: EKG
Highlight
Share
Copy
Want to have your highlights saved across all your devices? Sign up or sign in
