JAHJA 16

1Kei manaido kei ani kiteega, ikii ego te ga-tijake.

2Sembahjang owaa duba make me ka keemigimakaitai. Beu maa kou, putu kaita, kigimakai bagee kede ke Ugatame jakei teete gaitai.

3Kei manaido okei kei taitai, okei Naitai ma ani ma ewo kouja.

Rohulkudus Meitagi Mana

4Kodeja kei manaido kei kiti-kineega, tijake kou putu naago duwadoke tipa ko, ikii gaita, anija kiteega kii ko. Kei manaido kei ke edoga kidi kitii beu, ani ikii wa enaimo tou kouja.

5Kodeja ito ko ani nabadikumita meepa uwii, daana ikii jupi ka me idaana ma ’Aki kaija uwiine?’ nagaado beu.

6Kodeja ani kei manaido kiteega kouja ikiija kegepa duba gaagaa umina.

7Kodeja ani maakodo kitii, ani uwii kou ko ikii epaago ke-tijake. Kou danite ai te uwipa ko Agaagi Me kidi te meitagi, kodeja ani uwipa ko, ikeepa kijaebadikumiita.

8Okai mepi ko makiida maki utoma peu kei tai agijo maida make ma, maakodo bokouto maida make ma, peu eewii maida make ma peta-meniitagi.

9Peu kei tai agijo maida make ko, okei maakodo nagai beu kouja.

10Maakodo bokouto maida make ko, ani Naitaipa uwijake ikii te nadouta kouja.

11Peu eewii maida make ko, makiida ka ibo kidi peu eewita kouja.

12Mana wedaba ani kitiine, kodeja ito ko ikii te juwimake.

13Kodeja okai mepi ko, kou ko maakodo bokouto jago Roh kodo, okai maakodo bokoutoudaiga keuwiitagi. Okai kidaa gaijaidaiga te wegaitagi kouja, kodeja okaija juwita agijo kodo to wegaitagi. Wado ka ewaa kidaa taitai agijoudo kiti-kiniitagi.

14Okai ajiipi natijawiitagi, anija agijoudo naamotijake kiti-kiniitagi kouja.

15Naitai ipuwe agijo utoma ani ipuwe maija. Okai kouja ani kiteega, anija agijoudo naamotijake kiti-kiniitagi.

Gaduwai Dimi Ideide ma Akapaka Tai

16Mijo gaa to tojake ikii te nadouta. Daana kigeena ma mijo gaa to tijake ikii nadouta.”

17Tijake etope-tai wija wido okei kede wegaate mana, „Magijo eneegi kii ko? ’Mijo gaa to tojake ikii te nadouta, daana kigeena ma mijo gaa to tijake ikii nadouta,’ daana ’Ani Naitaipa uwiita kouja,’ eneegi kii ko,” wegai.

18Tijake okei wegaate mana, „Má mana eneegi? ’mijo gaa to.’ Okaija eneegi mana ko inii gai beu,” wegai.

19Okei egaado taine Jesus epi, tijake eteete mana, „Anija kiteega mana maida make, ’Mijo gaa to tojake ikii te nadouta,’ daana ’Kigeena ma mijo gaa to tijake ikii nadouta’ kiteega mana ko ikii kede akagaado teete, mee?

20Beu maa kou ani kitiine, ikii jege ma jiijii ma taita, kodeja makiida maki utoma ideide taitai. Ikii gaagaa taita, kodeja ikiija ka gaagaa kodo ideide ma akapaka tidoke taita.

21Jagamo idaana joka didi gaa kodo gaagaa, joka pai wagi kidoke kouja. Kodeja joka pamakijake gaduwai kodo wado te gajake okai ideide tai, me idaana makiida pamakijake kouja.

22Kou dani maija ito ko ikii gaagaa. Kodeja ani kigeena ma kidouta, tijake ikiija kegepa ideide taita, daana ikiija ideide tai kodo me idaana ka ma ikeepa make ti kijamotimake.

23Okai kou naago kodaa ikii tumaana agijo ma te natidouta. Beu maa kou ani kitiine, kou danite ikii gaja agijo Naitaipa ediimipa ko, aneeka dubaiga kiniitagi.

24Tika kodaa make ito to utuuja ikii tumaana agijo ma aneeka dubaiga ediimai beu. Ediimiwei, ikii go-motijake ikiija ideide dimi kodo boko duwadoke te-tita no.

25Kei manaido ani ena dani awe-tai manaidaiga kitii, kodeja putu naago kodaa ani ena dani awe-tai manaidaiga ti kitiita, kodeja Naitai maida make mana kodo ewaa tapa kiti-kiniita.

26Okai kou naago kodaa ikii aneeka dubaiga ediimaita. Daana ani Naitaipa kijaediimaita mana kodo ani ti kitii;

27Naitai kidaa ei kigai kouja, ikii ei nagajake ani Naitai kidiipa make meta mana kodo ikii maakodo nagai kouja.

28Ani Naitaipa make mejake makiida mijouwe kita; wadoutouga ani makiida jaikidokijake Naitaipa uwiita.”

29Tijake etope-taido wo eteete mana, „Dodowei, ito aki ewaa tapa eneege, daana ena dani awe-tai mana ka enii beu.

30Ito inii epi aki utoma agijo utoma epi, daana me idaana ka kagaado tai gai peu ko beu. Okai kou maida make inii maakodo gai, aki Ugatameepa make meta mana kodo,” etii.

31Tijake Jesus wo eteete mana, „Ikii ito ko maakodo gaaga, mee?

32Dododou, putuuda kaineega, beu maa kou ito maija putu duwadoke keega, ikii akawude tikumijake aki-tou-tou taita, ani to najaikidokijake. Ani ki to beu kodeja, Naitai kidi ani ma enaimo kouja.

33Kei manaido kei ani kiti-kineega, ani duba ikii muka-muka te-tijake. Makiida kiija ikii gaagaa taita. Kodeja ikiija kegepa tipinimakai; makiida kii ke ani dabapigu tijaweega kojoka,” etii.

Currently Selected:

JAHJA 16: EKG

Highlight

Copy